Read dyu Piyɛri fɔlɔ 5 Bible Online

Piyɛri fɔlɔ 5 - dyu bible

Piyɛri fɔlɔ 5

¹Minw ye Krista ka jama ɲamɔgɔw ye aw cɛma, n kaan be olu le ma sisan. Ne fana ye ɲamɔgɔ dɔ ye, Krista ye tɔɔrɔ min sɔrɔ, ne y'o seere ye. A bena na ni nɔɔrɔ min ye, n bena dɔ sɔrɔ o la. Ne b'a ɲini aw fɛ ko

² Ala y'a ka sagakulu min kalifa aw ma, aw k'o kɔlɔsi ka ɲa ni dusuɲuman ye ka kɛɲɛ ni Ala sago ye. Nga o kana kɛ jagoyako ye. Aw k'o baara nin kɛ ni timinadiya ye, tɔnɔɲini kana sɔrɔ a la.

³Minw kalifara aw ma, aw kana kuntigiya digi u la dɛ! Nga aw ka siraɲuman yira u la.

⁴O la, n'aw Kuntigiba nana, a bena masafugulan cɛnbali d'aw ma, nɔɔrɔ be min na.

⁵ Ayiwa, denmisɛnw, aw k'aw yɛrɛ majigi mɔgɔkɔrɔbaw ye. Aw bɛɛ k'aw yɛrɛ majigi ɲɔgɔn ye. Bari a fɔra Ala ka kuma na ko: «Yɛrɛboɲala ka koo man di Ala ye. Nga a be nɛɛma kɛ mɔgɔmajigininw ye.»

⁶ Aw k'aw yɛrɛ majigi Setigi Ala ye waasa n'aw kɔrɔtatuma sera a fɛ, a k'aw kɔrɔta.

⁷Aw k'aw ka haminakow bɛɛ to a bolo, bari a be janto aw la.

⁸Aw k'aw yɛrɛ kɔlɔsi dɛ! Aw labɛnnin ka to. Bari aw jugu Sutana be munumununa i n'a fɔ jara, a b'a fɛ ka dɔ le minɛ k'a ɲimi.

⁹Aw ka jija k'aw jigi to Matigi kan kosɔbɛ, waasa a kana se aw kɔrɔ. Aw k'a lɔn k'o tɔɔrɔ nin ɲɔgɔn b'aw baden tɔw kan yɔrɔ wɛrɛw la.

¹⁰Nga tɔɔrɔ dɔɔni tɛmɛnin kɔ, Nɛɛmatigi Ala min y'aw wele waasa aw k'ale ka nɔɔrɔ banbali ɲɔgɔn sɔrɔ Krista barika la, ale lo bena barika don aw la, ka fanga di aw ma, k'aw lɔ ka ɲa.

¹¹Sebagaya ka kɛ ale ta ye tuma bɛɛ. Amiina!

¹² Ne ka kuma damani nunu n be minw cira aw ma, Silivɛn le y'o sɛbɛn. N b'a jati n badensɔbɛ ye. N b'a fɛ k'aw ladi, k'a yira aw la ko Ala ka nɛɛma tigitigi lo ne ye min koo fɔ aw ye, aw bolo lanin be min kan.

¹³ Ala ye minw woloma n'u be Babilɔni, u b'aw fo. N dencɛ Mariki fana b'aw fo.

¹⁴Aw ka ɲɔgɔn fo kosɔbɛ. Aw minw bɛɛ kɛra Krista taw ye, a ka hɛrɛ kɛ aw bɛɛ ye.