Read dyu Zozuwe ka kitabu 19 Bible Online

Zozuwe ka kitabu 19 - dyu bible

Zozuwe ka kitabu 19

¹A siɲɛ filanan na, u ye kala la, Simeyɔn kɔmɔgɔw y'u niyɔrɔ sɔrɔ ka kɛɲɛ n'u ka fadenyabolow ye, Zuda kɔmɔgɔw ka mara cɛma.

² U ye dugu minw sɔrɔ u ka mara kɔnɔ, o filɛ: Bɛriseba ni Seba, ani Molada,

³Asari Suwali, ni Bala, ani Esɛmu,

⁴Ɛlitoladi ni Betuli, ani Ɔrima,

⁵Sikilagi ni Bɛtimarikabɔti, ani Asari Suza,

⁶Bɛtilebawɔti ni Saruwɛn, o ye dugubaba tan ni saba ye n'u maraw.

⁷Ayini ni Irimɔn, ani Etɛri ni Asan, o ye dugubaba naani ye n'u maraw.

⁸Dugudennin minw bɛɛ be o dugubaba nunu lamini na, fɔɔ ka taga se Baalati Beyɛri, min ye Arama ye worodugu ɲafan fɛ, olu bɛɛ. O le ye Simeyɔn kɔmɔgɔw ta ye ka kɛɲɛ n'u ka fadenyabolow ye.

⁹Simeyɔn kɔmɔgɔw niyɔrɔ dira u ma Zuda kɔmɔgɔw ka mara le kɔnɔ. U ye mara nin cɛmancɛ le di u ma, bari mara nin tun ka bon kojugu Zuda kɔmɔgɔw ma.

¹⁰A siɲɛ sabanan na, u ye kala la, o sera Zabulɔn kɔmɔgɔw ma ka kɛɲɛ n'u ka fadenyabolow ye.

¹¹U ka mara nin daan tun be taga fɔɔ Saridi, ka tɛmɛ ka taga tileben fɛ Mareyala faan fɛ, ka taga se Dabɛsɛti, o kɔ ka taga gun kɔɔ ma min be Yokineyamu gɛrɛfɛ,

¹²ka bɔ Saridi ka gɔngɔrɔ ka taga kɔrɔn fɛ, fɔɔ ka taga se Kisilɔti Tabɔri mara daan na, ka tɛmɛ ka taga Doberati ka yɛlɛ Yafiya,

¹³ka bɔ o yɔrɔ la ka taga kɔrɔn fɛ ka tɛmɛ Gatefɛri, ni Itakasin, ka taga Irimɔn, ka taga fɔɔ Neya faan fɛ.

¹⁴O kɔ, ka gɔngɔrɔ kɔgɔdugu ɲafan fɛ, ka taga Anatɔn ka taga se Yifutayɛli kɔkɛnɛ ma.

¹⁵Dugubaba tan ni fila, ani u maraw be yen, Katati ni Naalali ani Simurɔn ni Yideyala, ani Bɛtilehɛmu tun ye u dɔw ye.

¹⁶O dugubaba nunu n'u maraw le ye Zabulɔn kɔmɔgɔw ta ye ka kɛɲɛ n'u ka fadenyabolow ye.

¹⁷A siɲɛ naaninan na, u ye kala la, o sera Isakari kɔmɔgɔw ma ka kɛɲɛ n'u ka fadenyabolow ye.

¹⁸Dugubaba minw tun be u ka mara la, o ye: Zizireyɛli ni Kezulɔti ani Sunɛmu ye,

¹⁹ani Afarayimu ni Sihɔn, ani Anarati,

²⁰Arabiti ni Kisiyɔn, ani Ebɛsi,

²¹Ɛrɛmɛti, ni Ɛnganimu ani Ɛnada, ni Bɛtipasesi.

²²U ka mara daan tagara se Tabɔri ni Sasima, ani Bɛtisemɛsi, ka bɔ yen ka taga gun Zurudɛn baji la. Dugubaba nunu ye tan ni wɔɔrɔ ye ani u ka maraw.

²³Yɔrɔ min sera Isakari kɔmɔgɔw ma ka kɛ u ta ye ka kɛɲɛ n'u ka fadenyabolow ye, a dugubabaw n'u maraw, o le ye nin ye.

²⁴A siɲɛ duurunan na, u ye kala la, o sera Asɛri kɔmɔgɔw ma, ka kɛɲɛ n'u ka fadenyabolow ye.

²⁵Dugubaba minw tun b'o ka mara nin na, olu ye nunu ye: Ɛlikati ni Ali ani Bɛtɛn ni Akisafi,

²⁶Alamɛlɛki, ni Ameyadi ani Miseyali. Tileben fɛ, u ka mara daan tagara se Karimɛli kulu ma, ka ta'a bila Siwɔri Libinati kɔɔ la.

²⁷O kɔ, ka gɔngɔrɔ ka taga kɔrɔn fɛ fɔɔ Bɛtidagɔn, ka taga se Zabulɔn, ani Yifutayɛli kɔkɛnɛ na, ka taga kɔgɔdugu ɲafan na fɔɔ Bɛtemɛki ni Neyiyɛli ka tɛmɛ ka taga Kabuli numanbolo fɛ,

²⁸ka taga Abidɔn [1] faan fɛ ni Erewɔbu, ani Amɔn ni Kana, fɔɔ ka taga se Sidɔn, min ka bon,

²⁹ka gɔngɔrɔ ka taga Arama faan fɛ, fɔɔ ka taga se cɛfaridugu Tiri ma, ka tɛmɛ ka taga Oza, ka tɛmɛ Akizibu gɛrɛfɛ ka taga gun kɔgɔji la.

³⁰Uma ni Afɛki ani Erewɔbu, ye dugu dɔw ye fana, daan nin tɛmɛna minw gɛrɛfɛ. O bɛɛ lajɛnnin ye dugubaba mugan ni fila ye ani u maraw.

³¹O le ye Asɛri kɔmɔgɔw ka niyɔrɔ ye ka kɛɲɛ n'u ka fadenyabolow ye, a dugubabaw n'u ka maraw.

³²A siɲɛ wɔɔrɔnan na, u ye kala la, o sera Nɛfutali ma, ka kɛɲɛ n'u ka fadenyabolow ye.

³³U ka mara daan tun be daminɛ Elɛfu ni Elɔn, ka tɛmɛ Saananimu ni Adami Nɛkɛbu ani Yabineyɛli, fɔɔ ka taga se Lakumu, ani ka taga gun Zurudɛn baji la.

³⁴Mara nin daan tagara gɔngɔrɔ tileben fɛ Azinɔti Tabɔri, ka tɛmɛ o yɔrɔ la ka taga Ukɔki, ka taga se Zabulɔn ka mara daan na worodugu ɲafan fɛ ani Asɛri ta ma tileben faan fɛ. [2] Zurudɛn baji tun tora kɔrɔn ɲafan fɛ.

³⁵Mara nin kɔnɔ cɛfariduguw filɛ: Sidimu, ni Seri ani Amati ni Arakati, ani Kinerɛti,

³⁶Adama ni Arama ani Asɔri,

³⁷Kedɛsi ni Edirɛyi ani Ɛnasɔri,

³⁸Yireŋɔn ni Migidalɛli, ani Orɛmu ni Bɛtanati, ani Bɛtisemɛsi. O ye dugubaba tan ni kɔnɔntɔn ye, n'u maraw.

³⁹O le kɛra Nɛfutali kɔmɔgɔw ta ye ka kɛɲɛ n'u ka fadenyabolow ye, u ka dugubabaw n'u ka maraw.

⁴⁰A siɲɛ wolonwulanan na, u ye kala la, o sera Dan kɔmɔgɔw ma ka kɛɲɛ n'u ka fadenyabolow ye.

⁴¹Dugu minw tun be u ka mara la, o ye: Soreya ni Ɛsitawɔli ani Irisɛmɛsi,

⁴²Salabin ni Ayalɔn ani Yitila,

⁴³Elɔn ni Timunata ani Ekurɔn,

⁴⁴Ɛliteke ni Gibetɔn ani Baalati,

⁴⁵Yewuda ni Bene Beraki ani Gatirimɔn,

⁴⁶Yarikɔn kɔɔ ni Arakɔn ani o yɔrɔ mara, min be Zafa gɛrɛfɛ.

⁴⁷ Dan kɔmɔgɔw ka mara tun bɔsira u la tuma min na, u tagara Lɛsɛmu kɛlɛ, ka se u kɔrɔ k'u halaki ni murujan ye. U y'o minɛ k'o kɛ u yɛrɛ ta ye ka sigi a kɔnɔ ani k'u bɛma tɔgɔ la a kan ko Dan.

⁴⁸O le ye Dan kɔmɔgɔw ta ye ka kɛɲɛ n'u ka fadenyabolow ye, u ka dugubabaw n'u ka maraw le ye o ye.

⁴⁹Isirayɛlidenw ye jamana nin tilan ka ban tuma min na k'u daanw bɔbɔ, u ye yɔrɔ dɔ di Nun dencɛ Zozuwe ma u cɛma.

⁵⁰Ka kɛɲɛ ni Masaba ka fɔta ye, a tun ye dugu min daali, u y'o d'a ma, o ye Timunata Sera ye, min be Efarayimu mara kuluyɔrɔ la. A y'o dugu nin lalaga k'a lɔ, ka sigi yen.

⁵¹Sarakalasebaga Eleyazari ni Nun dencɛ Zozuwe ani Isirayɛlidenw ka fadenyabolow ɲamɔgɔw ye kala la Masaba ɲakɔrɔ Silo, Ala ni jama ka Ɲɔgɔnkunbɛn fanibugu daa la, ka bɛɛ niyɔrɔ d'a ma ten. O cogo la, u tilara yɔrɔ tilanko la.