Read dyu Zan fɔlɔ 3 Bible Online

Zan fɔlɔ 3 - dyu bible

Zan fɔlɔ 3

¹ Aw m'a ye an koo diyara Faa Ala ye cogo min na wa, fɔɔ an be wele yɛrɛ ko Ala deenw. An ye Ala deenw ye tiɲɛ na! O kama, Ala juguw t'an lɔn, bari u te Ala lɔn.

²Ne terisɔbɛw, k'a ta sisan ma, an ye Ala deenw ye. Nga an bena kɛ fɛɛn min ye tigitigi, o le ma gwɛ fɔlɔ. An be min lɔn, ni Krista segira ka na tuma min na, ale be cogo min na, an fana bena kɛ ten. Bari an ben'a ye ten.

³Mɔgɔ o mɔgɔ jigi b'a kan, o tigi b'a yɛrɛ saniya i n'a fɔ Yezu Krista yɛrɛ be cogo min na.

⁴Mɔgɔ o mɔgɔ be hakɛ kɛ, o tigi te Ala ka sariya bato, bari sariya batobaliya, o le ye hakɛ ye.

⁵ Aw b'a lɔn ko Yezu nana janko ka mɔgɔw ka hakɛw yafa, a ma hakɛ si kɛ.

⁶Ayiwa, ni mɔgɔ o mɔgɔ nɔrɔnin be Krista la, o tigi te hakɛ kɛ tugu, nga ni min be hakɛ kɛ, o tigi te Krista ye, a t'a lɔn fana.

⁷Ne deenw, aw kan'a to mɔgɔ si b'aw lafili. Mɔgɔ o mɔgɔ be tilenninya sira taama, o tigi ye mɔgɔtilennin ye i n'a fɔ ale Yezu Krista.

⁸Min be to ka hakɛ kɛ, o tigi ye Sutana ka mɔgɔ ye, bari Sutana ye hakɛkɛla ye kabini fɔlɔfɔlɔ. Ala Dencɛ nana, waasa ka Sutana ka kɛwaliw cɛn.

⁹Mɔgɔ o mɔgɔ kɛra Ala deen ye, o tigi te hakɛ kɛ tugu. Bari Ala y'a Faa ye. A te se ka to hakɛkɛ la tugu bari Ala deen lo.

¹⁰Ala deenw ni Sutana ka mɔgɔw be lɔn ka bɔ ɲɔgɔn na kɛwali nunu le fɛ. Mɔgɔ o mɔgɔ te tilenninya sira taama, ani n'a t'a mɔgɔɲɔgɔn kanu, o tigi te Ala ta ye.

¹¹ An ka kan ka ɲɔgɔn kanu. Aw y'o le mɛn kabini koow daminɛtuma na.

¹² An man kan ka Kayɛn ladege, min kɛra Sutana ka mɔgɔ ye k'a dɔgɔnin faga. Mun na a y'a faga? A y'a faga bari ale Kayɛn tun ye baarajugukɛla ye, k'a sɔrɔ a dɔgɔnin tun ye mɔgɔɲuman ye.

¹³N badenw, ni mɔgɔw b'aw kɔniya, o kana aw dabari ban.

¹⁴ An b'a lɔn ko an bɔra saya la ka don ɲanamanya la, bari an b'an mɔgɔɲɔgɔn kanu. Mɔgɔ min te a mɔgɔɲɔgɔn kanu, o tigi be i n'a fɔ suu.

¹⁵Mɔgɔ o mɔgɔ b'a mɔgɔɲɔgɔn kɔniya, o tigi ye mɔgɔfagala le ye. Aw b'a lɔn ko mɔgɔfagala si te se ka nii banbali sɔrɔ.

¹⁶Yezu Krista y'a nii saraka anw kosɔn. An be kanuya lɔn o le fɛ. An fana ka kan k'an nii saraka an mɔgɔɲɔgɔn kosɔn.

¹⁷Fɛɛn be mɔgɔ min bolo n'a te dɛsɛbagatɔ dɛmɛ, o tigi be se k'a fɔ cogo di ko ale be Ala kanu?

¹⁸Ne deenw, an kan'a fɔ an daa la dɔrɔn ko an tɔɲɔgɔn koo ka di an ye. Nga an k'a yira tiɲɛ na n'an ka kɛwaliw ye.

¹⁹N'an mɔgɔɲɔgɔnw koo ka d'an ye, an b'a lɔn o le fɛ ko an be tiɲɛ kan. Ani an hakili be sigi Ala ɲakɔrɔ.

²⁰N'an kɔnɔnako b'an jalaki, Ala ka bon n'an kɔnɔnako ye. Ale be koo bɛɛ lɔn.

²¹Ne terisɔbɛw, n'an kɔnɔnako t'an jalaki, an be se ka Ala daali ni hakilisigi ye.

²²An mana fɛɛn o fɛɛn daali a fɛ, an b'o sɔrɔ bari an b'a ka sariya bato k'a sago kɛ.

²³ A ka sariya filɛ nin ye, ko an ka la a Deen Yezu Krista la, ani ka ɲɔgɔn kanu. Ale yɛrɛ le y'o cii nin don an bolo.

²⁴Ni mɔgɔ min b'a ka sariya nin bato, Ala b'o tigi fɛ, o tigi ye Ala ta ye. An b'a lɔn o fɛ ko Ala b'an fɛ, a ka Nii Senuman barika la a ye min d'an ma.