Read dyu Zozuwe ka kitabu 17 Bible Online

Zozuwe ka kitabu 17 - dyu bible

Zozuwe ka kitabu 17

¹U ye kala la, mara sera Manase kɔmɔgɔw ma, min tun ye Yusufu deen fɔlɔ ye. Manase deen fɔlɔ Makiri, min tun ye Galaadi facɛ ye. Galaadi ni *Basan mara tun dira ale kɔmɔgɔw ma, bari cɛfari tun lo.

²U ye kala la ka mara dɔ di Manase deen tɔw ma, ka kɛɲɛ n'u ka fadenyabolow ye, Abiyezɛri deenw ni Elɛki deenw, ani Asiriyɛli deenw ni Sɛkɛmu deenw, ani Efɛri deenw ni Semida deenw, u ye yɔrɔ di olu le ma. Olu le ye Manase deen cɛman tɔw ye, u y'a di ka kɛɲɛ n'u ka fadenyabolow ye.

³Manase deen Makiri dencɛ Galaadi deen Efɛri dencɛ Selofeyadi ma dencɛ sɔrɔ, fɔɔ denmusow. U tɔgɔ filɛ: Maala, Nowa, Ogila, Milika, ani Tirisa.

⁴ O denmuso nunu tagara sarakalasebaga Eleyazari, ni Nun dencɛ Zozuwe fɛ ani ɲamɔgɔw fɛ k'a fɔ ko Masaba tun y'a fɔ Musa ye ko a ka niyɔrɔ di olu ma u fadenw cɛma. U ye niyɔrɔ di u ma u fadenw cɛma, ka kɛɲɛ ni Masaba ka fɔta ye.

⁵Manase kɔmɔgɔw ye yɔrɔ tan sɔrɔ, minw be danna Galaadi ni Basan mara la minw be Zurudɛn baji kɔfɛ.

⁶Bari Manase kɔmɔgɔw minw ye musomanw ye olu fana ye niyɔrɔ sɔrɔ u fadenw cɛma. Galaadi mara fana dira Manase kɔmɔgɔ tɔ nunu ma.

⁷Manase kɔmɔgɔw ka mara daan be bɔ Asɛri ka taga tɛmɛ Mikimetati, min be Sisɛmu gɛrɛfɛ, ka taga Yamin ani Ɛntapuwa faan fɛ.

⁸Tapuwa mara tun kɛra Manase kɔmɔgɔw ta ye, nga Tapuwa dugu yɛrɛ, min be Manase kɔmɔgɔw ka mara daan na, ale kɛra Efarayimu kɔmɔgɔw ta ye.

⁹Daan nin tɛmɛna ka taga Kana kɔɔ daa la a worodugu ɲafan fɛ. O yɔrɔ dugubaba minw be Manase kɔmɔgɔw ka yɔrɔ cɛma, olu ye Efarayimu ta ye. Manase kɔmɔgɔw ka mara daan tun be kɔɔ nin kɔgɔdugu ɲafan fɛ ka tɛmɛ ka taga gun kɔgɔji la.

¹⁰Mara min be worodugu ɲafan fɛ, o tun ye Efarayimu kɔmɔgɔw ta ye, kɔgɔdugu ɲafan fɛ, o tun ye Manase kɔmɔgɔw ta ye, u bɛɛ ta daan tun ye kɔgɔji ye. Manase kɔmɔgɔw tun be daan bɔ ni Asɛri kɔmɔgɔw ye kɔgɔdugu ɲafan fɛ ka daan bɔ ni Isakari kɔmɔgɔw ye kɔrɔn fɛ.

¹¹Manase kɔmɔgɔw ka dugu dɔw tun be Isakari ni Asɛri kɔmɔgɔw ka mara kɔnɔ. O ye Bɛtiseyan n'a ka mara ni Yibileyamu n'a ka mara ani Dɔri n'a ka mara ni Ɛndɔri n'a ka mara ani Tanaki n'a ka mara ni Megido n'a ka mara. O ye mara saba ye.

¹² Manase kɔmɔgɔw tun ma se k'o dugu mɔgɔ nunu gwɛn, o la, kanaanw tora o jamana nin na.

¹³Isirayɛlidenw nana fanga sɔrɔ tuma min na, u ye kanaanw bila fangabaara la, nga u ma u gwɛn.

¹⁴Yusufu kɔmɔgɔw y'a fɔ Zozuwe ye ko: «Mun na i ye yɔrɔ kelen dama le di anw ma? An do ka ca, Masaba fana do ye nɛɛma kɛ an ye halibi.»

¹⁵Zozuwe y'a fɔ u ye ko n'u ka ca, ko u ka taga tuu ben periziw ni erefaw ka mara la k'o kɛ u ta ye, ko bari efaraw ka mara kuluyɔrɔ ka dɔgɔ u ma.

¹⁶Yusufu kɔmɔgɔw y'a fɔ tugu ko: «Kuluyɔrɔ nin ka dɔgɔ an ma. Kanaan minw bɛɛ siginin be kɔkɛnɛ na, minw be Bɛtiseyan n'a mara kɔnɔ, ni minw be Zizireyɛli kɔkɛnɛ na, kɛlɛkɛwotoro nigɛlamanw be olu bɛɛ fɛ.»

¹⁷Zozuwe y'a fɔ Yusufu deen Efarayimu kɔmɔgɔw, ni Manase kɔmɔgɔw ye ko u ka ca, fanga fana b'u la kosɔbɛ, ko u tena mara kelen dama d'u ma.

¹⁸Nga u bena kuluyɔrɔ sɔrɔ k'o kɛ u ta ye, min ye tuu ye. U ben'a tigɛ ka sɔrɔ k'o yɔrɔ kɛ u ta ye, ani ka kanaanw gwɛn n'u ka kɛlɛkɛwotoro nigɛmanw ye hali ni fanga b'u la cogo o cogo.