Read dyu Zaki 3 Bible Online

Zaki 3 - dyu bible

Zaki 3

¹N badenw, aw caaman kana kɛ karamɔgɔw ye. Bari an b'a lɔn ko karamɔgɔw ka kiti bena gwɛlɛya.

²An bɛɛ be fili cogo caaman na. Mɔgɔ min te fili kuma na, o tigi ye mɔgɔdafanin ye, a be se k'a yɛrɛ minɛ fana.

³An be karafe don soo daa la waasa a ka sɔn an ta ma. N'an ko a ka taga faan min na, a be taga yen.

⁴Walima aw ye kurunbabaw filɛ. Hali n'u dɔ boɲana cogo o cogo hali ni fɔɲɔba b'a ɲotira cogo o cogo, ni kurunbolila b'a fɛ a ka taga yɔrɔ min na, a be taga yen a ɲatilenfɛnfitini barika la.

⁵O cogo kelen na, mɔgɔ nɛɛn fana y'a fari yɔrɔfitini dɔ ye min be se k'a yɛrɛ boɲa haali. Takamifitini fana be ten. A be se ka tuu belebeleba bɛɛ halaki.

⁶Mɔgɔ nɛɛn fana be i n'a fɔ tasuma. Fɛnjugu lo. An fari yɔrɔ dɔ lo, ale lo be fari yɔrɔ tɔw bɛɛ don koo la. O tasuma ye jahanama ta ye.

⁷Kongosogow, ni kɔnɔw, saaw, ani jikɔnɔfɛnw sifa bɛɛ, adamaden be se ka olu kolo.

⁸Nga mɔgɔ si te se ka nɛnden mara. Balawufɛn lo min te to yɔrɔ kelen. Baga yɛrɛ lo, min be mɔgɔ faga.

⁹ An be Matigi, ni an Faa tanu n'an nɛɛn ye, ka tila ka mɔgɔ danga n'o le ye. Ala do ye mɔgɔ dan i n'a fɔ a yɛrɛ.

¹⁰Duba ni danga ka bɔ daa kelen na, n badenw, o daganin tɛ!

¹¹Jii diman, ani jii kunaman be se ka bɔ kɔlɔn kelen kɔnɔ wa?

¹²N badenw, toro be se ka tigɛ olivuyiri kan wa? Walima *ɛrɛzɛnsun be se ka den toro la wa? Jii diman te se ka bɔ kɔgɔji la.

¹³Jɔn ye hakilitigi ye aw cɛma? O tigi k'a yira a ka kɛwaliɲumanw fɛ a be minw kɛ ni yɛrɛmajigi ani hakilitigiya ye.

¹⁴Nga ni min kɔnɔ ka jugu, ni keliya be min na, o tigi kan'a yɛrɛ wanso k'a ka galon kɛ ka tiɲɛ datugu.

¹⁵O hakilitigiya ɲɔgɔn te bɔ Ala fɛ, nga o ye diɲɛ ta ye, adamaden ni Sutana ta.

¹⁶Kɔnɔnajuguya ni keliya be yɔrɔ min na, koɲagaminin ni kojugu sifa bɛɛ be sɔrɔ o yɔrɔ la fana.

¹⁷Nga hakilitigiya min be Ala fɛ, o be mɔgɔ kɛ mɔgɔɲuman ye, hɛrɛmɔgɔ, hinɛbaga, min ka koo ka di, a ka kɛwaliw ka ɲi kosɔbɛ. A be makari kosɔbɛ. A te wolomani kɛ. A te kuma fila fɔ.

¹⁸Mɔgɔ minw be hɛrɛ ɲinina, olu be tilenninya nafa sɔrɔ hɛrɛ kɔnɔ.