Read dyu Timote filanan 2 Bible Online

Timote filanan 2 - dyu bible

Timote filanan 2

¹Ele kɔni, ne deen, e ka barika don i yɛrɛ la Yezu Krista ka nɛɛma barika la.

²I ye fɛɛn min mɛn ne fɛ seere caaman ɲana, i k'o kalifa mɔgɔsɔbɛw ma minw be se ka mɔgɔ wɛrɛw kalan n'o ye.

³E ka sɔn tɔɔrɔ ma i n'a fɔ Yezu Krista ka sɔlidasiɲuman.

⁴Ni mɔgɔ min donna sɔlidasiya la, n'a b'a fɛ k'a kuntigi sago kɛ, a be jija o baara la, a t'a niin don baara wɛrɛ la.

⁵Farikolo tolonkɛla fana te jala sɔrɔ abada, n'a ma sariya bato.

⁶Sɛnɛkɛla min be sɔn ka baara kɛ, ale lo be kɔn ka suman tigɛ.

⁷Ne be koo minw fɔra i ye, i ka miiri olu la k'u faamu, bari Matigi bena hakili d'i ma o koo bɛɛ la.

⁸I hakili jigi Yezu Krista la, min sara ka kunun, ale min kɛra Dawuda deen ye, ne b'ale kibaru le fɔ.

⁹O kibaru diman fɔli kosɔn, ne be sigɛn na, u ye ne siri ni jɔrɔkɔ ye, i n'a fɔ kojugukɛla. Nga mɔgɔ si te se ka Ala ka kuma fɔli bali.

¹⁰O le y'a to ne be koo bɛɛ muɲu Ala ka mɔgɔ wolomaninw kosɔn, waasa olu fana ka kisi Yezu Krista barika la, ani ka boɲa sɔrɔ daan te min na.

¹¹Nin kuma nin ye tiɲɛ ye: N'an sɔnna ka sa ni Matigi ye, an fana bena kunun ka to n'a ye.

¹² N'an jijara ka tɔɔrɔ muɲu n'a ye, an bena kuntigiya kɛ n'a ye. N'an banna ale ka koo ma, ale fana bena ban an na.

¹³N'an kɛra janfaciw ye, ale be to a ka kantigiya la, bari ale te se ka ban a yɛrɛ la.

¹⁴Mɔgɔw hakili jigi o koow la Ala ɲakɔrɔ k'a gwɛlɛya u ma k'u ka u yɛrɛ kɔlɔsi sɔsɔli gwansan ma. O te foyi ɲa fɔɔ k'u lamɛnbagaw nigɛ dɔrɔn.

¹⁵I jija ka kɛ mɔgɔsɔbɛ ye Ala ɲakɔrɔ, baarakɛlasɔbɛ min te maloya fewu, min be tilen ka tiɲɛ fɔ.

¹⁶I yɛrɛ kɔlɔsi kuma caaman ma, o ma ɲi. Bari mɔgɔ minw b'o kɛ, o tigiw be don tilenbaliya la.

¹⁷O tigiw ka kuma be cɛnni kɛ i n'a fɔ jolijugu be farisogo cɛn cogo min na. Imene ni Filɛtɔsi y'o mɔgɔ nunu dɔw ye.

¹⁸Olu minw ye tiɲɛ to yen, n'u b'a fɔ ko suuw kununna ka ban. U ye mɔgɔ dɔw jigi tigɛ, u te la Ala la tugu.

¹⁹ O bɛɛ n'a ta, Ala ye koo min dabɔ, o be to a nɔɔ na. Kuma nin le kɛra o taamasiɲɛ ye, ko: «Minw ye Matigi ta ye, a b'olu lɔn,» ani «Mɔgɔ minw bɛɛ be Matigi bato, olu ka faran tilenbaliya koo la.»

²⁰A ma kɛ ko minan minw dilanna ni sanu ye, walima ni warigwɛ ye, k'olu dama le be soo kɔnɔ, nga minw dilanna ni yiri ye, ani bɔgɔ ye, olu fana be yen. Dɔw kɛra baara saniyanin kama, dɔw fana kɛra ɲamaɲamacɛ ta ye.

²¹Ni mɔgɔ min ye a yɛrɛ saniya, k'a yɛrɛ tanga koo nunu ma, ne ye minw fɔ, o tigi bena kɛ dagaɲuman ye min saniyanin be. A b'a Kuntigi mako ɲa, a labɛnnin be koɲuman sifa bɛɛ kɛli kama.

²²I yɛrɛ kɔlɔsi nigɛjugu ma, min be sɔrɔ kanbelenya la, to ka tilenninyakow kɛ, k'i jigi la Matigi kan, k'a kanu, ani ka hɛrɛ ɲini ni mɔgɔw ye, minw y'u jigi la Matigi kan ni kɔnɔgwɛ ye.

²³I ka ban sɔsɔli gwansanw ma, i b'a lɔn k'olu be kɛlɛw wili dɔrɔn.

²⁴Bari Matigi ka baarakɛla man kan ka kɛlɛ kɛ, a ka kan ka mɔgɔ bɛɛ koo diya a yɛrɛ ye, ani ka kɛ mɔgɔ ye, min be se mɔgɔw kalan na ni muɲuli ye.

²⁵Mɔgɔ minw te sɔn a ka kalan ma, a ka kan k'olu minɛ ni dususuma ye. N'a sɔrɔ Ala bena u dɛmɛ u ka nimisa ka faran u ka kojuguw la waasa u ka tiɲɛ lɔn.

²⁶O la, u bena u yɛrɛ sɔrɔ ka bɔ Sutana ka jɔɔ la, min tun y'u minɛ janko a ka to k'a sago kɛ n'u ye.