Read dyu Zozuwe ka kitabu 8 Bible Online

Zozuwe ka kitabu 8 - dyu bible

Zozuwe ka kitabu 8

¹O kɔ, Masaba y'a fɔ Zozuwe ye ko: «I kana siran, i jaa kana tigɛ. I ka kɛlɛdenw bɛɛ minɛ ka wili ka taga Ayi dugu kɛlɛ. Ne be Ayi masacɛ, ni dugu mɔgɔw, ni dugu nin yɛrɛ, an'a mara don i bolo.

²Aw ye min kɛ Zeriko dugu n'a masacɛ la, aw k'o ɲɔgɔn kɛ Ayi, n'a masacɛ la fana. Nga aw be se k'u bololafɛnw ta k'u kɛ aw yɛrɛ taw ye ani begɛnw fana. Aw ka kɛlɛdenw dogo dugu nin kɔfɛ.»

³O la, Zozuwe wilila ka kɛlɛdenw bɛɛ lajɛn, ka taga Ayi kama. A tun ye kɛlɛden fariman mɔgɔ waa bi saba le woloma ka olu bila ka taga sufɛ.

⁴A tun y'a fɔ u ye ko: «N'aw tagara se, aw ka dogo dugu kɔfɛ, aw kan'a to aw yɔrɔ be jaɲa dugu nin na, aw labɛnnin ka to.

⁵Ne ni jama tɔɔ bena gwɛrɛ dugu nin na kosɔbɛ fɔlɔ, n'u bɔra k'an kunbɛn i ko fɔlɔ, an bena boli u ɲa.

⁶U bena tugu an kɔ, fɔɔ an b'u nigɛnigɛ ka taga n'u ye yɔrɔjan, bari u ben'a fɔ ko: ‹U be bolila an ɲa i n'a fɔ fɔlɔfɔlɔ tugu.› An bena to ka boli u ɲa.

⁷O tuma na, aw ka bɔ aw ka dogoyɔrɔ la, ka dugu nin minɛ, o la Masaba aw ka Ala bena dugu nin don aw bolo.

⁸N'aw ye dugu nin minɛ ka ban tuma min na, aw k'a jɛni. O la, aw bena Masaba ka kuma bato. O le be ne fɛ k'a fɔ aw ye.»

⁹Zozuwe y'u bila ka taga, u tagara dogo Betɛli ni Ayi furancɛ la a tileben faan na. Zozuwe tora ni jama ye o suu la.

¹⁰Sɔgɔma joona, Zozuwe wilila ka jama lajɛn k'u kɔlɔsi, o kɔ a bilara jama ɲafɛ ni Isirayɛlidenw ka cɛkɔrɔbaw ye ka taga Ayi kama.

¹¹Kɛlɛden minw bɛɛ tun be n'a ye, olu tagara ka gwɛrɛ kosɔbɛ, u sera dugu nin ɲafɛ tuma min na, u sigira Ayi kɔgɔdugu ɲafan na, kɔbolo tun be u ni ɲɔgɔn cɛ.

¹²Zozuwe tun ye mɔgɔ waa duuru ɲɔgɔn lajɛn ka taga olu dogo Betɛli ni Ayi furancɛ la, Ayi tileben faan na.

¹³Kɛlɛden caaman sigira dugu kɔgɔdugu ɲafan na, dɔw tagara dogo dugu nin tileben faan na. O suu yɛrɛ la, Zozuwe tagara fɔɔ kɔkɛnɛ nin cɛmancɛ la.

¹⁴Ayi masacɛ y'o ye tuma min na, Ayikaw wilila joona joona ka bɔ ka taga Isirayɛlidenw kunbɛn, janko u k'u kɛlɛ. U bɔra k'u ɲaa sin yɔrɔ kelen ma, kɔbolo faan na, u tun m'a lɔn ko kɛlɛden dɔw dogonin be dugu kɔfɛ u kama.

¹⁵Zozuwe ni Isirayɛlidenw bɛɛ y'a kɛ i n'a fɔ Ayika nunu sera u kɔrɔ ka ban. U ye boli daminɛ k'u ɲaa sin kongokolon faan fɛ.

¹⁶O la, dugumɔgɔw bɛɛ ye ɲɔgɔn lajɛn janko ka Zozuwe kɔɔ gwɛn. U tugur'a kɔ fɔɔ ka janfa dugu la kosɔbɛ.

¹⁷Cɛɛ si ma to Ayi ni Betɛli kɔnɔ min ma bɔ ka taga Isirayɛlidenw kama. U tun y'u ka dugu dondaw yɛlɛnin to, ka bɔ ka taga tugu Isirayɛlidenw kɔ.

¹⁸O kɔ, Masaba y'a fɔ Zozuwe ye ko: «Taman min b'i bolo, o wili k'a sin Ayi ma, bari ne ben'a don i bolo.» Zozuwe y'a ka taman wili k'a sin dugu nin ma.

¹⁹A y'o kɛ dɔrɔn, kɛlɛden minw tun dogonin be, olu bɔra u ka dogoyɔrɔ la teliya la ka girin ka don dugu nin kɔnɔ k'a minɛ, ka tasuma mana a kan joona joona.

²⁰Ayikaw ye filɛli kɛ u kɔfɛ, u ye dugu sisi wilitɔ ye. U si ma se ka boliyɔrɔ sɔrɔ ka taga faan si la bari jama min tun be bolila u ɲa ka taga kongokolon faan fɛ, olu yɛlɛmana ka lɔ u gwɛnbagaw kama.

²¹Zozuwe ni Isirayɛlidenw bɛɛ y'a ye ko kɛlɛden minw tun dogora, olu ye dugu nin minɛ tuma min na, ani u ye sisi wilitɔ ye dugu nin kɔnɔ, u tun yɛlɛmana ka Ayikaw kɛlɛ.

²²Kɛlɛden dɔ nunu fana bɔra dugu kɔnɔ ka na u kunbɛn, a kɛra ten, Ayikaw tora Isirayɛlidenw cɛma. U ye Ayika nunu faga, u ma mɔgɔ kelen yɛrɛ to, hali kelen yɛrɛ ma se ka boli.

²³U ye Ayi masacɛ minɛ ka na n'a ye Zozuwe fɛ.

²⁴Ayika minw tun tugura Isirayɛlidenw kɔ kongokolon kɔnɔ, u ye olu bɛɛ faga ka ban pewu tuma min na ni murujan ye, u bɛɛ lajɛnnin kɔsegira ka na Ayi dugu halaki ni murujan ye.

²⁵Mɔgɔ waa tan ni fila (12 000) le fagara o loon na, cɛɛ ni musow, Ayikaw bɛɛ.

²⁶Zozuwe tun y'a bolo min wili k'a sin dugu nin ma, ni taman b'a la, a m'o bolo nin jigi fɔɔ u ye dugu nin kɔnɔ mɔgɔw bɛɛ halaki ka ban tuma min na.

²⁷Isirayɛlidenw ye begɛnw ni dugu nin kɔnɔ nafolo ta k'o kɛ u yɛrɛ taw ye i ko Masaba tun y'a fɔ Zozuwe ye cogo min na.

²⁸Zozuwe ye Ayi jɛni k'a kɛ tomo ye. Halibi a be ten.

²⁹Zozuwe ko u ka Ayi masacɛ dulon yiri la. A tora yiri kan fɔɔ wulafɛ. Tilekun be donna tuma min na, a ye sira di ko u k'a suu jigi ka bɔ yiri la. U tagar'a fili dugu nin donda la, ka kabakuruw cɛ k'o ton a kan, o be yen halibi.

³⁰ Zozuwe ye sarakabɔyɔrɔ lɔ Ebali kulu kan Masaba ye, Isirayɛli ka Ala,

³¹ i ko Masaba ka baarakɛla Musa tun y'a fɔ Isirayɛlidenw ye cogo min na, ani a fɔra cogo min na Musa ka sariyasɛbɛ kɔnɔ. Sarakabɔyɔrɔ nin lalagara ni kabakuru tomonin ye, nigɛ ma kɛ ka min ci. U ye saraka jɛnitaw ni jɛnɲɔgɔnya sarakaw bɔ Masaba ye o yɔrɔ la.

³²Musa tun ye sariya min sɛbɛn, Zozuwe y'o sɛbɛn kabakuru dɔw kan Isirayɛlidenw ɲana o yɔrɔ la.

³³ Isirayɛlidenw bɛɛ, dugulen fara lonanw kan, n'u ka cɛkɔrɔbaw, n'u ɲamɔgɔw, ani u ka kititigɛlaw, u bɛɛ tun lɔra ka Masaba ka layidu taamasiɲɛ kɛsu to u cɛma, n'a tabaga Levi kɔmɔgɔ sarakalasebagaw. Masaba ka baarakɛla Musa tun y'a fɔ cogo min na, ko n'u be duba kɛ Isirayɛli jama ye tuma min na, u k'a kɛ cogo min na, o y'a kɛ ten. U tun tilanna fila, tilan kelen lɔra Garizimu kulu faan na, dɔ nin lɔra Ebali kulu faan na.

³⁴O kɔ, Zozuwe ye sariyasɛbɛ nin kɔnɔnakuma bɛɛ kalan, duba ni danga ta.

³⁵Musa tun ye fɛɛn minw bɛɛ sɛbɛn, Zozuwe y'o bɛɛ kalan Isirayɛli jama bɛɛ ɲana, a ma foyi to. Musow tun be yen, ni denmisɛnw ani lonan minw tun be u cɛma.