Read dyu Timote fɔlɔ 4 Bible Online

Timote fɔlɔ 4 - dyu bible

Timote fɔlɔ 4

¹Nii Senuman b'a fɔ k'a gwɛ ko laban tuma na, mɔgɔ dɔw bena u jigi bɔ Yezu Krista kan. U bena mɛnni kɛ namaramɔgɔw fɛ, ani ka sɔn jinaw ka kalan ma.

²U bena u yɛrɛ to namaramɔgɔ galontigɛlaw b'u nigɛ, olu minw dusu finnin lo.

³O mɔgɔ nunu b'a fɔ ko a daganin te ka furu. U be mɔgɔw bali dumuni dɔw la k'u man kan k'o dumu. K'a sɔrɔ Ala y'o dumunifɛn nunu dan, minw lara Yezu la, n'u b'o dumuni nunu kɛ, olu minw ye tiɲɛ lɔn, u ka barika la Ala ye o dumuwaati la.

⁴Ala ye fɛɛn minw dan, o bɛɛ ka ɲi. Foyi man kan ka fili olu la, nga a daan ye an ka barika la Ala ye k'o dumu,

⁵bari Ala ka kuma ni Aladali, y'u saniya.

⁶N'i be i balimaw kalan n'o koo ye, i bena kɛ Yezu Krista ka baarakɛlaɲuman ye. Min labɛnna jigiɲuman ni kalanɲuman barika la.

⁷Nga i ka ban siirinkolonw ni kumakolonw ma, minw ni Ala ka koo te bɛn. I jija Ala ɲasiranya la.

⁸Bari ka jija farikolo tolon na, nafa dɔɔni b'o la, nga nafa be Ala ɲasiran na kosɔbɛ. Sii ni nii banbali bɛɛ be sɔrɔ o la.

⁹Nin kuma nin ye tiɲɛ ye, mɔgɔ bɛɛ ka kan ka sɔn min ma.

¹⁰O le y'a to an be baara kɛ ka sigɛn ani ka banba, bari Nitigi Ala ye mɔgɔ bɛɛ kisibaga ye, janko minw lar'a la.

¹¹I ka kan ka o le ɲini mɔgɔw fɛ, ani k'u kalan n'o ye.

¹²Kan'a to mɔgɔ si k'i dɔgɔya i ka denmisɛnya kama, nga siraɲuman yira u la, i ka kumacogo, n'i ka taamacogo fɛ, i ka mɔgɔ kanucogo, n'i ka lanaya, an'i ka senuya fɛ.

¹³Sanni ne ka na, jija ka Ala ka kuma fɔ jama cɛma, k'u waaju, k'u kalan fana.

¹⁴Ala ye see min d'i ma kirayakuma fɔwaati la, Ala ka jama ɲamɔgɔw y'u bolo la i kan tuma min na, i kana farati o la.

¹⁵I ka kan ka olu to i dusu la, k'o minɛ ka ɲa kosɔbɛ. O la, mɔgɔw bɛɛ ben'a ye ko i jijanin lo.

¹⁶I yɛrɛ minɛ ani k'i ka mɔgɔ kalancogo kɔlɔsi fana. E k'i jija o la, n'o kɛra, i bena i yɛrɛ kisi ani k'i lamɛnbagaw fana kisi.