Read dyu Piyɛri filanan 2 Bible Online

Piyɛri filanan 2 - dyu bible

Piyɛri filanan 2

¹Ayiwa, fɔlɔ la, kirajuguw tun be mɔgɔw cɛma. O cogo kelen na, karamɔgɔjuguw bena bɔ aw fana cɛma ka mɔgɔw kalan ni galon dɔrɔn ye min be cɛnni kɛ fɔɔ u be taga ban u Matigi la, min y'u kunmabɔbaga ye. O tuma na sa, u bena bari ka halaki.

²Mɔgɔ caaman bena sɔn u ka kakalaya ma, o bena kɛ sababu ye mɔgɔw bena tiɲɛsira tɔgɔ cɛn.

³U ka wariɲini kojugu kosɔn, u bena galon labɛn k'aw ɲagami n'o ye tɔnɔ kama. U kitibaga labɛnnin lo a mɛnna. U halakiwaati tɔɔ man jan.

⁴Mɛlɛkɛ minw ye hakɛ kɛ, Ala ma olu yɛrɛ to, nga a y'u siri ni jɔrɔkɔw ye k'u bila dingɛba kɔnɔ dibi la ka kitilon kɔnɔ.

⁵ Ala ma hinɛ fɔlɔfɔlɔ mɔgɔw la fana. A ye jiba bila ka na Alaɲasiranbaliw bɛɛ halaki k'a tɔɔ to Nuhun, min tun be tilenninyako fɔ, ani mɔgɔ wolonwula.

⁶ A ye kiti ben Sodɔmu ni Gɔmɔri dugu kan k'u jɛni k'u kɛ bugurigwɛ ye, k'a yira ko Alaɲasiranbaliw bena kɛ ten le.

⁷ Lɔti min tun ye mɔgɔɲuman ye, a tɔɔrɔnin tun be a sigiɲɔgɔnw ka kɛwalijuguw kosɔn. Ala y'ale kelenpe kunmabɔ.

⁸A tun tɔɔrɔla u cɛma, bari mɔgɔtilennin tun lo, a tun be mɔgɔw yera u ka kɛwalijuguw la, ani ka to k'u ka kuma mɛn loon o loon.

⁹O cogo kelen na, Matigi be se ka mɔgɔtilenninw kisi tɔɔrɔ ma ka mɔgɔjuguw mara kitilon kama.

¹⁰Minw be boliboli u ka nigɛlakow kɔ, n'u te Setigi Ala boɲa, u jaa ka gwɛlɛ, u daa ka bon. Ka arijana kɔnɔ fɛɛnw nɛni, o te foyi ye olu fɛ.

¹¹K'a sɔrɔ, mɛlɛkɛw lɔyɔrɔ n'u ka sebagaya ka bon n'u ta ye, olu yɛrɛ te sɔn ka lɔ Matigi ɲana ka arijana fɛɛn nunu si dɔgɔya.

¹²O mɔgɔ nunu ka kɛwaliw ni begɛnw ta kɛra kelen ye. U laban ni begɛnw ta bena kɛ kelen ye. U bena halaki. U te fɛɛn min lɔn, u be kumajugu fɔ o le koo la.

¹³Tɔɔrɔ le bena kɛ u sara ye. Bari olu kɛra dɔw tɔɔrɔko sababu ye. Ka kakalaya kɛ tilefɛ, o le ka di u ye. N'aw be dumuniba kɛ n'u ye tuma min na, u b'u ka maloyakow kɛ, ka nisɔndiya.

¹⁴Kakalaya nigɛ te bɔ u la, u be hakɛ kɛ tuma bɛɛ. Fanga te minw na, u be olu kunna cɛn. Wariko ka di u ye kojugu. U danganin lo.

¹⁵U ye siraɲuman bila ka Bozɔri deen Balamu ka koo ɲɔgɔn kɛ. A tun diyara min ye ka tilenbaliyako kɛ waasa ka wari sɔrɔ,

¹⁶ a do y'o sara sɔrɔ. Fali kumana a fɛ waasa a k'a ka nalonmanya dabila.

¹⁷O mɔgɔ nunu be i n'a fɔ kɔlɔnw, jii te minw kɔnɔ, ani sankabaw, fɔɲɔ be taga ni minw ye. Olu kɔni niyɔrɔ ye dibijugu ye.

¹⁸U be kumababa nafatanw fɔ! Minw sera ka bɔ kojugukɛlaw ka jɛɛn na sisan sisan, u be olu nigɛ k'u ben n'u farisogo nigɛlakow ye.

¹⁹U b'a fɔ olu ye k'u bena hɔrɔnya sɔrɔ. K'a sɔrɔ olu kɛra u yɛrɛ ka nigɛlakow ka jɔɔnw ye. Bari fɛɛn min fanga ka bon n'i ta ye, i y'o ka jɔɔn le ye.

²⁰Ayiwa, ni minw y'u yɛrɛ sɔrɔ ka bɔ diɲɛ nin ka kojugu la an Matigi n'an kisibaga Yezu Krista lɔnko barika la, n'o tigi segira ka don o la, ka kɛ o ka jɔɔn ye, a ka koo tɔɔ be juguya ni fɔlɔta ye.

²¹N'u tun ma tilenninya sira lɔn, o bele tun ka fisa u ma n'u banko ye Ala ka sariya nin na, min koo tun fɔra u ye.

²² U ta kɛra i n'a fɔ talen nunu b'a fɔ cogo min na ko: «Wulu be segi k'a fɔɔnɔ dumu.» Ani ko: «Lɛɛ kotɔ, a nɔgɔtɔ.»