Read dyu Cɛfariw ka kitabu 1 Bible Online

Cɛfariw ka kitabu 1 - dyu bible

Cɛfariw ka kitabu 1

¹Zozuwe sanin kɔ, Isirayɛlidenw ye Masaba ɲininga k'olu cɛma, jɔn le ka kan ka kɔn ka taga kanaanw kɛlɛ.

²Masaba y'u jaabi ko: «Zuda kɔmɔgɔw le bena kɔn ka taga, ne ye jamana nin don u bolo.»

³O la, Zuda kɔmɔgɔw y'a fɔ u baden Simeyɔn kɔmɔgɔw ye ko: «Aw k'a to an be taga ɲɔgɔn fɛ ka kanaanw kɛlɛ an ka yɔrɔ la. O kɔ, an fana bena taga n'aw ye k'aw ka mara taw fana kɛlɛ.» O la, Simeyɔn kɔmɔgɔw korila ka taga n'u ye.

⁴Zuda kɔmɔgɔw tagara Kanaan nunu kɛlɛ. Masaba y'u don u bolo, ni periziw fana, Zuda kɔmɔgɔw ye mɔgɔ waa tan (10 000) faga Bɛzɛki.

⁵U ye Adoni Bɛzɛki sɔrɔ yen, k'a kɛlɛ, ka kanaanw ni periziw kɛlɛ ka se u kɔrɔ.

⁶Adoni Bɛzɛki bɔra ka boli. U y'a gwɛn ka ta'a minɛ k'a bolokunnadenbaw n'a senkunnadenbaw tigɛ.

⁷A y'a fɔ ko: «Masacɛ bi wolonwula bolokunnadenbaw ni senkunnadenbaw tigɛninw le tun be to ka ne ka dumuni murumuruw tɔmɔ duguma. Ne ye fɛɛn min kɛ, Ala y'o ɲɔgɔn le juru sara ne ye.» U y'a minɛ ka taga n'a ye Zeruzalɛmu, a sara o yɔrɔ la.

⁸O kɔ, Zuda kɔmɔgɔw ye Zeruzalɛmu dugu kɛlɛ ka se a kɔrɔ ka dugumɔgɔw halaki ni murujan ye, ka dugu nin jɛni.

⁹U fana tagara k'u be kanaanw kɛlɛ minw be kongokolon kɔnɔ worodugu ɲafan na, ani kuluw yɔrɔ la, ni kulujukɔrɔ mara la.

¹⁰Kanaan minw tun siginin be Eburɔn min tun be wele fɔlɔfɔlɔ ko Kiriyataraba, u tagara olu kɛlɛ. U fana ye Sesayi ni Ayiman ani Talimayi ka fadenyabolow kɛlɛ ka se u kɔrɔ.

¹¹U bɔra o yɔrɔ la ka taga Debirikaw kɛlɛyɔrɔ la. Fɔlɔfɔlɔ, Debiri tɔgɔ tun ye Kiriyatisefɛri ye.

¹²Kalɛbu tun y'a fɔ ko ni mɔgɔ min sera ka Kiriyatisefɛri dugu kɛlɛ k'a minɛ, ko ale ben'a denmuso Akisa di o tigi ma.

¹³Ale Kalɛbu dɔgɔcɛ Kenazi dencɛ Otiniyɛli ye dugu nin kɛlɛ k'a minɛ. O la, Kalɛbu y'a denmuso Akisa d'a ma furu la.

¹⁴Otiniyɛli y'a furu ka ban yɔrɔ min na dɔrɔn, a y'a fɔ Otiniyɛli ye ko a ka foro daali a facɛ fɛ. Muso nin jigira ka bɔ a ka fali kan, Kalɛbu y'a fɔ a ye ko: «Mun le kɛra?»

¹⁵A y'a fɔ ko: «I ka ɲa ne ma ka n sɔn, bari i ye yɔrɔ di ne ma worodugu ɲafan na, i ka jiyɔrɔw di n ma fana.» Dalan min be sanfɛla la, ani min be jukɔrɔ, a ye olu le d'a ma.

¹⁶Musa birancɛ kenicɛ kɔmɔgɔw bɔra Tamarosundugu ka taga ni Zuda kɔmɔgɔw ye ka taga sigi Zuda mara kongokolon na Aradi worodugu ɲafan na ni o yɔrɔ mɔgɔw ye.

¹⁷Kanaan minw tun be Sefati, Zuda kɔmɔgɔw n'u badenw, Simeyɔn kɔmɔgɔw wilila ka taga olu kɛlɛ, ka dugu nin halaki pewu ka tila k'a tɔgɔ la ko Ɔrima, o kɔrɔ ko halakili.

¹⁸Zuda kɔmɔgɔw ye Gaza n'a mara fana kɛlɛ, ani Asikalɔn ni Ekurɔn n'u maraw ka se u kɔrɔ.

¹⁹Masaba tun tora Zuda kɔmɔgɔw fɛ. U sera ka kuluyɔrɔ minɛ, nga u ma se ka kɔkɛnɛ minɛ k'o yɔrɔ mɔgɔw gwɛn, bari wotoro nigɛlamanw tun be olu fɛ.

²⁰U ye Eburɔn di Kalɛbu ma ka kɛɲɛ ni Musa ka fɔta ye. Kalɛbu ye Anaki deen saba kɔmɔgɔw gwɛn.

²¹ Bɛnzamɛn kɔmɔgɔw ma se ka zebuziw gwɛn, olu minw tun siginin be Zeruzalɛmu. U tora yen ni Bɛnzamɛn kɔmɔgɔw ye fɔɔ ka na se bii ma.

²²Yusufu kɔmɔgɔw fana wilila ka taga Betɛli kɛlɛ, Masaba farala u kan.

²³U ye mɔgɔw ci ka taga Betɛli kɔlɔsi, min tun be wele fɔlɔfɔlɔ ko Luzi.

²⁴Kɔlɔsilikɛbaga nunu ye mɔgɔ dɔ ye n'a be bɔra dugu nin kɔnɔ. U y'a fɔ a ye ko a ka donyɔrɔ yira olu la, k'o la, olu fana bena koɲuman kɛ a ye.

²⁵Cɛɛ nin ye donyɔrɔ yira u la. U ye dugu nin kɛlɛ k'a halaki ni murujan ye, nga u ye cɛɛ nin n'a ka mɔgɔw bɛɛ to u tagara.

²⁶Cɛɛ nin bɔra ka taga itiw ka jamana na, ka dugu dɔ sigi o yɔrɔ la k'a tɔgɔ la ko Luzi. O le kɛr'a tɔgɔ ye fɔɔ ka na se bii ma.

²⁷ Manase kɔmɔgɔw ma se ka Bɛtiseyankaw, ani Tanakikaw, ni Dɔrikaw, ani Yibileyamukaw, ni Megidokaw n'u laminimɔgɔw gwɛn, kanaanw tora o mara nin kɔnɔ.

²⁸Isirayɛlidenw nana fanga sɔrɔ tuma min na, u ye kanaanw bila fangabaara la, u ma se k'u gwɛn.

²⁹ Kanaan minw tun be Gezɛri, Efarayimu kɔmɔgɔw fana ma se ka olu gwɛn. Kanaanka nunu tora n'u ye Gezɛri.

³⁰Zabulɔn kɔmɔgɔw ma se ka Kitirɔnkaw ni Naalɔlikaw gwɛn. Kanaan nunu tora u cɛma, nga u tun be to k'u ka fangabaara kɛ.

³¹Asɛri kɔmɔgɔw tun ma se ka Akokaw gwɛn, ni Sidɔnkaw, ani Alabukaw ni Akizibukaw, ani Ɛlibakaw ni Afikikaw, ani Erewɔbukaw.

³²A kɛra ten, Asɛri kɔmɔgɔw sigira kanaanw cɛma, minw tun sigira jamana nin kɔnɔ ka kɔrɔ, bari u tun ma se k'u gwɛn.

³³Nɛfutali kɔmɔgɔw ma se ka Bɛtisɛmɛsikaw ni Bɛtanatikaw gwɛn. U sigira kanaanw cɛma, minw tun be jamana nin kɔnɔ ka kɔrɔ, nga Bɛtisɛmɛsikaw ni Bɛtanatikaw tun be to k'u ka fangabaara kɛ.

³⁴Amoriw tun ye Dan kɔmɔgɔw gwɛn ka taga u bila kuluyɔrɔ la, u ma sɔn u be jigi kɔkɛnɛ na.

³⁵Amoriw tora Arɛrɛsi kɔnɔ, ni Ayalɔn ani Salibimu. Nga Yusufu kɔmɔgɔw ma se u kɔrɔ, u y'u fana bila fangabaara la.

³⁶Amoriw ka mara tun be daminɛ Akirabimu kulu ma fɔɔ ka taga se Farakan, ka tɛmɛ.