Read dyu Timote fɔlɔ 1 Bible Online

Timote fɔlɔ 1 - dyu bible

Timote fɔlɔ 1

¹Ne Pɔli min kɛra Yezu Krista ka ciden ye an Kisibaga Ala sago barika la ani Yezu Krista barika la, min kɛra an jigi ye,

² ne be bataki nin ci Timote ma, e min kɛra ne deen tigitigi ye lanaya barika la. An Faa Ala, n'an Matigi Yezu Krista ka makari i la, ka nɛɛma ni hɛrɛ kɛ i ye.

³Ne taatɔ Maseduwani mara la, ne tun y'a ɲini e fɛ ko i ka to Efɛzi, waasa kalanjugu be minw daa la, i k'a fɔ u ye k'u k'o dabila.

⁴U be fɔlɔfɔlɔko minw fɔ u kunfɛ ani mɔgɔw buruju fɔko, i k'a fɔ u ye k'u k'o dabila, o be sɔsɔli le caya. Ala sago te se ka kɛ ten, a be se ka kɛ lanaya le barika la.

⁵O ladikun ye min ye, o ye ka kanuya sɔrɔ min be bɔ dusu gwɛnin na, ni miiriɲuman na, ani jigisɔbɛ la.

⁶Mɔgɔ dɔw jɛngɛna ka bɔ o sira kan k'u yɛrɛ lafili ni kuma fufafu ye.

⁷U b'u yɛrɛ kɛ sariya karamɔgɔw ye, nga u be kuma min fɔra, n'u lanin be u yɛrɛ la o kuma nin la, u t'o faamu.

⁸An b'a lɔn ko sariya ka ɲi ni mɔgɔw b'a bato ka ɲa.

⁹An k'a faamu fana ko sariya ma sigi mɔgɔɲumanw kama, nga a sigira banbagaw le kama, ni mɔgɔmurutininw, mɔgɔjuguw, hakɛkɛlaw, Alaɲasiranbaliw, ani minw be Ala tɔgɔ cɛn, ni minw be u faa, walima u baaw faga, ni mɔgɔfagalaw,

¹⁰kakalaw, ani cɛɛ minw be ɲɔgɔn ɲini i n'a fɔ cɛɛ ni muso, mɔgɔjagolaw, galontigɛlaw, minw be kali fu, ani mɔgɔ minw ka kɛta te bɛn ni kalanɲuman ye.

¹¹O kalan nin be sɔrɔ nɔɔrɔtigi Ala ka kibaru diman kɔnɔ, a y'o min fɔko kalifa ne ma.

¹²Ne be barika la an Matigi Yezu Krista ye, ale min ye fanga di n ma. A ye ne jati mɔgɔsɔbɛ ye ka n don a ka baara la.

¹³ Fɔlɔfɔlɔ ne min tun b'a tɔgɔ cɛn, ka Alaɲasiranbagaw tɔɔrɔ, ani ne tun ka fari, nga o bɛɛ n'a ta a makarila ne la, bari ne ka lanabaliya ni kolɔnbaliya le kosɔn, ne tun be o kɛra.

¹⁴An Matigi ye nɛɛma kɛ ne ye kosɔbɛ, ka lanaya ni kanuya di ne ma min be sɔrɔ Yezu Krista ka jɛnɲɔgɔnya fɛ.

¹⁵Nin kuma ye tiɲɛ ye mɔgɔ bɛɛ ka kan ka sɔn min ma: Yezu Krista nana diɲɛ na waasa ka hakɛkɛlaw kisi. Ne tun ka jugu olu bɛɛ cɛma.

¹⁶Ne min tun ka jugu u bɛɛ cɛma, ni Ala hinɛna ne la, a b'a fɛ Yezu Krista k'a ka ɲumanya le yira k'o kɛ taamasiɲɛ ye mɔgɔw fɛ, olu minw bena la ale la ka nii banbali sɔrɔ.

¹⁷Boɲa ni tanuli ka kɛ tuma bɛɛ waati bɛɛ Masa Ala yebali ye, ale min te sa, ale min kelen ye Ala ye. Amiina.

¹⁸Ne dencɛ Timote, ne b'a gwɛlɛya i ma ko i ka jija ka baaraɲuman kɛ ka kɛɲɛ ni kirayakuma ye min tun fɔra i ka koo la ka tɛmɛ.

¹⁹I k'o kɛ ni lanaya, ni dusuɲuman ye. Mɔgɔ dɔw dɛsɛra o la, o kama u benna.

²⁰Imene ni Alɛkisandiri seen b'o la, ne ye olu minw to Sutana bolo waasa u k'a faamu k'u man kan ka Ala tɔgɔ cɛn.