Read dyu Zan fɔlɔ 2 Bible Online

Zan fɔlɔ 2 - dyu bible

Zan fɔlɔ 2

¹Ne deenw, ne be sɛbɛ nin cira aw ma, waasa aw kana hakɛ kɛ. Nga ni min nan'a kɛ, soronanikɛla b'an fɛ Faa Ala kɔrɔ n'o ye Yezu Krista ye, mɔgɔtilennin lo.

²Bari ale lo y'a yɛrɛ saraka k'an ka hakɛw yafa. A ma dan an dama ka hakɛw yafako ma dɛ, nga diɲɛ mɔgɔw bɛɛ ta lo fana.

³Ayiwa, n'an be Ala ka kuma bato, o la, an b'a lɔn ko an be Ala lɔn.

⁴Ni mɔgɔ min y'a fɔ ko ale be Ala lɔn k'a sɔrɔ a t'a ka kuma bato, o tigi ye galontigɛla le ye, tiɲɛ man d'a ye.

⁵Nga ni min b'a ka kuma bato, o tigi b'a yira ko Ala koo ka d'a ye kosɔbɛ daan te min na. O la, an b'a lɔn ko an ye Ala taw ye.

⁶Ni mɔgɔ min y'a fɔ ko a ye Ala ta ye, o tigi ka kan ka Yezu taamacogo ladege.

⁷ N terisɔbɛw, ne te cikura sɛbɛnna k'a ci aw ma, nga cii kɔrɔman lo, min fɔra aw ye kabini a daminɛtuma na. Aw y'o mɛn ka kɔrɔ.

⁸O n'a ta bɛɛ, cikura lo ni ne b'a sɛbɛnna aw ye. Krista y'o yira ko tiɲɛ lo, ani aw fana. Bari, dibi be tagara, kɛnɛsɔbɛ be bɔra.

⁹Ni mɔgɔ min ko ale kɔnɔ gwɛnin lo k'a sɔrɔ a mɔgɔɲɔgɔn koo man d'a ye, o tigi ye dibi kɔnɔ mɔgɔ le ye halibi.

¹⁰Nga ni mɔgɔ min b'a mɔgɔɲɔgɔn kanu, o tigi gwɛnin lo, a te kɛ sababu ye k'a tɔɲɔgɔn bila kojugu la.

¹¹Ni mɔgɔ min b'a mɔgɔɲɔgɔn kɔniya, o tigi ye dibi kɔnɔ mɔgɔ ye, n'a be taamana o dibi nin kɔnɔ, a t'a kuun tilenyɔrɔ lɔn. Bari a te yeli kɛ.

¹²Ne deenw, n be nin sɛbɛn k'a ci aw ma ko aw ka hakɛw yafara Yezu tɔgɔ le sababu la.

¹³Ne be nin sɛbɛn k'a ci aw denfaw ma, ko mɔgɔ min be yen kabini fɛɛn si ma dan fɔlɔ, aw b'o lɔn. Ne be nin sɛbɛn k'a ci aw kanbelenw ma ko aw ye see sɔrɔ Fɛnjugu kan.

¹⁴Ne deenw, ne y'a sɛbɛn k'a ci aw ma ko aw be Faa Ala lɔn. Ne y'a sɛbɛn k'a ci aw denfaw ma ko mɔgɔ min be yen kabini fɛɛn si ma dan fɔlɔ, aw b'o lɔn. Ne y'a sɛbɛn k'a ci aw kanbelenw ma, ko fanga b'aw la, Ala ka kuma jiidinin be aw dusu la. Ani ko aw sera Fɛnjugu kɔrɔ.

¹⁵Aw kana diɲɛ n'a kɔnɔnafɛnw koo diya aw yɛrɛ ye. Ni mɔgɔ min be diɲɛ koo diya a yɛrɛ ye, Faa Ala koo te se ka diya o tigi ye.

¹⁶Bari farisogo nigɛlakow, ɲadenw ka miyɛntɔya, jigimafakojugu, o koo nunu si te bɔ Faa Ala fɛ do, o bɛɛ be bɔ diɲɛ na le.

¹⁷Mɔgɔw be boli diɲɛ n'a kɔnɔnafɛn minw kɔ, olu do ye banta le ye. Nga ni mɔgɔ min be Ala sago kɛ, o tigi ka koo tena ban.

¹⁸Ne deenw, diɲɛ labantuma surunyana. Aw y'a mɛn ko Krista jugu ka kan ka na. K'a sɔrɔ a juguw yɛrɛ ka ca bii nin na. An b'a lɔn o le fɛ ko diɲɛ labantuma surunyana.

¹⁹U bɔra anw cɛma le, nga u tun t'an dɔw ye bɛrɛbɛrɛ, ni an dɔw tun lo, u tun be to n'an ye. Nga a kɛra ten waasa a k'a yira ko an dɔ te u ye tiɲɛ na.

²⁰Aw kɔni, Nii Senuman y'aw woloma ka jigi aw kan. Aw bɛɛ b'a lɔn,

²¹a ma kɛ ko aw te tiɲɛ lɔn, k'o le y'a to ne ye sɛbɛ nin ci aw ma, ne y'a ci aw ma bari aw be tiɲɛ lɔn. Aw b'a lɔn ko galon ni tiɲɛ te kelen ye.

²²Mɔgɔ min b'a fɔ ko Yezu te Ala ka mɔgɔ wolomanin ye, o tigi le ye galontigɛla ye. Krista jugu le be ban Faa Ala n'a Dencɛ la.

²³Ni mɔgɔ min banna Ala Dencɛ la, o tigi te Faa Ala fɛ fana. Ni min sɔnna a ma, o tigi be Faa Ala fɛ fana.

²⁴Aw kɔni, min fɔra fɔlɔ la n'aw y'a mɛn, aw k'o mara ka ɲa aw dusu la. Aw ye min mɛn kabini fɔlɔ la, n'o tora aw dusu la, Faa Ala n'a Dencɛ bena to n'aw ye.

²⁵Krista y'a daa di an ma koo min na, o ye nii banbali ye.

²⁶Mɔgɔ minw b'a fɛ k'aw lafili, ne be sɛbɛ nin cira aw ma olu ka koo la.

²⁷N'o tɛ aw kɔni, aw ye Krista ka Nii Senuman min sɔrɔ, o b'aw fɛ. Aw be koo lɔn, kalankun t'aw la. Nii Senuman b'aw kalan koo bɛɛ la. A b'aw kalan ni min ye, galon si t'o la. Aw ye l'a la ɲanaman ka nɔrɔ Krista la.

²⁸Ayiwa, ne deenw, aw ye nɔrɔ ka ɲa Krista la waasa a bena kɔsegi loon min na, o k'a sɔrɔ jigi b'an fɛ, an kana maloya sɔrɔ.

²⁹Aw b'a lɔn ko Krista ka koo tilennin lo. Ayiwa, aw k'a lɔn fana ko ni mɔgɔ o mɔgɔ be kotilennin kɛ, k'o tigi ye Ala deen ye.