Read dyu Zozuwe ka kitabu 23 Bible Online

Zozuwe ka kitabu 23 - dyu bible

Zozuwe ka kitabu 23

¹Isirayɛlidenw jugu minw tun be u laminina, Masaba y'u tila ka bɔ olu bolo tuma min na, waati caaman tɛmɛna, o y'a sɔrɔ Zozuwe kɔrɔla kosɔbɛ.

²A ye Isirayɛlidenw bɛɛ lajɛn, u ka cɛkɔrɔbaw, ni ɲamɔgɔw ani kititigɛlaw ni kɛlɛdenw ɲamɔgɔw bɛɛ. A y'a fɔ u ye ko: «Ne kɔrɔla kosɔbɛ.

³Masaba aw ka Ala ye fɛɛn minw bɛɛ kɛ siya nunu bɛɛ la aw kosɔn, aw yɛrɛw y'o ye! Masaba aw ka Ala le tun be to k'aw dɛmɛ kɛlɛ la.

⁴Siya minw tɔɔ tora, ani ne ye minw bɛɛ halaki k'a ta Zurudɛn baji ma, fɔɔ ka taga se kɔgɔjiba ma tileben fɛ, ne ye kala la k'o yɔrɔ bɛɛ tilan aw cɛ ka kɛɲɛ n'aw ka sokalaw ye.

⁵Masaba aw ka Ala bena o tɔɔ nunu gwɛn aw ɲafɛ, aw bena u ka jamana minɛ k'o kɛ aw ta ye, i ko Masaba aw ka Ala y'a fɔ cogo min na aw ye.

⁶Aw ka banba, fɛɛn min fɔra Musa ka sariyasɛbɛ kɔnɔ, aw k'o bato kosɔbɛ, aw kana jɛngɛ ka taga kinibolo la, walima numanbolo la.

⁷Siya minw tora aw cɛma, aw kana jɛn ni olu ye, aw kana u ka joow tɔgɔ wele, aw kana kali n'u tɔgɔ ye fana, aw kana u sɔn, aw kana aw kunbiri gwan u ɲakɔrɔ.

⁸Aw ka nɔrɔ Masaba aw ka Ala la, i n'a fɔ aw tun nɔrɔl'a la cogo min na fɔɔ ka na se bii ma.

⁹Masaba ye siyababaw gwɛn aw ɲafɛ, fanga be minw na, mɔgɔ si ma se ka lɔ aw ɲafɛ fɔɔ ka na se bii ma.

¹⁰ Aw la kelen tun be siya nunu mɔgɔ waa kelen gwɛn, bari Masaba aw ka Ala le tun be n'aw ye ka kɛlɛ nin kɛ, i n'a fɔ a tun y'a fɔ cogo min na.

¹¹Aw ka banba k'aw yɛrɛ minɛ kosɔbɛ, janko aw ka se ka Masaba aw ka Ala kanu.

¹²Nga n'aw bann'a la ka taga nɔrɔ o siya tɔ nunu na, minw be aw cɛma, n'aw furula n'u ye, n'aw jɛnna n'u ye u ka koow la,

¹³aw k'a lɔn ko Masaba aw ka Ala tena to k'o siya nunu gwɛn aw ɲafɛ tugu. U bena kɛ juru ni jaanw ye k'aw minɛ ani ka kɛ golokami ye aw kɔɔ kan, ni ŋɔni ye k'aw ɲaa sɔgɔ, fɔɔ ka taga aw halaki ka ban jamanaɲuman nin kɔnɔ, Masaba aw ka Ala ye min di aw ma.

¹⁴«Sisan, ne be taga diɲɛ mɔgɔw bɛɛ taayɔrɔ la. Aw ka l'a la kosɔbɛ ko Masaba aw ka Ala tun ye kuma diman minw bɛɛ fɔ aw ye, a bɛɛ kɛra ten, a si ma to yen min ma kɛ.

¹⁵Masaba aw ka Ala ye kuma diman minw fɔ aw ye, o bɛɛ kɛra cogo min na, o cogo kelen na, a ye juguman minw fɔ aw kosɔn, o bena kɛ fana, fɔɔ aw bena halaki ka ban jamanaɲuman nin kɔnɔ, a ye min di aw ma.

¹⁶Bɛɛn min be aw ni Masaba aw ka Ala cɛ, a ko aw ka min bato, n'aw y'o cɛn, n'aw tagara joow sɔn k'aw kunbiri gwan u kɔrɔ, Masaba bena dimi aw kɔrɔ, o la, aw bena halaki ka bɔ jamanaɲuman nin kɔnɔ joona.»