Read dyu Zozuwe ka kitabu 6 Bible Online

Zozuwe ka kitabu 6 - dyu bible

Zozuwe ka kitabu 6

¹Zerikokaw tun ye u ka dugu dondaw bɛɛ tugu k'u sɔgɔ ka ɲa Isirayɛlidenw kosɔn. Mɔgɔ tun te bɔ, mɔgɔ te don.

²Masaba y'a fɔ Zozuwe ye ko: «Ayiwa, ne ye Zeriko don i bolo n'a ka masacɛ, ani a ka kɛlɛdenw.

³Aw minw bɛɛ labɛnnin be kɛlɛ kama, aw ka taama ka dugu nin lamini siɲɛ kelen. Aw k'o kɛ ten fɔɔ tile wɔɔrɔ.

⁴Sarakalasebaga mɔgɔ wolonwula bena bila ne ka layidu taamasiɲɛ kɛsu ɲafɛ ni buru fiyɛtaw ye u bolo, minw ye sagagɔn ye. Tile wolonwulanan loon, aw ka taama ka dugu nin lamini siɲɛ wolonwula, ni sarakalasebagaw be to ka buruw fiyɛ.

⁵N'u ye buru nin fiyɛ belebele tuma min na, n'aw y'a mankan mɛn dɔrɔn, jama bɛɛ ka pɛrɛn kosɔbɛ. O la, dugu laminikogo bena ben o yɔrɔnin bɛɛ, mɔgɔ kelen kelen bɛɛ ka tilen ka don dugu kɔnɔ.»

⁶O la, Nun dencɛ Zozuwe ye sarakalasebagaw wele k'a fɔ u ye ko: «Aw ka Masaba ka layidu taamasiɲɛ kɛsu ta, aw la mɔgɔ wolonwula ka buru fiyɛtaw ta ka bila a ɲafɛ.»

⁷O kɔ, a y'a fɔ jama ye ko: «Aw ka tɛmɛ ka taama ka dugu nin lamini, mɔgɔ minw be ni maramafɛnw ye, olu ka tɛmɛ Masaba ka layidu taamasiɲɛ kɛsu ɲafɛ.»

⁸Zozuwe y'o kuma nunu fɔ jama ye cogo min na, u y'a kɛ ten. Sarakalasebaga mɔgɔ wolonwula minw tun be ni buru fiyɛtaw ye u bolo Masaba ɲakɔrɔ, olu y'a daminɛ ka to ka taama n'u be buru nunu fiyɛra. Masaba ka layidu taamasiɲɛ kɛsu tabagaw tugura u kɔ.

⁹Maramafɛnw tun be mɔgɔ minw fɛ, olu tun be taamana sarakalasebagaw buru fiyɛlaw, ɲafɛ, dɔ wɛrɛw tun be taamana Ala ka layidu taamasiɲɛ kɛsu tabagaw kɔ. U tun be buruw fiyɛra n'u be taamana.

¹⁰Zozuwe y'a fɔ jama ye ko: «Aw kana pɛrɛnkan bɔ fɔlɔ, aw kana foyi fɔ, kuma si kana bɔ aw daa la fana, fɔɔ loon min na ni n y'a fɔ aw ye ko aw ka pɛrɛn. Aw be sɔrɔ ka pɛrɛn o waati la.»

¹¹Masaba ka layidu taamasiɲɛ kɛsu tabagaw y'a ta ka dugu nin lamini siɲɛ kelen, o kɔ, jama tagara u sigiyɔrɔ la ka la sufɛ.

¹²O dugusagwɛ sɔgɔmada joona, Zozuwe wilila, sarakalasebagaw ye kɛsu nin ta.

¹³Buru fiyɛta wolonwula tun be sarakalasebaga mɔgɔ wolonwula minw bolo, olu bilara kɛsu nin tabagaw ɲa ka to ka taama n'u be buru nunu fiyɛra. Maramafɛntigiw fana tun be taama u ɲafɛ, ani dɔw fana tun be tugura kɛsu tabagaw kɔ. K'u to taama na, u tun be to ka buru fiyɛ.

¹⁴A kɛra ten, u taamana ka dugu nin lamini a tile filanan loon, o kɔ u kɔsegira ka taga u sigiyɔrɔ la. U y'a kɛ ten tile wɔɔrɔ nunu bɛɛ kɔnɔ.

¹⁵Tile wolonwulanan loon, u wilila sɔgɔmada joona ka dugu nin lamini ten siɲɛ wolonwula. O loon kelen dama le la, u ye dugu nin lamini siɲɛ wolonwula.

¹⁶U y'a lamini siɲɛ wolonwulanan na ka ban tuma min na, u ye buru fiyɛ, Zozuwe y'a fɔ jama ye ko: «Aw ka pɛrɛn, bari Masaba ye dugu nin don aw bolo!

¹⁷Dugu nin bena halaki, a kɔnɔnafɛnw bɛɛ be kɛ Masaba ta ye, nga kakalamuso Araabu ni mɔgɔ minw bɛɛ be ale ka soo kɔnɔ, olu tena halaki, bari a ye an ka cidenw dogo.

¹⁸Fɛɛn minw ka kan ka bila Ala ye, aw k'aw yɛrɛ kɔlɔsi u la, bari n'aw ye dugu halaki ka dɔ ta fɛɛn nunu na, aw bena kɛ sababu ye ka Isirayɛlidenw bila kojugu la, a kɛra ten u bena tɔɔrɔ sɔrɔ.

¹⁹Warigwɛ min bena sɔrɔ ani sanu, ni minan ziralaman ani nigɛlaman, olu bɛɛ bena kɛ Masaba ta ye, u bena mara a ye a ka soo kɔnɔ.»

²⁰ Jama pɛrɛnna, sarakalasebagaw ye buruw fiyɛ. Jama ye buruw fiyɛkan mɛn dɔrɔn, u pɛrɛnna kosɔbɛ, dugu laminikogo benna, mɔgɔ kelen kelen bɛɛ tilenna ka don dugu kɔnɔ. U ye dugu nin minɛ.

²¹Fɛɛn minw bɛɛ tun be dugu nin kɔnɔ, u y'o bɛɛ halaki ni murujan ye, a cɛɛ fara musow kan, denmisɛnw ni mɔgɔkɔrɔbaw, misiw ni sagaw ni faliw.

²²Mɔgɔ fila minw tun tagara jamana nin kɔlɔsi, Zozuwe y'a fɔ olu ye ko: «Aw ye don kakalamuso nin ka soo k'a minɛ ka bɔ n'a ye, fɛɛn minw bɛɛ y'a ta ye, aw ka bɔ n'o bɛɛ ye, ka kɛɲɛ n'aw ka kalili ye.»

²³Kanbelen minw tun tagara yɔrɔ kɔlɔsi, olu donna Araabu ka soo kɔnɔ k'a minɛ ka bɔ n'a ye, ani a facɛ n'a bamuso, ani a badenw, ni fɛɛn o fɛɛn kɛr'a ta ye. U y'a ka somɔgɔw bɛɛ minɛ ka bɔ n'u ye ka taga u bila u ka sigiyɔrɔ gɛrɛfɛ.

²⁴O kɔ, u ye dugu nin bɛɛ jɛni a n'a kɔnɔnafɛnw bɛɛ. Warigwɛ ni sanu ani fɛɛn minw bɛɛ dilanna ni zira, ani nigɛ yɛrɛ ye, u ye olu bɛɛ mara Masaba ye a ka soo kɔnɔ.

²⁵ Zozuwe ye kakalamuso Araabu to u m'a faga, ani a ka somɔgɔw ni fɛɛn minw bɛɛ kɛr'a ta ye. A tora Isirayɛlidenw cɛma fɔɔ ka na se bii ma, bari Zozuwe tun ye yɔrɔkɔlɔsibaga minw ci ka Zeriko kɔlɔsi, a tun ye olu dogo.

²⁶ O tuma na, Zozuwe kalila k'a fɔ ko: «Ni mɔgɔ min wilila ko ale bena Zeriko lalaga k'a lɔ, o tigi danganin lo Masaba ɲakɔrɔ. O tigi ben'a denkɔrɔba le kɛ saraka ye fɔlɔ, ka sɔrɔ ka dugu nin juu sigi, ani k'a dencɛ laban kɛ saraka ye ka sɔrɔ ka koon don dugu dondaw la.»

²⁷Masaba tora Zozuwe fɛ, fɔɔ a tɔgɔ bɔra ka se jamana nin yɔrɔ bɛɛ la.