Read dyu Zan fɔlɔ 4 Bible Online

Zan fɔlɔ 4 - dyu bible

Zan fɔlɔ 4

¹Ne terisɔbɛw, mɔgɔ minw ko Nii Senuman b'u fɛ, aw kana la olu bɛɛ la. Nga aw k'u sɛgɛsɛgɛ fɔlɔ k'a filɛ ni Ala ta lo. Bari kirakolon caaman be diɲɛ na sisan.

²Aw be se ka Ala ka Nii lɔn nin cogo la: Ni mɔgɔ o mɔgɔ b'a fɔ ko Yezu Krista nana ka adamaden cogo yɛrɛ lo ta, o tigi ye Ala ta ye.

³Nga ni min be ban o ma, o tigi te Ala ta ye, Krista jugu lo, aw ye min nako mɛn ka kɔrɔ. Ayiwa, kabini sisan, a be diɲɛ kɔnɔ ka ban.

⁴Ne deenw, aw kɔni ye Ala taw ye. Aw sera kira nunu kɔrɔ bari Nii Senuman be ni aw ye. Ale fanga ka bon ni Sutana ta ye, min be diɲɛ kɔnɔ.

⁵Olu kɔni ye diɲɛ nin taw ye. O la, u ka kuma ye diɲɛ ta ye, diɲɛ mɔgɔw le be mɛnni kɛ u fɛ fana.

⁶Anw kɔni, anw ye Ala taw ye. Mɔgɔ o mɔgɔ min be Ala lɔn, o tigi be mɛnni kɛ anw fɛ. Nga ni min te Ala ta ye, o te mɛnni kɛ an fɛ. A kɛra ten, Nii Senuman min ye tiɲɛtigi ye, an be se k'ale lɔn ka bɔ galontigɛla la.

⁷Ne terisɔbɛw, aw ye ɲɔgɔn kanu bari n'i ko Ala, i ko ɲɔgɔn kanuya. Mɔgɔ o mɔgɔ b'a mɔgɔɲɔgɔn kanu, o tigi ye Ala deen ye, a be Ala lɔn.

⁸Nga ni min t'a mɔgɔɲɔgɔn kanu, o tigi te Ala lɔn. Bari n'i ko Ala, i ko kanuya le.

⁹Dencɛ kelenpe min be Ala fɛ, a y'o ci diɲɛ na waasa an ka balo ale barika la. Ala y'a ka kanuya yira an na ten le.

¹⁰Kanuya filɛ nin ye. A ma kɛ i n'a fɔ anw ye Ala kanu! Ale lo y'an kanu k'a Dencɛ ci an ma. An ka hakɛw yafara ale ka yɛrɛ saraka barika la.

¹¹Ne terisɔbɛw, ni Ala y'an kanu ten, an fana ka kan ka ɲɔgɔn kanu dɛ!

¹² Mɔgɔ si ɲaa ma deli ka la Ala kan ka ye. Nga n'an be ɲɔgɔn kanu, o b'a yira ko Ala b'an fɛ. Ni Ala b'an fɛ, a ye kanuya min don an dusu la, o be kɛ ko dafanin ye.

¹³An b'a lɔn ko Ala b'an fɛ, ani ko anw kɛra a taw ye, bari a y'a yɛrɛ Nii le di an ma.

¹⁴Faa Ala y'a Dencɛ ci diɲɛ na, waasa ka mɔgɔw kisi. Anw ɲaa lara o kan, anw b'o seereya kɛ.

¹⁵Ni mɔgɔ o mɔgɔ y'a fɔ ko Yezu ye Ala deen ye, o tigi ye Ala ta ye, ani Ala b'o tigi fɛ.

¹⁶Ala b'an kanu cogo min na, anw kɔni b'o lɔn, ani anw lara o la. N'i ko Ala, i ko kanuya. Ni mɔgɔ min b'a mɔgɔɲɔgɔn kanu, o tigi nɔrɔnin be Ala la, Ala fana be n'o tigi ye.

¹⁷Ni kanuya dafanin be an dusu la, an hakili bena sigi Ala ka kiti tigɛlon na. Bari Yezu Krista n'a Faa be ɲɔgɔn fɛ cogo min na, k'anw to diɲɛ nin kɔnɔ, an fana be ten.

¹⁸Kanuya be yɔrɔ min na, siranya te yen. Kanuyasɔbɛ be siranya ban. Bari ni siranya koo be fɔ yɔrɔ min na, o be jalakiko yira. Mɔgɔ min be siran, kanuyasɔbɛ te o tigi la.

¹⁹Anw kɔni, kanuya b'an na, bari Ala le kɔnna k'an kanu.

²⁰Ni mɔgɔ min y'a fɔ ko Ala koo ka di a ye k'a sɔrɔ a b'a mɔgɔɲɔgɔn kɔniya, o tigi ye galontigɛla ye. A ɲaa be a mɔgɔɲɔgɔn min na, n'a t'o kanu, a te se ka Ala kanu, a ɲaa te min na.

²¹Ayiwa, Krista ye cii min d'an ma, o filɛ nin ye, a ko: Ni Ala koo ka di mɔgɔ min ye, o tigi ka kan k'a mɔgɔɲɔgɔn fana kanu.