Read dyu Zozuwe ka kitabu 20 Bible Online

Zozuwe ka kitabu 20 - dyu bible

Zozuwe ka kitabu 20

¹Masaba y'a fɔ Zozuwe ye ko

² a k'a fɔ Isirayɛlidenw ye ko u ka duguw dɔ woloma k'u sigi k'o kɛ kalifayɔrɔw ye mɔgɔw fɛ, i n'a fɔ a tun y'a ɲini u fɛ Musa barika la cogo min na.

³O la, ni mɔgɔ dɔ y'a tɔɲɔgɔn faga k'a sɔrɔ a tun m'a lawili a kama, a ma tugu k'a kɛ, ale be se ka ta'a yɛrɛ kalifa o duguw dɔ la, u bena kɛ u kalifayɔrɔ ye janko u ka kisi jurusarabaga ma.

⁴O mɔgɔfagala nin bena boli ka taga dugu nunu dɔ la, ka taga lɔ dugu nin donda la, k'a ka koo ɲafɔ o yɔrɔ cɛkɔrɔbaw ye. O kɔ, olu ben'a minɛ ka don n'a ye dugu kɔnɔ ka sigiyɔrɔ d'a ma, a ka to olu fɛ.

⁵Ni jurusarabaga tugur'a kɔ ka na se o yɔrɔ la, u man kan k'a di o tigi ma, bari a m'a lawili a kama. A tɔɲɔgɔn nin tun te a jugu ye ka kɔrɔ.

⁶A bena to o dugu nin kɔnɔ fɔɔ n'a nana lɔ jama ɲakɔrɔ u k'a kiti, ani fɔɔ ka taga se sarakalasebagaw kuntigiba ka saya ma fana, min be baara la o waati la. N'o bɛɛ kɛra ka ban, mɔgɔfagala nin be se ka segi ka ta'a ka dugu la, ka sigi a ka soo kɔnɔ, a tun bolila ka bɔ dugu min kɔnɔ.

⁷U ye Kedɛsi woloma Galile mara la, min be Nɛfutali kuluyɔrɔ la, ani Sisɛmu min be Efarayimu mara kuluyɔrɔ la, ni Kiriyataraba, min ye Eburɔn ye, Zuda mara kuluyɔrɔ la.

⁸Zurudɛn baji kɔfɛ fana, Zeriko kɔrɔn ɲafan na, u ye Bɛsɛri woloma min be kongokolon kɔnɔ, Urubɛn kɔmɔgɔw ka mara kɔkɛnɛ na. U ye Aramɔti woloma Galaadi mara la, Gadi kɔmɔgɔw ka mara kɔnɔ. U fana ye Golan woloma, min be *Basan mara la, Manase kɔmɔgɔw ka mara kɔnɔ.

⁹O dugu nunu le wolomana ka sigi Isirayɛlidenw ye ni lonanw ye u cɛma, janko ni mɔgɔ dɔ y'a tɔɲɔgɔn faga n'a tun m'a lawili a kama, o tigi ka se ka ta'a yɛrɛ kalifa o dugu nunu dɔ la, jurusarabaga kan'a sɔrɔ k'a faga, n'a ma lɔ jama ɲakɔrɔ u k'a kiti.