Read dyu Eburuw 13 Bible Online

Eburuw 13 - dyu bible

Eburuw 13

¹Ɲɔgɔnkanuya ka barika sɔrɔ aw cɛma.

² Aw hakili ka to a la ko aw ka kan ka lonanw ladon. Lonanladon sababu la, dɔw ye mɛlɛkɛw ladon k'a sɔrɔ u m'a lɔn ko mɛlɛkɛw lo.

³Aw k'aw hakili to kasodenw na, k'a kɛ i n'a fɔ aw fana be kaso la n'u ye. U be minw tɔɔrɔla, aw k'aw hakili to u la, i n'a fɔ aw yɛrɛ tun be tɔɔrɔla.

⁴Mɔgɔ bɛɛ ka furu boɲa, kakalaya kana kɛ furu kɔnɔ. Bari Ala bena ɲamɔgɔyakɛlaw ni kakalaw kiti.

⁵ Wari ɲiniko kana fiɲɛ don aw si tagamacogo la. Min b'aw bolo, o k'aw wasa. Bari Matigi yɛrɛ le ko: «Ne tena i to i kelen, n tena i bila abada.»

⁶ Anw b'an jigi la a kan o tuma na k'a fɔ ko: «Matigi ye ne dɛmɛbaga ye, ne tena siran foyi ɲa. Adamaden be se ka mun kɛ ne la?»

⁷Aw k'aw hakili jigi aw ɲamɔgɔw la. Minw ye Ala ka kuma fɔ aw ye. U sii labanna cogo min na, aw k'o jati k'u ka lanaya ɲɔgɔn kɛ.

⁸Yezu Krista tun be cogo min na kunun, a b'o cogo kelen le la bii, a bena kɛ ten fana tuma bɛɛ.

⁹Aw kan'a to mɔgɔ si k'aw kuun ɲagami ni kalan wɛrɛ ye. Ayiwa, a ka ɲi an ka jagwɛlɛya sɔrɔ Ala ka nɛɛma barika la. O kana kɛ landa dumuni dɔw barika la, min ma deli ka nafa di u dumubagaw ma ka ye.

¹⁰Mɔgɔ minw tun be baara kɛ fanibugu kɔnɔ, olu te se k'u niyɔrɔ sɔrɔ an ka sarakabɔyɔrɔ dumuni na.

¹¹ Sarakalasebagaw kuntigiba be don ni begɛn min joli ye Yɔrɔ senumanw ka senuman na, hakɛw yafali kama, o sogo nin be jɛni dugu kɔfɛ le.

¹²O kama, Yezu bɔra dugu kɔfɛ k'a yɛrɛ saraka ka mɔgɔw saniya k'u bɔ u ka kojuguw la n'a yɛrɛ joli ye.

¹³O tuma na, n'an b'a fɛ ka tag'a kunbɛn, an ka sɔn dɔgɔya ma ka bɔ dugu kɔfɛ i n'a fɔ ale.

¹⁴Bari diɲɛ te an ka soo ye. Nga an be sini soo le ɲinina.

¹⁵O la, an ka Ala fo Yezu sababu la tuma o tuma, min ye an ka saraka ye. O kɔrɔ ko an k'a tɔgɔ tanu n'an daa ye.

¹⁶Aw kana ɲinɛ ka ɲumanya kɛ, ani ka ɲɔgɔn dɛmɛ. O saraka nunu ɲɔgɔn le ka di Ala ye.

¹⁷Aw ka mɛnni kɛ aw ɲamɔgɔw fɛ, aw k'aw yɛrɛ majigi u ye. Bari olu le be janto aw la Alasira la, Ala bena u ɲiniga aw ka koo la. Aw ka sɔn u ta ma waasa u dusu ka diya u ka baara la. N'u dusu ma diya, o y'aw ka bɔnɛ ye.

¹⁸Aw ka Ala dali anw ye. Anw kɔni lanin b'a la ko an kɔnɔ gwɛnin lo, ko an b'a fɛ an tagamacogo ka ɲa tuma bɛɛ.

¹⁹N b'a ɲini aw fɛ kosɔbɛ ko aw ka Ala dali waasa ne ka se ka segi aw fɛ joona.

²⁰Hɛrɛ tigi Ala min ye bɛɛn cɛnbali sigi n'an Matigi Yezu joli ye, ale min y'a sanin kunun k'a kɛ a ka jama kɔlɔsibaga ye,

²¹a yɛrɛ ka barika don aw la, aw ka se ka koɲuman sifa bɛɛ kɛ, k'a sago kɛ. Koo min ka di a yɛrɛ ye, a k'o kɛ an ye Yezu Krista barika la. Boɲa ka la ale kan tuma bɛɛ. Amiina.

²²N badenw, ne b'aw dali, aw ka ladilikuma nunu lamɛn kosɔbɛ, bari a man ca.

²³Ayiwa, n b'a fɔ aw ye ko u y'an badencɛ Timote labila. N'a sera n fɛ yan joona, an bena na ɲɔgɔn fɛ aw fɛ.

²⁴Ne b'aw ɲamɔgɔw bɛɛ fo, ka Krista ka jama bɛɛ fo. Italikaw b'aw fo.

²⁵Ala ka nɛɛma kɛ aw bɛɛ ye.