Read dyu Zozuwe ka kitabu 24 Bible Online

Zozuwe ka kitabu 24 - dyu bible

Zozuwe ka kitabu 24

¹Zozuwe ye Isirayɛli ka deenw kɔmɔgɔw bɛɛ lajɛn Sisɛmu, k'u ka cɛkɔrɔbaw ni ɲamɔgɔw ani kititigɛlaw ni kɛlɛdenw ɲamɔgɔw wele. U nana lɔ Ala ɲakɔrɔ.

² O kɔ, Zozuwe y'a fɔ u ye ko: «Isirayɛli ka Ala ko: ‹Aw bɛmacɛ Ibrayima facɛ Nawɔri faa Tera tun siginin be Efarati baji kɔfɛ fɔlɔfɔlɔ, u tun be joow le sɔnna yen.

³ Ne ye aw bɛmacɛ Ibrayima wele ka bɔ o baji kɔfɛ, k'a kɛ a ye Kanaan jamana yɔrɔ bɛɛ yaala, ne y'a kɔmɔgɔw jiidi ka Isiyaka d'a ma,

⁴ ka Yakuba ni Ezawu di Isiyaka ma. Ne ye *Seyiri kuluyɔrɔ di Ezawu ma o ka kɛ ale niyɔrɔ ye, nga Yakuba n'a deenw tagara Ezipiti jamana na.

⁵ ‹O kɔ, n ye Musa ni Arɔn ci, n ye Ezipitikaw tɔɔrɔ, o kɔ n y'a kɛ aw bɔra o jamana nin kɔnɔ.

⁶ Ne y'aw faaw bɔ Ezipiti jamana kɔnɔ tuma min na, aw tagara se Buruku kɔgɔji kɔrɔ. Ezipitikaw y'aw faaw kɔɔ gwɛn fɔɔ ka na se kɔgɔji nin daa la ni wotorow ani soow ye.

⁷Aw faaw kulera ne Masaba ma. N y'a kɛ dibi donna Ezipitikaw n'u cɛ, n y'a kɛ kɔgɔji ye Ezipitikaw dumu. Ne ye min kɛ u la, aw y'o ye. Aw fana tora kongokolon kɔnɔ ka waatijan kɛ yen.

⁸ ‹Ne bilara aw ɲa ka na n'aw ye amoriw ka jamana kɔnɔ Zurudɛn baji kɔfɛ. Olu tun wilila ka kɛlɛ kɛ n'aw ye. Ne y'u don aw bolo, ne y'u halaki aw ɲakɔrɔ, aw ye u ka jamana minɛ k'o kɛ aw yɛrɛ ta ye.

⁹ Mowabu masacɛ Balaki, Sipɔri dencɛ, tun wilila ko a be kɛlɛ kɛ ni aw ye. O la, a ye Bewɔri dencɛ Balamu wele, ko ale ka na aw danga.

¹⁰Nga ne ma sɔn ka mɛnni kɛ Balamu fɛ, o la, a ye duba kɛ aw ye, a kɛra ten ne ye aw tila ka bɔ Balaki bolo.

¹¹ ‹O kɔ, aw ye Zurudɛn baji tigɛ ka na se Zeriko. Zerikokaw ye kɛlɛ kɛ n'aw ye, ani amoriw ni periziw ani kanaanw, ni itiw ani girigasiw, ni iviw ani zebuziw. Ne ye olu don aw bolo.

¹² Ne ye dondoli fariman ci, ka amoriw ka masacɛ fila nunu gwɛn ka taga fɔɔ yɔrɔjan, o ma kɛ aw ka murujanjanw ni aw ka kalaw sababu nɔɔ ye.

¹³ Ne ye jamana d'aw ma, aw ma min sɛnɛ, ka duguw di aw ma aw ma minw sigi, aw fana be sigira u kɔnɔ, ne ye *ɛrɛzɛnsunw ni olivuyiriw d'aw ma fana, o ka kɛ aw ka dumuni ye, aw m'o min tutu.› »

¹⁴O kɔ, Zozuwe y'a fɔ u ye ko: «Sisan do aw ka siran Masaba ɲa ka baara kɛ ale ye ni tilenninya ani mɔgɔsɔbɛya ye. Aw faaw tun be joo minw sɔn k'u to Efarati baji kɔfɛ ani Ezipiti jamana na, aw ka olu ta k'u fili, ka Masaba bato.

¹⁵Ni aw y'a ye ko ka Masaba bato, o man di aw ye, aw b'a fɛ ka min bato, aw k'ale woloma bii. Aw faaw tun be joo minw sɔn baji kɔfɛ, u be yen. Aw siginin be amoriw minw ka jamana na, olu taw fana be yen. Ne ni n ka somɔgɔw, anw kɔni bena Masaba le bato.»

¹⁶Jama ye Zozuwe jaabi k'a fɔ k'olu ka Masaba to ka taga joow sɔn, k'o miiriya nin yɔrɔ ka jan olu la.

¹⁷U ko: «Masaba ye an ka Ala ye, ale lo y'anw ni an faaw bɔ jɔnya la Ezipiti jamana na. Ale lo ye kabakobaw kɛ an ɲana, ale lo y'an mara k'an to an ka sira kan an tɛmɛyɔrɔw bɛɛ la, siyaw bɛɛ cɛma.

¹⁸Amori minw tun siginin be jamana nin kɔnɔ, a ye olu gwɛn, ani siyaw bɛɛ. An fana bena Masaba bato, bari an ka Ala lo.»

¹⁹O kɔ, Zozuwe y'a fɔ jama ye tugu ko: «Aw tena se ka Masaba bato, bari Ala ka senu, keliya b'a la, a tena sɔn k'aw ka murutiko n'aw ka hakɛ yafa.

²⁰Tuma min na n'aw ye Masaba to yen ka taga siya wɛrɛw ka joow sɔn, a bena yɛlɛma ka kojugu kɛ aw la, a ka koɲuman kɛnin kɔfɛ. A bena tila k'aw halaki.»

²¹Jama y'a fɔ Zozuwe ye ko ayi, olu bena Masaba le bato.

²²O kɔ, Zozuwe y'a fɔ jama ye ko: «Aw yɛrɛ le y'a fɔ aw yɛrɛ ma, ko aw bena Masaba le bato.» U ye Zozuwe jaabi ko: «Ɔnhɔn, an y'a fɔ.»

²³Zozuwe ko: «Siya wɛrɛw ka joo minw be aw fɛ, aw ka olu fili, ka yɛlɛma Masaba, Isirayɛli ka Ala fɛ n'aw dusu bɛɛ ye.»

²⁴Jama y'a fɔ Zozuwe ye k'olu bena baara kɛ Masaba u ka Ala ye, ani ka mɛnni kɛ a fɛ.

²⁵O loon yɛrɛ la, Zozuwe ni jama ye layidu ta ɲɔgɔn ye, a ye sariya ni landa dɔw sigi u ye Sisɛmu.

²⁶O kɔ, Zozuwe y'o koo sɛbɛn Ala ka sariyasɛbɛ kɔnɔ, ka kabakuru belebele dɔ ta, k'o bila joyiriba dɔ kɔrɔ, Masaba ka sigiyɔrɔ la.

²⁷Zozuwe y'a fɔ jama bɛɛ ye ko: «Kabakuru nin bena kɛ seere ye anw kama, bari Masaba ye kuma minw bɛɛ fɔ anw ye, a y'o mɛn, a bena kɛ seere ye aw kama, janko aw kana kojugu kɛ aw ka Ala ɲakɔrɔ.»

²⁸O kɔ, Zozuwe ye sira di jama ma, u kelen kelen bɛɛ ka taga u ka yɔrɔw la.

²⁹O koow tɛmɛnin kɔ, Masaba ka baarakɛla Nun dencɛ, Zozuwe, sara k'a sii to saan kɛmɛ ni tan.

³⁰ U y'a suu don a ka mara la, Timunata Sera dugu kɔnɔ Efarayimu mara kuluyɔrɔ la, min be Gaasi kulu kɔgɔdugu ɲafan na.

³¹Isirayɛlidenw tun tora ka Masaba bato Zozuwe ka tile bɛɛ la. Zozuwe sanin kɔ, cɛkɔrɔba minw tun be Masaba ka koo kɛta bɛɛ kala ma, Isirayɛlidenw ye Masaba bato olu ka tile la fana.

³² Yakuba tun ye foro min san Sisɛmu facɛ Amori kɔmɔgɔw fɛ warigwɛ kilo kelen ɲɔgɔn, n'o kɛra Yusufu kɔmɔgɔw ta ye, Isirayɛlidenw ye Yusufu kolow sutara o yɔrɔ la, u tun ye minw bɔ Ezipiti jamana na ka na n'u ye.

³³Arɔn dencɛ Eleyazari fana nana sa, kulu min tun dir'a dencɛ Pinasi ma, u y'a suu don yen Efarayimu mara kuluyɔrɔ la.