Read dyu Timote filanan 4 Bible Online

Timote filanan 4 - dyu bible

Timote filanan 4

¹Krista ka nali n'a ka masaya kosɔn, ne b'a ɲini e fɛ Ala ni Yezu Krista ɲakɔrɔ, min bena na ɲanamanw ni suuw kiti, ko

²i ka Ala ka kuma fɔ tuma bɛɛ, waati nɔgɔman ni waatigwɛlɛn na. Mɔgɔ minw filila, i k'olu jalaki k'u ka filiyɔrɔ yira u la, k'u ladi ni muɲuli ye u kalanwaati la.

³Waati dɔ bena se mɔgɔw tena sɔn kalansɔbɛ ma, nga olu yɛrɛ ka miirijugu ben'a kɛ u be kalanfa caaman ta u yɛrɛ ye, u be koo minw fɛ, olu bena o fɔ u ye.

⁴U tena sɔn tiɲɛ ma k'a lamɛn, siirin lamɛnni le bena diya u ye.

⁵Nga ele kɔni, i k'i yɛrɛ minɛ kosɔbɛ koo bɛɛ la. I ka sigɛn muɲu, k'i ka baara kɛ ka ɲa min ye kibaru diman fɔli ye.

⁶Ne yɛrɛ kɔni, ne kɛra saraka ye Ala ma ka ban, waati sera ne ka bɔ diɲɛ na.

⁷Ne ye baara kɛ ka ɲa i ko sɔlidasiɲuman, kɛlɛkɛyɔrɔ la. Ne sera ne ka boli danyɔrɔ ma, n jigi lanin tora Matigi kan.

⁸Sisan yɛrɛ, ne ka see sɔrɔli sara be ne makɔnɔna, o ye tilenninya sara ye, Matigi min kɛra kititigɛla tilennin ye, a bena o di ne ma laban loon na. A tena o di ne kelen dama ma dɛ, nga mɔgɔ minw b'a ka nali makɔnɔna ni nisɔndiya ye, a ben'a di olu bɛɛ ma fana.

⁹I ka banba ka na ne fɛ joona.

¹⁰ Demasi faranna ne la bari a ye diɲɛ kanu ka tɛmɛ, a tagara Tesaloniki. Keresan tagara Galati mara la, Titi fana tagara Dalimati mara la.

¹¹ Luka kelen le be ni ne ye yan. N'i be na, i ka na ni Mariki ye. Ale be se ka ne dɛmɛ baara la.

¹² Ne ye Tisiki ci Efɛzi.

¹³ N'i be na, i ka ne ka foroca ta ka na n'o ye, ne ye min to Karipisi fɛ Torowasi. I ka na ni kitabuw fana ye, ne be minw fɛ yɛrɛ, o ye gololamanw ye.

¹⁴ Numucɛ Alɛkisandiri ye kojugu caaman kɛ ne la dɛ, Matigi le ben'a sara ka kɛɲɛ n'a ka kɛtaw ye.

¹⁵Ele, i k'i yɛrɛ kɔlɔsi a la, bari a y'an sɔsɔ kosɔbɛ an ka waajuli kɛtuma na.

¹⁶Ne ka kiti fɔlɔ loon na, mɔgɔ si ma sɔn ka foyi fɔ ka ne dɛmɛ, u bɛɛ bolila ka ne to. Ne be Ala daali a ka yafa u ma.

¹⁷Nga Matigi yɛrɛ le tora ne fɛ ka fanga di ne ma, fɔɔ a kɛra ten, ne sera ka Ala ka kuma fɔ u ye ka gwɛ. A kɛra ten, siya tɔw bɛɛ y'o mɛn, ani ne kisira jara daa ma.

¹⁸Matigi bena ne kisi kojugu sifa bɛɛ ma, ka n don arijana na. Boɲa ka la ale kan tuma bɛɛ. Amiina.

¹⁹ Pirisili ni Akilasi, ani Onezifɔri ka somɔgɔw fo.

²⁰ Erasiti tora Korɛnti, ne ye Torofimu to Mile, bari a tun man kɛnɛ.

²¹Banba ka na sanni samiɲa ka don. Ebilisi, ni Pidansi, ani Linisi, ni Kulodiya, ani an balimaw bɛɛ b'i fora.

²²Matigi ka to i fɛ, Ala ka nɛɛma kɛ aw bɛɛ ye.