Read dyu Zaki 4 Bible Online

Zaki 4 - dyu bible

Zaki 4

¹Kɛlɛ ni sɔsɔli minw be wili aw cɛma wo, olu be bɔ min le? O be bɔ nigɛjuguw la minw b'aw ɲɔtiɲɔtira.

²Fɛɛn dɔw nigɛ b'aw la, nga aw t'o sɔrɔ, aw be mɔgɔ faga ka kɔnɔnajuguya kɛ, nga aw be min fɛ, aw te se k'o sɔrɔ. Kɛlɛ ni sɔsɔliw be wili aw cɛma. Aw te foyi sɔrɔ bari aw t'a daali Ala fɛ.

³Aw man'a daali fana, aw te foyi sɔrɔ bari aw ka miiriya ma ɲi. Aw b'a daali aw yɛrɛ ka nigɛla dama kosɔn.

⁴Aw tilenbali nunu! Aw m'a lɔn ko ni mɔgɔ min ye diɲɛ koo diya a yɛrɛ ye, k'o tigi ni Ala te bɛn wa? Ayiwa, ni mɔgɔ min be diɲɛ koo diya a yɛrɛ ye, o tigi b'a yɛrɛ kɛ Ala jugu ye.

⁵A fɔra Ala ka kuma na ko: «A ye nii min don aw la, a be keliya o le la.» Aw ka miiri la k'o ye kumafu ye wa?

⁶ A be koo bɛɛ kɛ k'a ka nɛɛma yira. O la, a fɔra Ala ka kuma na ko: «A be nɛɛma kɛ mɔgɔmajigininw ye, ka fariya yɛrɛboɲalaw ma.»

⁷Aw k'aw yɛrɛ majigi Ala ye ka ban Sutana ma. O la, a bena aw ye k'aw to yen.

⁸Aw ye gwɛrɛ Ala la, ale fana bena gwɛrɛ aw la. Hakɛkɛla nunu! Aw y'aw bolo n'aw dusu saniya. Kɔnɔ fila tigi nunu!

⁹Aw ye nimisa ka kasi kosɔbɛ, aw k'aw ka yɛlɛko kɛ kasi ye, k'aw ka nisɔndiya yɛlɛma ka kɛ dusukasi ye.

¹⁰Aw k'aw yɛrɛ majigi Matigi ye, a bena kunkɔrɔta di aw ma.

¹¹N balimaw, aw kana ɲɔgɔn tɔgɔjugu fɔ, ni min y'a tɔɲɔgɔn tɔgɔjugu fɔ, walima k'a jalaki, o tigi be kumajugu fɔ Ala ka sariya la, k'a dɔgɔya. K'a sɔrɔ mɔgɔ min be sariya dɔgɔya, o tigi te sariya batobaga ye, nga a b'a dɔgɔya le.

¹²Sariyasigibaga ni kititigɛbaga ye Ala kelenpe ye, ale min be se ka mɔgɔ kisi, walima k'a halaki. E min b'i tɔɲɔgɔn jalaki, e ye jɔn ye?

¹³Ayiwa, aw minw b'a fɔ ko: «Bii, walima sini, an bena taga dugu nin na ka jago kɛ saan kelen ka wari sɔrɔ.»

¹⁴ K'a sɔrɔ aw m'a lɔn ni sini bena kɛ cogo min na aw fɛ, bari aw be i n'a fɔ komiji.

¹⁵Nga aw ka kan k'a fɔ ko ni Matigi sɔnna, ko aw bena nin ni nin kɛ.

¹⁶Aw b'aw yɛrɛ boɲa n'aw ka kuma fufafu ye. K'a sɔrɔ o ɲɔgɔn ma ɲi.

¹⁷Ayiwa, mɔgɔ min be koɲuman lɔn n'a t'a kɛ, o tigi ye hakɛ kɛ.