Read dyu Eburuw 12 Bible Online

Eburuw 12 - dyu bible

Eburuw 12

¹Ayiwa, an lamininin be ni seere caaman ye minkɛ, koo o koo b'an ka boli nin nagasi, an k'o bɛɛ dabila. Hakɛ min ka teli ka see an kɔrɔ, an k'o dabila. Boli min b'an seen kɔrɔ, an kana sigɛn o la.

²An k'an ɲaa lɔnin to Yezu kan ale min ye an ka lanaya bɔyɔrɔ ye, n'a laban ye. A sɔnna ka tɔɔrɔ gwengwenlɔgɔ kan, a ma maloya yɛrɛ jati, bari nisɔndiya min tun b'a kɔnɔna, a ɲaa tun b'o la. Sisan, a siginin be Ala kinibolo la.

³O la do, ale min ye tɔɔrɔ caaman muɲu hakɛkɛlaw bolo, aw k'aw hakili to ale la janko aw kana sigɛn, aw fari be faga.

⁴Aw be bondori min kɛ hakɛ kosɔn, o ma se jolibɔn ma fɔlɔ do.

⁵Aw ɲinɛna denfaw ka ladili nin na wa? A ko: «N deen, kana ban Matigi ka ladili ma. N'a b'i ladira, kana i fari faga.

⁶ Bari mɔgɔ min koo ka di Matigi ye, a b'o le ladi. A sɔnna ka min kɛ a deen ye, a b'o le ɲaa gwan.»

⁷Aw ka hɛrɛ kosɔn lo aw be tɔɔrɔla. Ala b'aw minɛ i n'a fɔ a deenw. Deen jumɛn be yen n'a faa t'a ladi?

⁸Ala b'a ka deenw bɛɛ ladi. N'a t'aw ladi, o tuma na aw te a deenw ye, aw ye ɲamɔgɔdenw le ye.

⁹An wolofaw y'an ladi, an sɔnna u ta ma. An Faa Ala min ye nii tigi ye, mun na an tena sɔn o ta ma ka to nii na?

¹⁰An wolofaw ka ladili ye waati dɔɔni koo ye, u tun b'an ladi ka kɛɲɛ n'u ka miiriya ye. Nga Ala b'an ladi an ka ɲa kosɔn waasa an ka kɛ mɔgɔɲumanw ye i n'a fɔ ale.

¹¹N'u b'i ladi tuma min na, a man di dɛ! O be digi i la. Nga kɔfɛ, ladili nafa ye hɛrɛ ni tilenninya ye, a tigi be min sɔrɔ.

¹² O kama, aw k'aw bolo faganin nunu kɔrɔta, aw seen minw be yɛrɛyɛrɛ, k'o lɔ ka ɲa,

¹³ ka siratilennin tagama, o la, minw seen kelen ma ɲi, u seen kana mugu, nga a ka suma.

¹⁴Aw ka banba, hɛrɛ ka sɔrɔ aw ni mɔgɔw bɛɛ cɛ. Aw ka saniya fana, n'o te mɔgɔ si tena Matigi ye.

¹⁵ Aw k'aw yɛrɛ minɛ waasa mɔgɔ si kana muruti ka ban Ala ka nɛɛma na. Lili si kana kɛ yirijugu ye ka wili aw cɛma ka ɲagami don ka mɔgɔ caaman halaki.

¹⁶ Mɔgɔ si kana kɛ kakala ye, walima Alaɲasiranbali ye, i n'a fɔ Ezawu, min y'a ka kɔrɔya falen dumuni na.

¹⁷ Aw b'a lɔn k'o kɔfɛ, a tun b'a fɛ u faa be duba nin kɛ ale ye, nga o banna. A ye dalili kɛ ka kasi nga o m'a ɲa.

¹⁸Fɔlɔfɔlɔ mɔgɔw gwɛrɛla Ala ka kulu la cogo min na, mɔgɔ be se ka maga min na, aw ma gwɛrɛ a la ten. Olu ye tasuma ye, ni kabafin, ni dibiba, ni sanfɔɲɔjugu,

¹⁹ ka buru fiyɛkan ni kumakanba mɛn. O mɛnbagaw ma se, u ko Ala yɛrɛ kana kuma olu fɛ tugu.

²⁰ Bari sariya min tun sigira, u tun te se o kɔrɔ. A tun fɔra ko: «Mɔgɔ si man kan ka yɛlɛ kulu nin kan, hali begɛn. Ni fɛɛn o fɛɛn yɛlɛla, o ka kan ka bon ka faga.»

²¹ Koo nin siranya tun ka bon haali, fɔɔ Musa y'a fɔ ko: «Ebe! Ne be yɛrɛyɛrɛla siranyakojugu fɛ.»

²²Nga aw kɔni, aw gwɛrɛla *Siyɔn kulu ni Nitigi Ala ka dugu la, n'o ye sankolo Zeruzalɛmu ye, ka gwɛrɛ mɛlɛkɛ caaman caaman na n'u be ɲanagwɛ la.

²³Mɔgɔ fɔlɔ minw tɔgɔ sɛbɛnnin be arijana na, aw gwɛrɛla olu la, ka gwɛrɛ Ala la, adamadenw bɛɛ kitibaga. Mɔgɔtilennin minw y'u nakun dafa, aw gwɛrɛla olu la.

²⁴ Yezu min ye bɛnkura sindibaga ye, aw gwɛrɛla ale la, a joli min bɔnna, aw gwɛrɛla o la. O joli nin be fɛnɲuman d'an ma ka tɛmɛ Abɛli ta kan.

²⁵ Min be kumana aw fɛ, aw ye jija, aw kana ban a ka kuma na. Bari fɔlɔ mɔgɔw banna Ala ka kuma fɔbaga ma, min tun b'u cɛma dugukolo kan. O la, u ma kisi ɲagwan ma. Min be to arijana na ka kuma an fɛ, n'an banna ale la, an ka ɲagwan tena tɛmɛ fɔlɔ mɔgɔw ta kan wa?

²⁶ Min kumakan tun ye dugukolo yɛrɛyɛrɛ, sisan ale ko: «Ne ben'a to dugukolo be yɛrɛyɛrɛ siɲɛ kelen tugu, nga a tena dan o ma, sankolo fana niin bena sɔrɔ a la.»

²⁷N'a fɔra ko «siɲɛ kelen tugu,» o kɔrɔ ko fɛɛn minw bena yɛrɛyɛrɛ, olu bena tunu. Minw te yɛrɛyɛrɛ, olu be to yen.

²⁸Ayiwa, Ala bena sigiyɔrɔ d'an ma min te se ka cɛn, o la, an k'a fo k'a bato, ka kɛɲɛ n'a yɛrɛ sago ye, ni yɛrɛmajigi ni siranya ye.

²⁹ Bari, an ka Ala ye tasuma ye min be cɛnikɛ.