Read dyu Timote filanan 1 Bible Online

Timote filanan 1 - dyu bible

Timote filanan 1

¹Ne Pɔli min kɛra Yezu Krista ka ciden ye Ala sago la, a ye ne ci ka nii banbali koo fɔ, a y'a daa di min la, n'o be sɔrɔ Yezu Krista barika la.

² Ne be nin bataki nin ci Timote ma, ele min kɛra ne ka deen ye ne be min kanu haali. An Faa Ala n'an Matigi Yezu Krista ka makari e la, ka nɛɛma ni hɛrɛ kɛ i ye.

³Ne be barika la Ala ye, ne be baara kɛ min ye ni kɔnɔgwɛ ye i n'a fɔ ne y'o sɔrɔ n bɛmaw fɛ cogo min na. Ne be to ka Ala daali i ye suu ni tile.

⁴Ni ne hakili jigira i kasiko la tuma min na, o waati la, ne b'a fɛ k'i ye teliya la waasa ne ka se ka nisɔndiya.

⁵ Ne hakili b'i ka jigisɔbɛ la. Jigi min tun be i mamamuso Loyisi an'i bamuso Unisi fɛ, ne lanin b'a la k'o ɲɔgɔn b'i fɛ fana.

⁶Ne ye n bolo la i kan tuma min na, Ala ye see min d'i ma, ne b'i hakili jigi n'o ye, ko i k'o minɛ ka ɲa kosɔbɛ.

⁷Bari Ala ye Nii Senuman min d'an ma, o ma d'an ma waasa an ka kɛ siranbagatɔw ye, o be fanga le d'an ma, ka kanuya don an dusu la, k'an kɛ yɛrɛminɛlaw ye.

⁸I kana maloya k'an Matigi koo fɔ, i kana maloya ni ne fana ka koo ye, ne min be kaso la ale kosɔn. Nga i ka sɔn tɔɔrɔ ma i n'a fɔ ne, kibaru diman kosɔn, Ala barika la.

⁹Ale min y'an kisi ani k'an wele ka kɛ a ka siya ye, o ma kɛ an ka kɛwaliɲuman sababu la, nga ale yɛrɛ ka koo latigɛnin, n'a ka nɛɛma sababu lo. A y'o nɛɛma labɛn an ye Yezu Krista barika la kabini diɲɛ ma dan fɔlɔ.

¹⁰O nɛɛma nin kɛra an ye sisan an Kisibaga Yezu Krista ka nali barika la. An b'a lɔn kibaru diman barika la ko Yezu Krista ye saya mako sa ka nii banbali sira yira an na.

¹¹ Ala ye ne wele o kibaru diman nin fɔli kama ka n kɛ ciden ni karamɔgɔ ye.

¹²O le kosɔn, ne be tɔɔrɔ nunu muɲuna. Nga o ma kɛ maloyako ye ne fɛ, bari ne ye n jigi la min kan, ne b'ale lɔn, ani ne lanin b'a la ko ne jigi be min kan, see b'a ye k'o mara n ye fɔɔ laban loon na.

¹³Ne ye kumaɲuman minw fɔ i ye, i k'i yɛrɛ cogo kɛɲɛ ni olu ye. Jigi ka to i fɛ, ani kanuya, an y'o min sɔrɔ Yezu Krista ka jɛnɲɔgɔnya fɛ.

¹⁴I ye koɲuman minw sɔrɔ, i ka olu minɛ kosɔbɛ Nii Senuman barika la, min be an kɔnɔ.

¹⁵E y'a lɔn ko Krista kɔmɔgɔ minw be Azi mara la, olu bɛɛ banna ne la. Fizɛli ani Ɛmozɛni niin b'o la.

¹⁶Matigi k'a ka ɲumanya kɛ Onezifɔri ka somɔgɔw ye, bari a ye ne jigi tugu siɲɛ caaman na. Ne kɛra kasoden ye, o bɛɛ n'a ta, a ma maloya ni ne ka koo ye.

¹⁷O le y'a to a sera Ɔrɔmu tuma min na, a jijara ka ne yɔrɔ ɲini fɔɔ ka ne ye.

¹⁸Matigi ka makari a la laban loon na. A ye dɛmɛ min kɛ ne ye k'an to Efɛzi, ele yɛrɛ b'o kala ma ka tɛmɛ bɛɛ kan.