Read dyu Eburuw 8 Bible Online

Eburuw 8 - dyu bible

Eburuw 8

¹ Ayiwa, an ye min bɛɛ fɔ ka tɛmɛ sisan, a kunba filɛ nin ye: an k'a lɔn k'o sarakalasebagaw kuntigiba ɲɔgɔn le b'an fɛ. A tagara sigi Setigi Ala kinibolo la sankolo la.

²A b'a ka baara kɛ Ala ka yɔrɔ senuman na, a sigiyɔrɔ yɛrɛ la. Mɔgɔ bolo m'a min lɔ, fɔɔ Matigi Ala.

³Sarakalasebagaw kuntigibaw bɛɛ sigira ka sɔnnifɛn ni sarakaw di Ala ma. O la, fɔɔ Yezu fana ka dɔ sɔrɔ k'o di Ala ma.

⁴N'a tun be diɲɛ na, a yɛrɛ tun te se ka kɛ sarakalasebaga ye do, bari sarakalasebagaw be yen ka kɛɲɛ ni Musa ka sariya ye.

⁵ Olu be baara min kɛra ten diɲɛ na, o ye arijana ta jaa ye. Min be kɛra yan, o te foyi ye ni Musa ka tile ta tɛ. O kosɔn, sanni Musa ka fanibugu fɔlɔ lɔ, Ala y'a fɔ a ye ko: «Ne ye cogo min yira i la kulu kan, e jija a bɛɛ ka kɛ ten.»

⁶Nga baara min dira Yezu ma sisan, o ka bon ni sarakalasebaga tɔɔ nunu ta ye. Bari Yezu ye Ala ni mɔgɔ ka bɛɛn lakuraya, min ka fisa ni fɔlɔta ye, min juu sigira dadili kan minw fana ka fisa ni fɔlɔta ye.

⁷Bɛɛn min tun be Ala n'a ka jama cɛ, ni fiɲɛ tun ma don o la, Ala tun ten'a lakuraya.

⁸Ala tun y'a ka mɔgɔw jalaki. O la, ko: «Loon dɔ bena se, ne Matigi le ko ten. Ne bena n ka bɛɛn lakuraya ni Isirayɛli mara mɔgɔw ani Zuda mara mɔgɔw ye.

⁹O ni kɔrɔman nin tena kɛ kelen ye, n y'e min sigi n'u faaw ye loon min na ne y'u minɛ ka bɔ n'u ye Ezipiti jamana na. Nga, u ma ne ka bɛɛn bato minkɛ, o la, ne fana ye n mako bɔ u la. Ne Matigi le ko ten.

¹⁰O loonw tɛmɛnin kɔ, n bena bɛɛn min sigi ni Isirayɛlidenw ye, o filɛ nin ye. Ne Matigi le ko ten. Ne yɛrɛ bena n ka sariya don u dusu la, n koo ka to u kɔnɔ. Ne bena kɛ u ka Ala ye, olu bena kɛ ne ka mɔgɔw ye.

¹¹O tuma na, u si tena na u baden, walima u tɔɲɔgɔn kalan ne ka koo la tugu. Bari, u bɛɛ bena ne lɔn, k'a ta denmisɛnw ma fɔɔ ka taga bila mɔgɔkɔrɔbaw ma.

¹² Ne bena u ka hakɛw bɛɛ to u ye. Ne tena u ka kojuguw koo to n dusu la tugu.»

¹³Ni Ala ye bɛnkura koo fɔ, o b'a yira ko fɔlɔta nin te jati tugu. Ni fɛɛn min do te jati, o bantuma sera.