Read dyu Titi 2 Bible Online

Titi 2 - dyu bible

Titi 2

¹Ele kɔni, mɔgɔw ladi ka kɛɲɛ ni kalanɲuman ye.

²A fɔ cɛkɔrɔbaw ye k'u ka kɛ mɔgɔsɔbɛw ye, u be minw jati minw ka miiriya ka ɲi, jigi be minw fɛ kosɔbɛ, ni kanuya ni muɲuli.

³O cogo kelen na fana, i k'a fɔ musokɔrɔbaw ye k'olu taamacogo ka bɛn ni mɔgɔsɔbɛya ye Ala faan fɛ. U kana kɛ mɔgɔ tɔgɔcɛnlaw ye, ani u fana kana kɛ dɔrɔtɔw ye. Olu ka mɔgɔw dege koɲuman kɛli la.

⁴O la, muso minw ma kɔrɔ fɔlɔ, u b'u dɛmɛ u k'u cɛɛ n'u deenw kanu.

⁵U ka kɛ musosɔbɛw ye minw ɲamalɔnin lo, minw jijanin be u ka sokɔnɔbaaraw la, ani minw sɔɔn ka ɲi, ani u b'u yɛrɛ majigi u cɛɛw ye, waasa mɔgɔw kana se ka Ala ka kuma lɔgɔbɔ.

⁶O cogo kelen na fana, i ka kanbelenw ladi k'olu ka kɛ mɔgɔsɔbɛw ye

⁷fɛɛn bɛɛ la. I ka cogoɲuman yira u la, n'i b'u kalana i kɔnɔgwɛ ka o kɛ ni ɲamalɔ ye.

⁸I ka kuma ka kɛ kuma ye, mɔgɔ te se ka min sɔsɔ waasa an juguw kana fɔta sɔrɔ an kama, u ka to maloya la.

⁹I ka jɔɔnw ladi ko olu ka kan ka u yɛrɛ majigi k'u koo diya u kuntigiw ye koo bɛɛ la, u kana u sɔsɔ,

¹⁰ani u kana u soɲa cogo si la. U k'u ka mɔgɔsɔbɛya dafanin yira u la tuma bɛɛ. O la, u bena an kisibaga Ala ka koo boɲa.

¹¹Bari Ala y'a ka ɲumanya yira kɛnɛ kan adamaden bɛɛ be se ka kisi min barika la.

¹²Ale min b'a yira an na ko an ka siran Ala ɲa ani ka ban nin diɲɛ nigɛjuguw la, waasa k'an to bii diɲɛ na, an ka se k'an yɛrɛ minɛ ka taama tilenninya la Ala ɲakɔrɔ.

¹³K'an to nisɔndiya loon makɔnɔni na, min ye Setigi Ala an kisibaga Yezu Krista ka nɔɔrɔ loon ye.

¹⁴ Ale lo y'a yɛrɛ di an kosɔn, waasa k'an kunmabɔ tilenbaliyakow bɛɛ la, ani k'an saniya k'an kɛ a yɛrɛ ka jama ye, k'an kɛ mɔgɔw ye minw labɛnnin be koɲuman kɛli kama.

¹⁵I ka kan ka mɔgɔw kalan, k'u ladi, k'u filiyɔrɔ fɔ u ye ni kuntigiya ye ten. Kan'a to mɔgɔ si k'i dɔgɔya fana.