Read dyu Timote fɔlɔ 6 Bible Online

Timote fɔlɔ 6 - dyu bible

Timote fɔlɔ 6

¹Jɔɔnw k'u kuntigiw boɲa ka ɲa, waasa mɔgɔ si kana sababu sɔrɔ ka Ala tɔgɔ cɛn, ani ka kumajugu fɔ an ka kalan koo la.

²Jɔɔn minw kuntigiw lara Yezu la, olu kana ban k'u boɲa bari u balimaw lo, nga u ka baara kɛ u ye kosɔbɛ, bari mɔgɔ minw b'u ka baara nunu tɔnɔ sɔrɔ, olu kɛra Yezu kɔmɔgɔw ye aw yɛrɛ be minw kanu. E ka mɔgɔw kalan ni o koo nin ye ani ka u ladi.

³Ni mɔgɔ dɔ be mɔgɔw kalan ni koo wɛrɛ ye, n'o tigi ka kuma ni an Matigi Yezu Krista ka kuma ɲanaman ma kɛ kelen ye, ani n'o te bɛn Alasira taamacogo ma, ani kalan min be bɛn ni Alaɲasiran ye,

⁴o tigi ye yɛrɛboɲala dama ye. A te foyi lɔn. Sɔsɔli ka d'a ye kosɔbɛ ani a be kuma samasama, min be na ni ɲagoya ni kɛlɛ ye, ani tɔgɔ cɛnni, ni ŋaniyajugu.

⁵A fana be na ni sɔsɔli caaman ye hakilitanw cɛma. O mɔgɔ nunu te tiɲɛ lɔn tugu. U be miiri ko u bena nafolo sɔrɔ Alasira taama barika la, ka kɛ fɛntigiw ye.

⁶Mɔgɔ min ka sɔrɔ b'a wasa, tiɲɛ na, Alasira taamako kɛra dɛmɛyɔrɔ ye ale fɛ.

⁷An ma na ni foyi ye diɲɛ na, an tena taga ni foyi ye fana.

⁸O la, n'an b'an daladumuni sɔrɔ ani ka fani sɔrɔ fana, olu ka kan k'an wasa.

⁹Nga mɔgɔ minw b'a fɛ ka kɛ fɛntigiw ye, olu nigɛra ka sɔrɔ miirijugu fɛ, minw be mɔgɔw cɛn ani k'u bila halakili la,

¹⁰bari wari nigɛ ye kojugu sifa bɛɛ bɔyɔrɔ ye. Mɔgɔ dɔw tugur'a nɔɔ fɛ k'u jigi bɔ Krista kan, ka tɔɔrɔ la u yɛrɛ kan.

¹¹Nga e kɔni, Ala ka mɔgɔ, i k'i yɛrɛ tanga o fɛɛnw bɛɛ ma, ka to ka tilenninyakow kɛ, ka siran Ala ɲa, k'i jigi la a kan, k'a kanu, ka muɲuli kɛ, ani ka to ka ɲumanya kɛ mɔgɔw ye.

¹²I jija lanaya la i ko sɔlidasiɲuman, kɛlɛkɛyɔrɔ la, ka nii banbali sɔrɔ, bari Ala y'i wele o le kama, i n'a fɔ i tun ye seereyaɲuman kɛ cogo min na, seere caaman ɲana.

¹³ Ala min be nii don fɛɛn bɛɛ la ani Yezu Krista min lɔra Pɔnsi Pilati ɲakɔrɔ ka seereyaɲuman kɛ, n b'a fɔ i ye olu ɲana

¹⁴ko baara min dira i ma, i ka jija k'o kɛ, jalakiyɔrɔ kana sɔrɔ i la, fɔɔ ka taga se an Matigi Yezu Krista nalon ma.

¹⁵Ala kelenpe min ye setigi ye, ni dubatigi, masaw ka Masa, matigiw ka Matigi, bena o kɛ a ka waati latigɛnin na.

¹⁶Ale kelen le te sa, a be kɛnɛ na mɔgɔ si te se ka gwɛrɛ min la. Mɔgɔ ma Ala ye, mɔgɔ te se k'a ye fana. Boɲa ni sebagaya ye ale ta ye tuma bɛɛ. Amiina.

¹⁷A fɔ bii fɛntigiw ye k'u kana u yɛrɛ boɲa, ani u kana u jigi la o fɛɛn tɛmɛta nunu kan, nga u k'u jigi la Ala kan, ale min be fɛɛnw bɛɛ di an ma caaman, waasa an ka nisɔndiya.

¹⁸A fɔ u ye k'u ka koɲuman kɛ, kɛwaliɲuman ka kɛ u ka nafolo ye. U k'u tigɛw dayɛlɛ ka mɔgɔ wɛrɛw dɛmɛ.

¹⁹O la, u bena nafolo sɔrɔ sini waasa ka nii banbali sɔrɔ.

²⁰Timote, koo minw kalifara i ma, i ka olu mara kosɔbɛ. I k'i yɛrɛ tanga kuma fufafu ma minw ni Alasira te bɛn, min be jati lɔnniya ye, k'a sɔrɔ lɔnniyasɔbɛ tɛ.

²¹Mɔgɔ dɔw y'o lɔnniya nin ɲɔgɔn sɔrɔ, o le y'a to u ye Alasira bila. Ala ka nɛɛma kɛ aw ye.