Read dyu Eburuw 11 Bible Online

Eburuw 11 - dyu bible

Eburuw 11

¹Lanaya ye min ye, o ye nin ye: i be la fɛɛn dɔ la, k'i jigi la a kan k'a sɔrɔ i m'a ye ka ye.

²Fɔlɔfɔlɔ mɔgɔw ye tɔgɔɲuman sɔrɔ Ala fɛ u ka lanaya kosɔn.

³ An lara Ala la minkɛ, o sababu la, an y'a lɔn ko diɲɛ danna Ala ka kuma seen fɛ. O la, an be fɛɛn minw yera, an b'a lɔn k'olu juu bɔra fɛɛn wɛrɛ la an te se ka min ye.

⁴ Abɛli lara Ala la minkɛ, o le y'a to a ye saraka bɔ min diyara Ala ye ka tɛmɛ a kɔrɔcɛ Kayɛn ta kan. A lara Ala la minkɛ, o le y'a to, Ala y'a jati mɔgɔtilennin ye ka sɔn a ka saraka ma. Abɛli ka lanaya kosɔn, a ka kuma be seen kan halibi k'a sɔrɔ a yɛrɛ te nii na.

⁵ Enɔki lara Ala la minkɛ, Ala y'a ta ka bɔ diɲɛ na, waasa a kana sa. Mɔgɔ si ɲaa ma la Enɔki kan tugu, bari Ala tun y'a ta. A fɔra Ala ka kuma na ko sanni Ala k'a ta, a koo tun ka di Ala ye.

⁶Mɔgɔ koo te se ka diya Ala ye n'o tigi ma l'a la. Bari mɔgɔ min b'a fɛ ka gwɛrɛ Ala la, fɔɔ a ka l'a la ko a be yen, ani ko a b'a yɔrɔ ɲinibagaw wasa.

⁷ Nuhun lara Ala la minkɛ, o le y'a to koo min ma kɛ ka ye, Ala y'a lasɔmi o la tuma min na, a siranna Ala ɲa ka kurunba dilan k'a ka soo kisi, diɲɛ halakira. A ka lanaya sababu la, Ala y'a jati mɔgɔtilennin ye.

⁸ Ala y'a fɔ Ibrayima ye ko a ka bɔ ka taga jamana dɔ la, ko ale bena o tigiya d'a ma. Ibrayima lara Ala la minkɛ ka sɔn a ta ma, a wilila ka taga k'a sɔrɔ a tun t'a tagayɔrɔ lɔn.

⁹ O lanaya nin barika la, a nana sigi lonanya la jamana nin kɔnɔ, Ala tun y'a daa di min koo la. A tora faniso kɔnɔ yen, ani Isiyaka ni Yakuba. Ala tun y'a daa di olu fana ma o koo kelen nin na.

¹⁰Bari Ibrayima tun b'a fɛ ka dugu sɔrɔ, min lɔra ka ɲa, Ala yɛrɛ be kɛ min taamasiɲɛ kɛbaga n'a lɔbaga ye.

¹¹ O lanaya kelen kosɔn, Sara fana sera ka deen sɔrɔ a n'a ka musokɔrɔninya bɛɛ. Bari a lar'a la ko Ala y'a daa di koo min na, ko a b'o kɛ.

¹² O cogo kelen na, cɛɛ kelen min tun sera saya ma ka ban yɛrɛ, ale sababu la, jamaba sɔrɔla, minw ka ca i n'a fɔ lolow, u daa te lɔn i n'a fɔ bada la cɛncɛn.

¹³ Ala y'a daa di koo min na, u bɛɛ lara o la fɔɔ ka taga sa n'u ma o sɔrɔ. U ɲaa y'a ye yɔrɔjan ka nisɔndiya a koo la. U y'a lɔn ten k'olu ye lonanw ye, k'u tɛmɛtɔ lo diɲɛ na.

¹⁴Mɔgɔ minw be kuma ten, a be lɔn ko u b'u faso ɲinina.

¹⁵U bɔra yɔrɔ min na ka kɔrɔ, n'u hakili tun jigira o yɔrɔ la, u tun be se ka segi yen.

¹⁶Nga u ka miiri be fasoɲuman kan, n'o ye arijana ye. O kama, n'u be Ala wele k'u ka Ala, a te maloya. Bari a ye yɔrɔ labɛn u ye.

¹⁷ Ala ye Isiyaka ɲini Ibrayima fɛ saraka ye waasa k'a kɔrɔbɔ. Lanaya kosɔn, a ma ban k'a deen kelenpe nin kɛ saraka ye. K'a sɔrɔ Ala tun y'a daa di a ma

¹⁸ k'a fɔ a ye ko a kɔmɔgɔw bena jati k'a ta Isiyaka le ma.

¹⁹Ibrayima lanin tun b'a la ko Ala be se ka suu kunun. O la, an be se k'a fɔ ko Ala ye Isiyaka bɔsi saya la k'a di Ibrayima ma.

²⁰ Isiyaka fana ka lanaya kosɔn, a ye duba kɛ a deen Yakuba ni Ezawu ye, u ka siniɲasigi kama.

²¹ Yakuba ka lanaya kosɔn, a tun be ɲini ka sa tuma min na, a ye duba kɛ Yusufu deenw kelen kelen bɛɛ ye, ka sɔrɔ ka tintin a ka bere kan ka Ala fo.

²² Yusufu ka lanaya kosɔn, a satuma surunyana tuma min na, a y'a fɔ ko Isirayɛlidenw bena na bɔ Ezipiti jamana kɔnɔ loon dɔ. O la, a ye kangari la u ye a kolow koo la.

²³ Lanaya kosɔn, Musa wolobagaw ma siran masacɛ ka sariya ɲa. U ye Musa denɲɛninman dogo fɔɔ kalo saba, bari a tun cɛɛ ka ɲi kosɔbɛ.

²⁴ Musa kɔgɔra tuma min na, a ka lanaya kosɔn, a banna k'u kana ale wele ko Ezipiti masacɛ denmuso ka deen.

²⁵A sɔnna ka tɔɔrɔ ni Ala ka mɔgɔw ye sanni a ka to lafiya la waati dɔɔni hakɛ la.

²⁶A banna Ezipiti nafolo la ka sɔn dɔgɔya ma i n'a fɔ Krista, bari a ɲaa tun be tɔnɔ nata la min ka fisa.

²⁷ Musa ka lanaya kosɔn, a ma siran masacɛ ɲa ka bɔ Ezipiti jamana na. A jijara kosɔbɛ i n'a fɔ a ɲaa be Ala la, mɔgɔ ɲaa te min na.

²⁸ A ka lanaya kosɔn, a ye *Hɔrɔnya ɲanagwɛ labɛn ka joli seriseri bondaw la waasa deen fɔlɔ fagabaga kana se Isirayɛlidenw ma.

²⁹ Isirayɛlidenw ye Buruku kɔgɔji tigɛ u seen na, u ka lanaya barika la. Nga Ezipitikaw k'u b'a tigɛ, olu tununa jii la.

³⁰ Isirayɛlidenw ka lanaya kosɔn, u tagamana ka Zeriko lamini tile wolonwula dɔrɔn, a laminikogo benna.

³¹ Kakalamuso Araabu ka lanaya kosɔn, a ye Isirayɛlidenw ka cidenw dogo. O la, minw banna Ala la, ale ma sɔrɔ ka sa ni olu ye.

³² N ka mun fɔ tugu? N tena se ka Zedeyɔn ni Baraki ni Samusɔn ni Zɛfite ni Dawuda ni Samuyɛli ani kiraw ka koow bɛɛ ɲafɔ kelen kelen.

³³ U ka lanaya kosɔn, u sera jamana wɛrɛw kɔrɔ k'u mara, ka tilenninya sigi. Ala y'a daa di min na, u y'o sɔrɔ. U ye jaraw daaw siri,

³⁴ tasuma dɛsɛra u kɔrɔ, u kisira murujan ma, u ye barika sɔrɔ bana sɔrɔnin kɔ. U kɛra kɛlɛdenŋanaw ye, u y'u juguw gwɛn.

³⁵ Muso dɔw ka lanaya kosɔn, u ka mɔgɔ saninw kununna. Dɔw fana sɔnna tɔɔrɔ ma waasa Ala k'u kunun sini.

³⁶ Dɔw fana sɔnna dɔgɔya ni bugɔli ma. U ye dɔw siri ni jɔrɔkɔw ye k'u don kaso la.

³⁷ U ye dɔw bonbon ni bɛrɛ ye, ka dɔw cɛtigɛ ni kakanan ye, ka dɔw faga ni murujan ye. Dɔw tun be munumunu ni sagagolo, walima bagolo ye u kaan na. U dɛsɛra, u tɔɔrɔla kosɔbɛ.

³⁸Diɲɛ tun te se ka bɛn n'u ye, bari u tun man kan n'u ye. O la, u tora ka yaalayaala kongokolon kɔnɔ ni kuluw kan, ka la farawow la, ani dingɛw kɔnɔ.

³⁹Ala y'u bɛɛ tɔgɔɲuman fɔ u ka lanaya barika la. Nga a y'a daa di min na, u si m'o sɔrɔ.

⁴⁰Bari Ala ye fɛnɲuman labɛn an ye min ka fisa. A tun t'a fɛ o bɛɛ ka kɛ an kɔ.