Read dyu Zaki 5 Bible Online

Zaki 5 - dyu bible

Zaki 5

¹Sisan, n kaan be aw nafolotigiw le ma. Aw ka kasi kosɔbɛ, bari bɔnɛ bena kɛ aw ta ye.

²Aw k'a lɔn ko aw ka nafolo tolinin lo, bagabagaw y'aw ka faniw ɲimiɲimi.

³ Aw ka sanu n'aw ka wari bɛɛ sɔnnin lo. O soon nin bena aw ka tigɛgwɛlɛya yira, a bena aw halaki i n'a fɔ tasuma. Aw ye nafolo lajɛn aw yɛrɛw ye waati laban nin na.

⁴ Baaraden minw ye baara kɛ aw ka foro kɔnɔ, aw ma olu ka saraw di u ma. Matigi, Setigi y'o baaraden nunu kasikan mɛn.

⁵Diɲɛ na, aw ye faamadumuni kɛ k'aw diyanakow kɛ, ka tulɔ i n'a fɔ begɛn fagata, k'aw salon kɔnɔ.

⁶Aw ye mɔgɔtilenninw jalaki k'u faga. U ma aw sɔsɔ.

⁷N badenw, aw ye muɲu fɔɔ ka se Matigi kɔsegilon ma i n'a fɔ sɛnɛkɛla be muɲu cogo min na. Ni sanji fɔlɔ benna, a be muɲu fɔɔ ka se sanji laban ka ben ma, a be sɔrɔ k'a ka baara nafa sɔrɔ.

⁸O cogo kelen na, aw fana ka muɲu, ka jija bari Matigi kɔsegituma surunyana.

⁹N badenw, aw kana dimi mara ka to ka ɲɔgɔn kɔrɔfɔ janko Ala kana aw kiti. A labɛnnin lo kiti kama dɛ.

¹⁰N balima kira minw kumana Matigi tɔgɔ la, olu ye tɔɔrɔ muɲu cogo min na, aw ka olu ladege.

¹¹ Mɔgɔ minw be muɲu fɔɔ ka se a daan ma, anw k'olu dagamunin lo. Zɔbu muɲuna cogo min na, n ko aw y'o mɛn kɛ. Matigi nana min kɛ a ye laban na, aw b'o lɔn. Matigi ye ɲumanya ni makaritigi ye.

¹² N badenw, aw kana kali abada. Aw kana kali sankolo la, walima dugukolo la. Aw kana kali cogo si la. Aw k'a fɔ ko ɔnhɔn ni ɔnhɔn lo, k'a fɔ ayi ni ayi lo, waasa Ala ka kiti kana ben aw kan.

¹³N'aw dɔ be tɔɔrɔ la, a ka Ala daali. Min nisɔn ka di, o ka Ala tanu ni dɔnkiliw ye.

¹⁴ N'aw dɔ man kɛnɛ, o tigi ka Krista ka jama ɲamɔgɔw wele, u ka daalili kɛ a ye ka tulu kɛ a kuun na Matigi tɔgɔ la.

¹⁵O daalili min be kɛ k'u jigi to Matigi kan, o bena banabagatɔ kisi, Matigi ben'a kɛnɛya. N'o y'a sɔrɔ a ye hakɛ kɛ, a bena o yafa sɔrɔ.

¹⁶O la sa, aw ye hakɛ minw kɛ, aw ka olu fɔ ɲɔgɔn ye ka Ala daali ɲɔgɔn ye waasa aw be kɛnɛya. Barika be mɔgɔtilennin ka daalili la kosɔbɛ.

¹⁷ Kira Eli tun ye anw bɔɲɔgɔnko adamaden ye. A y'a jigi la Ala kan k'a daali ko sanji kana na. Sanji fana ma na fɔɔ saan saba ni kalo wɔɔrɔ.

¹⁸ O kɔ, a ye daalili kɛ tugu, sanji nana, sumanw ɲana.

¹⁹N badenw, n'aw dɔ filila ka tiɲɛ sira bila, ni min kɛra sababu ye k'a kɔsegi,

²⁰ aw k'a lɔn ko ni mɔgɔ min ye hakɛkɛla kɔsegi ka bɔ a ka filisira kan, o tigi be kɛ sababu ye k'a tɔɲɔgɔn kisi, hakɛ caaman be yafa.