Read dyu Eburuw 6 Bible Online

Eburuw 6 - dyu bible

Eburuw 6

¹O la do, Krista ka koo minw faamu man gwɛlɛ, an kana to o kalan na halibi, nga an ka jija ka taga ɲa. An kana segi kalan kɔrɔman nunu kan minw ye: an ka nimisa ka faran kojuguw la minw te foyi ɲa mɔgɔ ye, ani jigi lako Ala kan,

²ni batizeliko, ani ka bolo la mɔgɔ kan ka Ala dali, ni suuw kununko, ani laban kitiko. An kana segi olu kan tugu.

³An ben'a kɛ ten le sisan, ni Ala sɔnna.

⁴Mɔgɔ minw ye Ala ka yeelen sɔrɔ, ka Ala ka nɛɛma sɔrɔ, ka kɛ Nii Senuman jɛnɲɔgɔnw ye,

⁵olu minw y'a ye ko Ala ka kuma ka ɲi, ani ka sini fangatigiya nɛnɛ,

⁶nga o bɛɛ n'a ta, u murutira. Olu kɔni, ka nimisa ka segi ka faran u ka kojugu la, o te se ka kɛ. Bari u ka kɛwali b'a yira k'u be Ala Dencɛ gwengwenna lɔgɔ kan tugu, ani k'a di a nɛnibagaw ma.

⁷Ni sanji benna dugukolo kan ka ɲa, ni sɛnɛkɛla ye suman sɔrɔ dugukolo nin be Ala ka nɛɛma sɔrɔ.

⁸ Nga, n'i dugukolo ye ŋɔni, ani sigɛn dama le falen, a te foyi ɲa, a yɔrɔ man jan danga la. A laban be jɛni.

⁹Ayiwa, ne teriɲumanw, an ye kuma minw fɔ ten, a ma kɛ ko aw ka koo lo, bari an lanin b'a la ko aw be siraɲuman kan, min ye kisili sira ye.

¹⁰Aw ye baara min kɛ, ka koɲuman minw kɛ ka tɛmɛ, ani aw be minw kɛra sisan ka Ala ka mɔgɔw dɛmɛ, k'a yira Ala la ko a koo ka di aw ye, Ala ka ɲi, a tena ɲinɛ o si kɔ.

¹¹Ayiwa, anw b'a fɛ, aw kelen kelen bɛɛ ka banba ka to timinadiya la fɔɔ ka taga se a laban ma, janko aw jigi be min kan, aw ka se k'o sɔrɔ.

¹²O la, aw fari tena faga. Ala y'a daa di koo min na, minw be la Ala la, ka muɲu fɔɔ k'o sɔrɔ, aw ka olu ladege.

¹³Ala y'a daa di Ibrayima ma tuma min na, a kalila n'a yɛrɛ tɔgɔ ye bari fɛɛn wɛrɛ te yen min ka bon n'ale yɛrɛ ye n'a be se ka kali ni min ye.

¹⁴ A tun ko: «Ne bena hɛrɛ kɛ i ye, k'i kɔmɔgɔw caya kosɔbɛ.»

¹⁵Ayiwa, Ibrayima muɲuna ka kɔnɔni kɛ. Ala y'a daa d'a ma koo min na, a y'o sɔrɔ.

¹⁶Ni adamadenw k'u be kali, fɛɛn min ka bon n'u yɛrɛ ye, u b'o le tɔgɔ wele ka kɛ u seere ye, waasa u y'u daa di koo min na, sigasiga kana sɔrɔ o la.

¹⁷O la, Ala kalila a ka dadili nin na, k'a yira ka gwɛ o sɔrɔbagaw la ko siga t'a la, o bena kɛ.

¹⁸O kobaba fila nunu na, Ala te se ka galon tigɛ an ye cogo si la. O kama, an minw jigi b'o kan, o ka kan ka barika don an na kosɔbɛ k'o koo minɛ ka ɲa.

¹⁹ Jigi min b'an fɛ, barika b'o la. O b'a kɛ an be lɔ ka ɲa, a b'an dɛmɛ ka tɛmɛ cɛtigɛ fanin na ka taga se Ala fɛ. [1]

²⁰ Yezu kɔnna an ɲa o yɔrɔ la an kosɔn. Ale kɛra waati bɛɛ sarakalasebagaw kuntigiba ye Mɛlikisedɛki cogo la.