Read dyu Zozuwe ka kitabu 9 Bible Online

Zozuwe ka kitabu 9 - dyu bible

Zozuwe ka kitabu 9

¹Masacɛ minw bɛɛ tun be Zurudɛn baji faan dɔ la kuluyɔrɔw ni kulujukɔrɔ mara la, ani minw tun be kɔgɔjida la fɔɔ ka taga se Liban gɛrɛfɛ, minw ye itiw ni amoriw ani kanaanw ni periziw ani iviw ni zebuziw ka masacɛw ye, olu y'o koow kibaru mɛn.

²U ye ɲɔgɔn lajɛn k'u daa kɛ kelen ye janko u ka Zozuwe ni Isirayɛlidenw kɛlɛ fana.

³Zozuwe ye koo minw kɛ Zeriko ni Ayi dugu la, Gabaŋɔnkaw y'o mɛn minkɛ,

⁴u ye namara siri. U ye bɔrɔkɔrɔw ta k'o la u ka faliw kan ka duvɛnforoko kɔrɔmanw fana ta minw faranna n'u y'u kalan.

⁵U ye sanbarakɔrɔw don minw tun tigɛtigɛra ka kalan, ka fanikɔrɔw don u kaan na. U ka buru bɛɛ janin tun lo kakaka fɔɔ o bɛɛ karikarila.

⁶U tagara Zozuwe ni Isirayɛlidenw fɛ u sigiyɔrɔ la Giligali k'a fɔ u ye ko: «An bɔra jamana dɔ la min yɔrɔ ka jan, an b'a ɲini i fɛ, i ka to an be bɛn.»

⁷ Isirayɛlidenw y'a fɔ ivi nunu ye ko: «N'a sɔrɔ aw yɛrɛ siginin be anw cɛma. An be se ka bɛn n'aw ye cogo di?»

⁸U y'a fɔ Zozuwe ye k'olu kɛr'a ta ye. O la, Zozuwe y'a fɔ u ye ko: «Aw ye jɔnw le ye? Aw bɔra min le?»

⁹U y'a jaabi ko: «An kɛra e ta ye, an bɔyɔrɔ ka jan kosɔbɛ. An nana Masaba e ka Ala tɔgɔ kama, bari a ye koo minw bɛɛ kɛ Ezipiti jamana na, an y'o mɛn.

¹⁰ A ye amoriw ka masacɛ fila nunu kɛ cogo min na Zurudɛn baji kɔfɛ, an y'o mɛn, minw ye Ɛsibɔn masacɛ Siyɔn ye, ni *Basan masacɛ Ɔgi, min tun be Asitarɔti.

¹¹O la, an ka cɛkɔrɔbaw ni an ka jamanadenw bɛɛ y'a fɔ an ye ko an ka sira kan dumuni ta ka na aw fɛ, k'a fɔ aw ye ko an kɛra aw ta ye, ko aw ka bɛn n'an ye.

¹²An ka buru filɛ, an tun be bɔ soo loon min na, buru nunu tun gwannin lo, nga sisan u jara fɔɔ ka to ka karikari.

¹³An ka duvɛnforoko minw tun ye kuraw ye, n'an ye u fa duvɛn na, olu faranfarannin filɛ, an ka faniw, n'an ka sanbaraw bɛɛ cɛnna taamajan kosɔn.»

¹⁴Isirayɛlidenw y'u ka sira kan dumuni nunu dɔ minɛ, u ma Masaba ɲininga.

¹⁵Zozuwe bɛnna n'u ye k'a fɔ u ye ko kɛlɛ t'u cɛ tugu, ko a tena u faga. Jama ɲamɔgɔw kalila u ye.

¹⁶Tile saba u bɛnnin kɔ, Isirayɛlidenw y'a mɛn ko lo u sigiɲɔgɔnw, k'u siginin be u cɛma.

¹⁷O la, Isirayɛlidenw ye sira ta ka taga se u ka duguw la tile sabanan loon na, u ka dugu minw tun ye Gabaŋɔn ni Kefira ni Berɔti ani Kiriyatayimu ye.

¹⁸U ma sɔn k'u faga, bari jama ɲamɔgɔw tun kalila u ye, Masaba, Isirayɛli ka Ala tɔgɔ la k'u tena u faga. Nga jama bɛɛ tun be ŋunuŋunu ɲamɔgɔw kama.

¹⁹O la, ɲamɔgɔw bɛɛ y'a fɔ jama ye ko: «An tun kalila u ye Masaba, Isirayɛli ka Ala tɔgɔ la minkɛ, an te se ka foyi kɛ u la tugu.

²⁰An bena fɛɛn min kɛ u la o filɛ: An tena u faga, janko Ala kana dimi an kɔrɔ, an ka kalili kosɔn.

²¹An tena u faga. Nga u bena kɛ an ka lɔgɔɲinibagaw ani jitalaw ye, ka to k'o kɛ jama bɛɛ ye.» Ɲamɔgɔw y'o le latigɛ.

²²O kɔ, Zozuwe y'u wele k'a fɔ u ye ko: «Mun na aw ye an namara ten k'a fɔ ko aw bɔra yɔrɔjan na, ka sɔrɔ aw siginin be an cɛma yɛrɛ?

²³Sisan kɔni aw danganin be, aw bena kɛ an ta ye tuma bɛɛ, aw bena to ka lɔgɔ ɲini ka to ka jii ta ka na n'a ye ne ka Ala batoso kɔnɔ tuma bɛɛ.»

²⁴U ye Zozuwe jaabi ko: «Masaba e ka Ala tun ye kuma min fɔ a ka baarakɛla Musa ye, ko a bena jamana nin bɛɛ don aw bolo, ani k'a kɔnɔ mɔgɔw bɛɛ halaki, i ka baaradenw y'o mɛn, aw fana ye an jaa tigɛ ka siranya bila an na, o le y'a to an y'a kɛ ten.

²⁵Sisan an b'i bolo, i b'a fɛ ka fɛɛn min kɛ an na, i ka o kɛ an na.»

²⁶Zozuwe y'u minɛ i n'a fɔ a tun latigɛra cogo min na, a ma sɔn Isirayɛlidenw k'u faga,

²⁷nga kabini o loon na, a y'u bila lɔgɔɲini, ni jita la jama ye, ani sarakabɔyɔrɔ la, Masaba bena yɔrɔ min woloma. U b'o baara le kɛra halibi.