Read dyu Timote fɔlɔ 3 Bible Online

Timote fɔlɔ 3 - dyu bible

Timote fɔlɔ 3

¹Nin kuma nin ye tiɲɛ ye: ni mɔgɔ dɔ b'a fɛ ka kɛ Ala ka jama ɲamɔgɔ ye, o tigi ye baaraɲuman le woloma.

²Ɲamɔgɔ ka kan ka kɛ mɔgɔɲuman ye, jalakiyɔrɔ man kan ka sɔrɔ a la, musokelentigi, hakilitigi, mɔgɔ min b'a ka koo bɛɛ kɛ ka kɛɲɛ. A ka kɛ mɔgɔ ye min be lonanw ladon, ani ka se ka mɔgɔw kalan.

³A man kan ka kɛ dɔrɔtɔ ye, walima mɔgɔ fariman, nga mɔgɔsabalinin. A kana kɛ kɛlɛtigɛla ye, walima mɔgɔ ye min be wari kanu.

⁴A ka kan ka kɛ mɔgɔ ye min be se k'a yɛrɛ ka soo mara, ani k'a deenw kolo n'u be mɛnni kɛ a fɛ koo bɛɛ la.

⁵Bari mɔgɔ min te se k'a yɛrɛ ka somɔgɔw mara, minw lara Ala la o tigi bena se k'olu mara cogo di?

⁶A kana kɛ tuubidenkura ye fana Krista ka jama cɛma, waasa yɛrɛboɲa kana don a la ka kɛ sababu ye Sutana ka jalaki ɲɔgɔn ka se a ma.

⁷ A ka kɛ mɔgɔ ye min tɔgɔɲuman be fɔ mɔgɔ wɛrɛw fɛ, waasa a kana dɔgɔya sɔrɔ ka ben Sutana ka jɔɔ la.

⁸Krista ka jama ɲamɔgɔw dɛmɛbagaw ka kan ka kɛ mɔgɔsɔbɛw ni kumakelentigiw ye, u man kan ka kɛ dɔrɔtɔw ye, walima mɔgɔ minw be tɔnɔ ɲini tilenbaliya la.

⁹Tiɲɛ min be lɔn lanaya barika la, u ka kan ka to o kan ni hakiliɲuman ye.

¹⁰A bɛnnin be k'u sɛgɛsɛgɛ fɔlɔ. Ni jalakiyɔrɔ ma sɔrɔ u la, o tuma na, u be se ka don o baara la.

¹¹Muso minw b'a fɛ k'o baara ɲɔgɔn kɛ fana, olu ka kan ka kɛ mɔgɔsɔbɛw ye. U kana kɛ mɔgɔ tɔgɔcɛnbagaw ye. U ka kan k'u yɛrɛ kɔlɔsi kosɔbɛ ani ka tilenninya kɛ koo bɛɛ la. [1]

¹²Krista ka jama ɲamɔgɔw dɛmɛbaga ka kan ka kɛ musokelentigi ye, min be se k'a ka soo mara ani a ka denbaya.

¹³Mɔgɔ min b'o baara kɛ ka ɲa, o tigi be tɔgɔɲuman sɔrɔ a ka ɲamɔgɔya la, ani a be jagwɛlɛya sɔrɔ ka jigi koo fɔ, an be min sɔrɔ Yezu Krista fɛ.

¹⁴Ne be bataki nin ci i ma, ne hakili b'a la ka na bɔ i fɛ yanni dɔɔni.

¹⁵Hali ni ne mɛnna fana, e bena se k'i yɛrɛ minɛcogo lɔn Ala ka somɔgɔw cɛma, min ye Krista ka jama ye, min kɛra tiɲɛ juu sigiyɔrɔ n'a tintinyɔrɔ ye.

¹⁶Alaɲasiran ye gundoba ye! A y'a yɛrɛ kɛ mɔgɔ ye ka na, Nii Senuman y'a ka tilenninya yira, mɛlɛkɛw y'a ye. A ka kibaru fɔra siya wɛrɛw cɛma, ani mɔgɔw lar'a la diɲɛ kɔnɔ, Ala y'a ta ka taga n'a ye a ka nɔɔrɔ la. Mɔgɔ si te se k'o sɔsɔ.