Read dyu Zozuwe ka kitabu 11 Bible Online

Zozuwe ka kitabu 11 - dyu bible

Zozuwe ka kitabu 11

¹Asɔri masacɛ Yabin y'o koo nunu mɛn minkɛ, a ye cidenw bila ka taga Yobabu fɛ n'o ye Madɔn masacɛ ye, ni Simurɔn masacɛ, ani Akisafi masacɛ fɛ.

²A ye dɔw ci kuluyɔrɔ masacɛw fɛ kɔgɔdugu ɲafan na, ni Araba mara la min be Kinerɛti baa [1] worodugu ɲafan fɛ, ani kulujukɔrɔ mara la, ni kuluw kan, Dɔri dugu gɛrɛfɛ tileben ɲafan na,

³ka dɔw ci kanaanw fɛ minw be kɔrɔn na, ani minw be tileben fɛ, ka dɔw ci amoriw fɛ, ni itiw, ani periziw, ni zebuziw fɛ, minw be kulu kan, ani iviw fɛ, minw be Ɛrɛmɔn kulu jukɔrɔ Misipa mara la.

⁴U bɔra n'u ka kɛlɛdenw bɛɛ ye, ka ɲɔgɔn lajɛn caaman. U tun ka ca i n'a fɔ kɔgɔjida la cɛncɛn. Soow ni wotorow tun ka ca kosɔbɛ.

⁵O masacɛ nunu bɛɛ ye ɲɔgɔn lajɛn ka taga sigi Merɔmu kɔɔ daa la janko ka Isirayɛlidenw kɛlɛ.

⁶Masaba y'a fɔ Zozuwe ye ko: «Kana siran u ɲa fewu, bari ne bena u bɛɛ don Isirayɛlidenw bolo, sini nin waati ɲɔgɔn na, o b'a sɔrɔ u bɛɛ fagara ka ban. I bena u ka soow senfasaw tigɛ, k'u ka wotorow jɛni.»

⁷Zozuwe n'a ka kɛlɛdenw bɛɛ tagara bari u la Merɔmu kɔɔ daa la. U girinna ka taga don u cɛma.

⁸Masaba y'u don Isirayɛlidenw bolo, olu sera u kɔrɔ, k'u gwɛn fɔɔ ka taga se Sidɔn gɛrɛfɛ, min ye dugubaba ye, ani Misirefɔti Mayimu, fɔɔ ka taga se Misipe mara kɔkɛnɛ la, min be kɔrɔn faan fɛ. U y'u halaki, u ma foyi to nii la.

⁹Masaba tun y'a fɔ Zozuwe ye ko a ka min kɛ u la, a y'o kɛ. A y'u ka soow senfasaw tigɛ, k'u ka wotorow jɛni.

¹⁰Zozuwe kɔsegira tuma min na, a ye Asɔri dugu minɛ k'a masacɛ faga ni murujan ye. Asɔri le tun ye o mara nunu bɛɛ masaduguba ye o waati la.

¹¹U ye dugumɔgɔw bɛɛ halaki ni murujan ye k'u ban pewu. Fɛɛn minw tun be ninakili, o si ma to. U ye dugu nin jɛni.

¹²Zozuwe ye masacɛ nunu bɛɛ minɛ, ani u ka duguw, k'u ni dugu mɔgɔw halaki ni murujan ye pewu, ka kɛɲɛ ni Masaba ka baarakɛla Musa ka fɔta ye.

¹³Nga dugu minw be tintinw kan, Isirayɛlidenw ma olu si jɛni, fɔɔ Asɔri dɔrɔn, Zozuwe y'ale lo jɛni.

¹⁴Isirayɛlidenw y'o dugu nunu kɔnɔ nafolo ta ka taga n'u ye ani begɛnw, nga u ye mɔgɔw bɛɛ halaki ni murujan ye fɔɔ k'u ban pewu. U ma mɔgɔ si to nii la.

¹⁵Masaba tun y'a fɔ a ka baarakɛla Musa ye cogo min na, Musa fana y'a fɔ Zozuwe ye ten, Masaba ye min fɔ Musa ye, Zozuwe y'o bɛɛ kɛ, a ma foyi to yen.

¹⁶Zozuwe ye jamana nin bɛɛ minɛ ten, kuluyɔrɔ, ni worodugu ɲafan bɛɛ, Gosɛn mara bɛɛ, ni kulujukɔrɔ mara, ni Araba mara, ani Isirayɛlidenw ka kuluyɔrɔw, n'u ka kulujukɔrɔ mara, a y'o bɛɛ minɛ.

¹⁷K'a ta Alaki kulu kan, min be *Seyiri mara faan fɛ, fɔɔ ka taga se Baaligadi mara la, Liban kɔkɛnɛ la, Ɛrɛmɔn kulu jukɔrɔ, a y'o yɔrɔ masacɛw bɛɛ minɛ k'u faga.

¹⁸Zozuwe ye tile fila kɛ o kɛlɛ la, n'o yɔrɔ masacɛw ye.

¹⁹Ka iviw niin bɔ a la, minw siginin be Gabaŋɔn, dugu wɛrɛ ma bɛn ni Isirayɛlidenw ye tugu. U ye u bɛɛ minɛ.

²⁰ Bari Masaba le tun y'a kɛ siya nunu y'u jaa gwɛlɛya ka kɛlɛ kɛ ni Isirayɛlidenw ye, janko Isirayɛlidenw k'u halaki pewu, u kana makari u la, u k'u halaki pewu i ko Masaba tun y'a fɔ Musa ye cogo min na.

²¹O waati kelen nin na, anaki minw tun be kuluyɔrɔ la Eburɔn ni Debiri, ani Anabu, minw tun be Zuda mara ni Isirayɛli mara kuluw kan, Zozuwe y'u bɛɛ halaki pewu, n'u ka duguw.

²²Anaki si ma to Isirayɛlidenw ka jamana kɔnɔ, fɔɔ Gaza, ni Gati, ani Asidɔdi duguw kɔnɔ.

²³Zozuwe ye jamana nin bɛɛ minɛ i ko Masaba tun y'a fɔ Musa ye cogo min na. A ye jamana nin tilan k'a di Isirayɛli deen tan ni fila kɔmɔgɔw ma k'a kɛ u ta ye. O kɔ, hɛrɛ sɔrɔla jamana nin kɔnɔ, kɛlɛ tun te yen tugu.