Read dyu Zozuwe ka kitabu 3 Bible Online

Zozuwe ka kitabu 3 - dyu bible

Zozuwe ka kitabu 3

¹Zozuwe wilila sɔgɔmadafɛ joona ka bɔ Sitimu dugu kɔnɔ ni Isirayɛlidenw bɛɛ ye ka taga. U tagara se Zurudɛn baji daa la, ka la sufɛ o yɔrɔ la, ka sɔrɔ k'a tigɛ.

²Jama ɲamɔgɔw wilila ka taga jama ka sigiyɔrɔ yaala tile saba tɛmɛnin kɔ

³k'a fɔ jama ye ko: «N'aw ye Masaba aw ka Ala ka layidu taamasiɲɛ kɛsu ye Levi kɔmɔgɔ sarakalasebagaw gaman kan tuma min na, aw ka wili ka bɔ aw sigiyɔrɔ la ka tugu a kɔ.

⁴Nga furancɛ min ka kan ka sɔrɔ aw n'a cɛ, o ka kan ka se kilomɛtɛrɛ kelen ɲɔgɔn ma, aw kana gwɛrɛ a la. A bena to ka sira yira aw la, aw bena min ta, bari aw ma o sira nin ta ka ye fɔlɔ.»

⁵Zozuwe y'a fɔ jama ye k'u k'o yɛrɛ saniya bari ko sini, Masaba bena kobabaw kɛ u cɛma.

⁶O kɔ, Zozuwe y'a fɔ sarakalasebagaw ye k'u ka Ala ka layidu taamasiɲɛ kɛsu ta, ka tɛmɛ ka bila jama ɲafɛ. U y'a ta ka tɛmɛ jama ɲafɛ.

⁷Masaba y'a fɔ Zozuwe ye ko: «Bii yɛrɛ, ne ben'a daminɛ ka i kɛ mɔgɔbaba ye Isirayɛlidenw bɛɛ ɲana, janko u k'a lɔn ko ne be n'i ye i n'a fɔ ne tun be ni Musa ye cogo min na.

⁸Sarakalasebaga minw ye ne ka layidu taamasiɲɛ kɛsu ta, i ben'a fɔ olu ye ko n'u sera Zurudɛn baji ma, u ka don ka lɔ a kɔnɔ.»

⁹Zozuwe y'a fɔ Isirayɛlidenw ye ko: «Aw ye gwɛrɛ ka na, ne bena Masaba aw ka Ala ka kuma fɔ aw ye.

¹⁰Aw ben'a lɔn nin le fɛ ko Ala be ni aw ye, ko a bena kanaanw gwɛn aw ɲa, ani itiw ni iviw, ani periziw ni girigasiw, ni amoriw ani zebuziw.

¹¹Masaba min ye dugukolotigi ye, ale ka layidu taamasiɲɛ kɛsu bena tɛmɛ aw ɲafɛ ka don Zurudɛn baji kɔnɔ.

¹²Ayiwa, aw ka mɔgɔ tan ni fila woloma sisan ka bɔ Isirayɛli deenw kɔmɔgɔw cɛma, kɔmɔgɔw o kɔmɔgɔw mɔgɔ kelen.

¹³Sarakalasebaga minw ye dugukolotigi, Masaba ka layidu taamasiɲɛ kɛsu nin ta, ni olu donna Zurudɛn baji kɔnɔ dɔrɔn, Zurudɛn baji bena tigɛ, jii min be bɔ sanfɛyɔrɔ la ka na, ale bena lɔ ka to yɔrɔ kelen na.»

¹⁴O la, jama bɔra u ka sigiyɔrɔ la janko ka taga Zurudɛn baji tigɛ. Sarakalasebaga minw tun ye Ala ka layidu taamasiɲɛ kɛsu ta, olu bilara jama ɲafɛ.

¹⁵U sera Zurudɛn baji daa la k'u seen don jii kɔnɔ tuma min na, o tun kɛra sumantigɛwaati ye, Zurudɛn baji fanin tun be to o waati bɛɛ la fɔɔ ka se a dagolow ma.

¹⁶Jii min tun be bɔ sanfɛla la ka boli ka na, o lɔra yɔrɔ kelen fɔɔ yɔrɔjan na, Adami gɛrɛfɛ, dugu min be Saritan gɛrɛfɛ. Jii min tun be boli ka jigi *Kɔgɔji Fariman faan fɛ, o tigɛra pewu. Jama tɛmɛna baa kɔnɔ ka tilen ni Zeriko dugu ye.

¹⁷Sarakalasebaga minw tun ye Masaba ka layidu taamasiɲɛ kɛsu ta, olu lɔra baa dingɛ cɛmancɛ la a janin, ka Isirayɛlidenw bɛɛ to olu ka tɛmɛ dugukolo janin kan fɔɔ mɔgɔ bɛɛ ye Zurudɛn baji tigɛ ka ban.