Read dyu Piyɛri fɔlɔ 1 Bible Online

Piyɛri fɔlɔ 1 - dyu bible

Piyɛri fɔlɔ 1

¹Ne Piyɛri, Yezu Krista ka ciden, be bataki nin ci aw ma, Ala ye aw minw woloma n'aw be lonanya la Pɔn mara la, ni Galati, ani Kapadɔsi, ni Azi ani Bitini mara la.

²Faa Ala y'aw woloma kabini fɔlɔ, k'aw kɛ a taw ye Nii Senuman barika la, waasa aw ka mɛnni kɛ Yezu Krista fɛ ani ka saniya a joli bɔnnin na. Ala ka nɛɛma ni hɛrɛ kɛ aw ye tuma bɛɛ.

³An ka barika la Ala ye, min ye an Matigi Yezu Krista Faa ye! A makarila an na kosɔbɛ k'an kɛ danfɛnkura ye ka jigi ɲanaman di an ma Yezu Krista ka kununni barika la ka bɔ kaburu la,

⁴ani ka niyɔrɔ d'an ma, min te cɛn, a te nagasi, nɔgɔ te se a ma ka ye. A maranin b'aw ye arijana na,

⁵Setigi Ala be aw minw mara aw jigi kosɔn fɔɔ ka taga se kisili loon yɛrɛ yɛrɛ ma. Ala y' min latigɛ n'o bena kɛ diɲɛ laban tuma na.

⁶O la, hali k'aw to dusukasi la waati dɔɔni nin yɛrɛ kɔnɔ tɔɔrɔ sifa caaman na, aw ka nisɔndiya kosɔbɛ.

⁷Sanu min ye banta ye, ale be sɛgɛsɛgɛ tasuma na cogo min na, o cogo kelen na, aw jigi be sɛgɛsɛgɛ tɔɔrɔ nunu bolo, ale min ka fisa ni sanu ye, janko aw ka tanuli ni boɲa ani karama sɔrɔ Yezu Krista kɔsegilon.

⁸Aw ɲaa ma la a kan, nga a koo do diyara aw ye. Aw y'aw jigi la a kan, k'a sɔrɔ aw m'a ye fɔlɔ, ka nisɔndiya kosɔbɛ nisɔndiya min te se ka lakali.

⁹Bari aw kisira aw jigi kosɔn.

¹⁰Aw tun ka kan ka kisili min sɔrɔ, kiraw kumana o nɛɛma koo la, ani u ka miiriya bɛɛ tun be sinna o le ma.

¹¹Krista tun bena tɔɔrɔ ni boɲa min sɔrɔ, a ka Nii min tun be u fɛ, ale tun b'o koo yira u la, olu tun b'a fɛ k'o waati n'a kɛcogo lɔn.

¹²Ala y'a yira u la k'u ka koo te o ye, nga u tun b'o kuma fɔra ka bila aw le ye. Aw y'o kira nunu ka kumaw mɛn sisan kibaru diman fɔbagaw fɛ, Nii Senuman barika la, min cira ka bɔ sankolo la ka jigi u kan. O diyara mɛlɛkɛw ye fɔɔ u tun b'a fɛ ka koo nin ye.

¹³Ayiwa, aw labɛnnin ka to baara kama, k'aw yɛrɛ minɛ. Yezu Krista bena nɛɛma kɛ aw ye a kɔsegilon cogo min na, aw k'aw jigi la o kan kosɔbɛ.

¹⁴Aw ka mɛnni kɛ Ala fɛ i n'a fɔ denɲumanw. Aw kana taama nigɛlafɛnw kɔ i n'a fɔ aw tun b'a kɛ cogo min na k'aw to kolɔnbaliya la.

¹⁵Nga aw ka kɛ mɔgɔɲumanw ye aw ka kokɛtaw bɛɛ la i n'a fɔ aw Welebaga.

¹⁶ Bari a fɔra Ala ka kuma yɔrɔ dɔ la ko: «Aw ka kɛ mɔgɔ senumanw ye bari ne ka senu.»

¹⁷Ɔnhɔn, aw ka dalili la, aw be Ala wele ko aw Faa. A te wolomani kɛ, a be mɔgɔ bɛɛ kiti kelen kelen u ka kɛwaliw kosɔn. O tuma na sa, aw ka taama Alaɲasiran na, k'aw to diɲɛ na.

¹⁸Aw b'a lɔn ko aw kuun ma bɔ aw faaw ka koo fufafuw la ni wari ye, walima ni sanu ye min ye banta ye.

¹⁹Nga aw kunmabɔra ni joli ɲanaman le ye, Krista joli, min kɛra i n'a fɔ sagaden, fiɲɛ ni nɔɔ te min na,

²⁰min tun labɛnna o kama kabini diɲɛ ma dan fɔlɔ. Nga o koo kɛra sisan laban tuma nin na aw le kama.

²¹Ala min ye Krista kunun a sanin kɔ, ka nɔɔrɔ d'a ma, aw lara ale la Krista yɛrɛ sababu la. Aw be la Krista la cogo min na, aw jigi be Ala kan ten.

²²Aw sɔnna Ala ka tiɲɛkuma ma minkɛ, o le y'aw dusu saniya, waasa aw ka se ka ɲɔgɔn kanu badenya la ni kɔnɔgwɛ ye. Aw ka ɲɔgɔn kanu kosɔbɛ n'aw dusu bɛɛ ye.

²³Bari aw kɛra danfɛnkuraw ye min ma bɔ fɛɛn tolita la, fɔɔ fɛɛn tolibali. O kɛra Ala ka kuma barika la, kuma ɲanaman lo tuma bɛɛ,

²⁴bari: «Adamadenw bɛɛ be i ko biin. U ka dawula bɛɛ be i ko binfeeren. Biin be ja, a feeren be ben.

²⁵ Nga Matigi ka kuma be to seen kan kudayi.» O kuma nin le nana fɔ aw ye.