Read dyu Zozuwe ka kitabu 7 Bible Online

Zozuwe ka kitabu 7 - dyu bible

Zozuwe ka kitabu 7

¹Fɛɛn minw tun bilara ka kɛ Masaba ta ye, Isirayɛlidenw ye kojugu kɛ olu koo la. Zuda kɔmɔgɔ Zera deen Zabidi dencɛ Karimi deen Akan tun y'o fɛɛn nunu dɔw ta, o la, Masaba dimina Isirayɛlidenw kɔrɔ.

²Zozuwe ye mɔgɔ dɔw ci k'u to Zeriko k'u ka taga Ayi, min be Bɛtavɛni gɛrɛfɛ Betɛli kɔrɔn ɲafan na. A y'a fɔ u ye ko: «Aw ye taga jamana nin ka koow kɔlɔsi.» Mɔgɔ nunu tagara Ayi dugu kɔlɔsi.

³Ciden nunu kɔsegira Zozuwe fɛ k'a fɔ a ye ko: «Kuun t'a la i k'a to jama bɛɛ ka taga o yɔrɔ la, mɔgɔ waa fila walima waa saba be se ka Ayi kɛlɛ. I kana jama bɛɛ sigɛn o la, bari u man ca.»

⁴O la, mɔgɔ waa saba ɲɔgɔn wilila ka taga k'u be Ayi kɛlɛ, nga u bolila Ayikaw ɲa.

⁵Ayikaw ye mɔgɔ bi saba ni wɔɔrɔ ɲɔgɔn faga u cɛma, k'u gwɛn k'a ta dugu donda la fɔɔ ka na se n'u ye Sebarimu mara la, ani ka taga u faga tintin jigiyɔrɔ la. Jama hakili ɲagamina fɔɔ u jigi tigɛra kosɔbɛ.

⁶O la, Zozuwe y'a ka faniw faran k'a kunbiri gwan, k'a ɲaa biri duguma Masaba ka layidu taamasiɲɛ kɛsu ɲafɛ, fɔɔ ka taga se wulafɛ ma, ale ni Isirayɛli cɛkɔrɔbaw, u ye buguri kɛ u yɛrɛ kuun na.

⁷A y'a fɔ ko: «Ee! Matigi, Masaba, mun na i y'a to jama nin ye Zurudɛn baji tigɛ? Janko k'an don amoriw bolo u k'an halaki wa? Aa! Ni an tun tora Zurudɛn baji kɔfɛ, o tun ka fisa!

⁸Matigi, makari an na, ne bena mun le fɔ sa, Isirayɛlidenw bolinin kɔ u juguw ɲa?

⁹Kanaanw ni jamana nin kɔnɔ mɔgɔw bɛɛ bena o mɛn, u bena wili ka na an datugu k'an sii ban pewu dugukolo kan. O tuma na, i bena mun le kɛ i tɔgɔba nin kosɔn?»

¹⁰Masaba y'a fɔ Zozuwe ye ko: «Wili! Mun na i birila duguma?

¹¹Isirayɛlidenw ye hakɛ kɛ, ne tun bɛnna n'u ye ko u ka koo min kɛ, u m'o kɛ, fɛɛn minw bilara ne ye, u y'u dɔw soɲa k'u dogo u ka minanw jukɔrɔ.

¹²O kama, Isirayɛlidenw tena se ka lɔ u juguw ɲa tugu, u bena to ka boli le, bari u be halaki sira kan. Ne tena to u fɛ tugu n'u ma sɔn k'o kojugu nin dabila.

¹³Wili ka jama labɛn u k'u yɛrɛ saniya. A fɔ u ye ko: ‹Aw k'aw yɛrɛ saniya sini kama, bari Masaba, Isirayɛli ka Ala y'a fɔ ko fɛɛn minw bilara ka kɛ ale ta ye, u dɔ be aw Isirayɛlidenw bolo, o kama, aw tena se ka lɔ aw juguw ɲafɛ n'o fɛɛn nunu b'aw fɛ.

¹⁴Sini sɔgɔma aw bena to ka gwɛrɛ ka na Masaba ɲakɔrɔ kɔmɔgɔ kɔmɔgɔ, Masaba mana kɔmɔgɔw min yira, o kɔmɔgɔ nunu ka mɔgɔw bena to ka gwɛrɛ gwatigi gwatigi, Masaba mana gwatigi min yira, ale kɔmɔgɔw bena to ka gwɛrɛ faden faden, Masaba mana faden minw yira fana, o faden nunu bena gwɛrɛ kelen kelen.

¹⁵Mɔgɔ kelen min mana yira o tuma na, ko ale lo ye fɛɛn nunu ta, o tigi bena jɛni, ale n'a bololafɛnw bɛɛ, bari a ye Masaba ka bɛɛn cɛn ka kojugu kɛ Isirayɛlidenw cɛma.› »

¹⁶Dugu gwɛra, sɔgɔmada joona, Zozuwe wilila ka Isirayɛlidenw labɛn, u tora ka gwɛrɛ kɔmɔgɔ kɔmɔgɔ, a kɛra ten Zuda kɔmɔgɔw yirala.

¹⁷Olu tora ka gwɛrɛ gwatigi gwatigi, Zera ta yirala, a fana y'a to olu gwɛrɛla faden faden, Zabidi ka soo yirala.

¹⁸Olu tora ka gwɛrɛ kelen kelen, Zuda kɔmɔgɔ Zera deen Zabidi dencɛ Karimi deen Akan yirala.

¹⁹O tuma na, Zozuwe y'a fɔ Akan ye ko: «N deen, boɲa la Masaba, Isirayɛli ka Ala kan k'a tanu. I ye koo o koo kɛ, o fɔ ne ye, i kana foyi dogo ne la.»

²⁰O la, Akan y'a fɔ Zozuwe ye ko: «Tiɲɛ lo, ne ye Masaba, Isirayɛli ka Ala hakɛ ta. Ne ye koo minw kɛ, olu filɛ nin ye.

²¹Ne tun ye Babilɔni jamana forocaɲuman dɔ ye dugu mɔgɔ nunu ka minanw kɔnɔ, ani warigwɛ kuru kɛmɛ fila, ani sanukuru min ka gwiliya tɛmɛna kilo tilan kelen kan. Olu nigɛ tun ye ne minɛ, o la ne y'u ta ka taga dugukolo sogi n ka siyɔrɔ la k'u dogo yen, warigwɛ nin be fɔɔ jukɔrɔ.»

²²Zozuwe ye mɔgɔ dɔw ci yen, olu bolila ka taga se a ka fanibugu kɔnɔ. U ye minan nunu ye, u tun dogonin be a ka fanibugu kɔnɔ, warigwɛ tun be fɔɔ jukɔrɔ.

²³U ye minan nunu ta fanibugu nin cɛma ka na n'u ye Zozuwe fɛ Isirayɛlidenw bɛɛ ɲana, k'u bila Masaba ɲakɔrɔ.

²⁴O kɔ, Zozuwe ni Isirayɛlidenw bɛɛ ye Zera dencɛ Akan minɛ, ka warigwɛ nin ta, ani foroca, ni sanu, ka Akan deen cɛmanw ni musomanw minɛ, k'a ka misiw, ni faliw, ani a ka begɛnmisɛnw minɛ, n'a ka fanibugu n'a bololafɛnw bɛɛ, ka taga n'u ye Akɔri kɔkɛnɛ la.

²⁵Zozuwe y'a fɔ a ye ko: «Mun na i ye an sigɛn ten? Masaba fana bena ele sigɛn bii.» O kɔ, Isirayɛlidenw bɛɛ ye kabakuruw ta k'a bon ka faga, n'a kɔmɔgɔw, k'u jɛni.

²⁶U ye kabakuruw cɛ k'o ton Akan jɛniyɔrɔ la, o kabakuruton nin be yen halibi. A kɛra ten, Masaba ka dimi banna. O sababu le y'a to u be o yɔrɔ nin wele halibi ko Akɔri kɔkɛnɛ. [1]