Read dyu Eburuw 10 Bible Online

Eburuw 10 - dyu bible

Eburuw 10

¹Musa ka sariya tun ye fɛnɲuman nata taamasiɲɛ le ye. A te se k'a batobagaw kɛ mɔgɔdafaninw ye Ala ɲakɔrɔ saraka bɔtaw barika la, u be minw kɛ tuma o tuma ni saan o saan, daan t'a la.

²N'o tun be fɛɛn ɲa, u tun tena to k'o kɛ tugu. Bari n'a kuun ye u saniyako ye, n'u tun y'o bɔ ka ban, minw tun b'o kɛ ka Ala bato, olu hakili tun tena jigi u ka hakɛw la tugu do.

³Nga, saan o saan, saraka nunu be to k'u hakili jigi u ka hakɛw la.

⁴Bari turaw ni bakɔrɔninw joli te se ka mɔgɔ ka hakɛw yafa abada.

⁵O kama Krista natuma diɲɛ na, a y'a fɔ Ala ye ko: «E ko i te saraka ni sɔnnifɛn fɛ, nga i ye farisogo di ne ma.

⁶Ka begɛn faga k'a jɛni, walima k'a joli bɔn hakɛ yafa kosɔn, o si ma i ɲaa fa.

⁷ O la, ne y'a fɔ ko n filɛ nin ye n ka Ala, ne nana janko k'i sago kɛ ka kɛɲɛ ni min fɔra kitabu kɔnɔ ne ka koo la.»

⁸Krista kɔnna k'a fɔ ko: «Saraka, ni sɔnnifɛn, ni begɛn jɛnita, ani hakɛ yafa saraka, i tun t'o si fɛ, o si ma diya i ye.» K'a sɔrɔ o koo nunu tun be kɛ ka kɛɲɛ ni sariya ye.

⁹O kɔ, a y'a fɔ ko: «Ne filɛ, ne nana janko k'i sago kɛ.» A kɛra ten, Krista be landakɔrɔ bɔ yen ka landakura sigi.

¹⁰A ye Ala sago kɛ k'a yɛrɛ saraka siɲɛ kelenpe minkɛ, min ɲɔgɔn tena kɛ tugu, anw saniyara o le barika la.

¹¹ Sarakalasebagaw be to u seen kan loon o loon k'u ka baara kɛ ka to k'o saraka kelen nunu bɔ. O te se cogo si la ka hakɛw yafa.

¹²Nga Krista kɔni, ale y'a yɛrɛ di siɲɛ kelenpe hakɛw yafa kosɔn, ka sɔrɔ ka taga sigi Ala kinibolo la kudayi,

¹³ yanni Ala k'a juguw majigi a kɔrɔ.

¹⁴A be mɔgɔ minw saniya, a y'olu kɛ mɔgɔdafaninw ye a ka saraka kelen barika la, u fana be to ten tuma bɛɛ.

¹⁵Nii Senuman fana b'o le fɔ ka gwɛ an ye ko:

¹⁶ «Ne bena bɛɛn min sigi n'u ye o loonw tɛmɛnin kɔ, o filɛ nin ye, ne Matigi le ko ten. Ne bena n ka sariya don u dusu la, n koo ka to u kɔnɔ.

¹⁷ Ne tena u ka hakɛw n'u ka filikow to n dusu la tugu.»

¹⁸O la do, ni hakɛw yafara, saraka bɔkun te yen tugu.

¹⁹O kosɔn, n badenw, sira dinin b'an ma ka don Yɔrɔ senumanw ka senuman na Yezu joli bɔnin sababu la.

²⁰A ye sirakura ɲanaman dayɛlɛ an ye, cɛtigɛ fani cɛma min y'a yɛrɛ farisogo ye.

²¹Sarakalasebagaw kuntigiba b'an fɛ Ala ka soo kunna.

²² O la, an ka miirijuguw bɔ an kɔnɔ, k'an yɛrɛ saniya ni jiɲuman ye, ka gwɛrɛ Ala la ni lanaya dafanin ye.

²³An ko jigi min b'an fɛ, an kana an fari faga o koo la. Bari Ala min y'a daa di, kantigi lo.

²⁴An ka jija ka ɲɔgɔn dɛmɛ ka kanuya sira taama, ka koɲuman kɛ.

²⁵An kana ban ka taga an ka ɲɔgɔnlajɛnyɔrɔ la, i n'a fɔ dɔw be to k'a kɛ cogo min na. Nga an ka ɲɔgɔn jaa gwɛlɛya, bari aw yɛrɛ ɲaa b'a la ko Matigi ka loon surunyana ka ban.

²⁶An minw be tiɲɛ lɔn ka ban, n'an be to ka tugu ka hakɛ kɛ, saraka wɛrɛ te yen min be se ka hakɛw yafa.

²⁷ Siranyako le tora sisan, o ye kiti ni tasumaba ye minw bena Ala juguw halaki.

²⁸ Ni mɔgɔ o mɔgɔ ye Musa ka sariya cɛn, ni seere fila, walima saba, sɔrɔla k'a fɔ ko tiɲɛ lo, o tigi ka kan ka faga, u man kan ka makari a la yɛrɛ.

²⁹ Nga min ka jugu n'o ye, o ye ka Ala Dencɛ dɔgɔya, walima k'a fɔ ko Yezu joli min ye bɛɛn kɛ Ala ni mɔgɔ cɛ, k'o ye fu ye. K'a sɔrɔ o joli nin le ye o tigi saniya. Walima ka Nii Senuman tɔgɔjugu fɔ, min ye makaritigi ye. O tigi ka sara ka jugu ka tɛmɛ.

³⁰ Bari, min y'a fɔ ko: «Ne le ka kan ka mɔnɛ bɔ, ne bena u sara,» an b'o tigi lɔn. A y'a fɔ tugu ko: «Ne Matigi le bena n ka mɔgɔw kiti.»

³¹Ka don Nitigi Ala bolo, o ye jatigɛko ye.

³²Aw k'aw hakili jigi aw ka lanaya daminɛtuma na. Aw ye Ala ka yeelen sɔrɔ dɔrɔn, tɔɔrɔ jugumanw daminɛna, nga aw jijara.

³³Yɔrɔ dɔ, u tun b'aw nɛni k'aw tɔɔrɔ jama ɲana. Yɔrɔ wɛrɛ, aw le jijanin be ka tɔɔrɔbagaw dɛmɛ.

³⁴Aw sigɛnna ni kasodenw ye u ka tɔɔrɔw la. Aw sɔnna k'aw ka bololafɛnw to u bɔsibagaw bolo ni nisɔndiya ye. Bari, aw ko nafolo wɛrɛ b'aw fɛ min ka fisa n'o ye n'a te ban abada.

³⁵Aw jigi kana tigɛ, bari a nafa ka bon.

³⁶O la, fɔɔ aw ka jija janko n'aw ye Ala sago kɛ ka ban tuma min na, a y'a daa di min na, aw k'o sɔrɔ.

³⁷Tiɲɛ na, a fɔra Ala ka kuma na ko: «A tora dɔɔni dɔrɔn, min ka kan ka na, a bena na. A tena mɛn ka na.

³⁸ Ne ka mɔgɔtilennin bena kisi lanaya barika la. Nga n'a segira kɔ, a nigɛ be bɔ n na.»

³⁹Minw bena segi kɔ ka halaki, anw te olu dɔw ye. Anw ye jigitigiw ye minw bena kisi.