Read dyu Cɛfariw ka kitabu 10 Bible Online

Cɛfariw ka kitabu 10 - dyu bible

Cɛfariw ka kitabu 10

¹Abimelɛki sanin kɔ, Isakari kɔmɔgɔ Dodo deen Puwa dencɛ Tola wilila ka Isirayɛlidenw kisi. A tun siginin be Samiri, Efarayimu mara kuluyɔrɔ la.

²A sigira Isirayɛlidenw kunna fɔɔ ka se saan mugan ni saba. O kɔ, a sara, u y'a suu don Samiri.

³Ale fana tɛmɛnin kɔ, Galaadika Yayiri wilila ka kɛ u kuntigi ye saan mugan ni fila kɔnɔ.

⁴Dencɛ bi saba tun b'a fɛ, olu tun be to ka yɛlɛ faliden bi saba fana kan. U tun siginin be dugu bi saba kunna, Galaadi mara la, minw be wele halibi Yayiri ka sigiyɔrɔ.

⁵O kɔ, Yayiri sara, u y'a suu don Kamɔn.

⁶O kɔ, Isirayɛlidenw ye kojugu kɛ Masaba ɲakɔrɔ tugu. U ye *Baali ni *Asitarite sɔn yɔrɔ caaman na, ani Sirikaw ka joow, ni Sidɔnkaw, ani mowabuw ni amoniw, ni filisiw taw. U ye Masaba to yen u m'a bato tugu.

⁷O la, Masaba dimina, a y'u don filisiw ni amoniw bolo.

⁸Olu y'u tɔɔrɔ kosɔbɛ o saan nin na. Isirayɛliden minw bɛɛ tun be Zurudɛn baji kɔfɛ, amoriw ka jamana na Galaadi mara la, u ye olu tɔɔrɔ saan tan ni seegi kɔnɔ.

⁹Amoniw fana ye Zurudɛn baji tigɛ janko ka taga Zuda kɔmɔgɔw kɛlɛ ni Bɛnzamɛn kɔmɔgɔw, ani Efarayimu kɔmɔgɔw. O kɛra dusukasiba ye Isirayɛlidenw fɛ.

¹⁰O la, Isirayɛlidenw kasira Masaba nɔɔ fɛ k'a fɔ ko: «An y'i hakɛ ta, bari an y'i to yen, e min ye an ka Ala ye, ka Baali sɔn yɔrɔ caaman na.»

¹¹Masaba y'a fɔ u ye ko: «Tuma min na Ezipitikaw, ni amoriw ani amoniw ni filisiw,

¹²ani Sidɔnkaw ni amalɛkiw ani mawɔniw tun ye aw tɔɔrɔ, aw kulera ne nɔɔ fɛ, ne m'aw bɔsi u bolo wa?

¹³Nga aw ye ne to yen ka taga joow sɔn. O le y'a to ne tena aw kisi tugu.

¹⁴Aw tun ye joo minw woloma, aw ka banba ka dɛmɛ ɲini olu fɛ. Olu k'aw kisi aw tɔɔrɔwaati la!»

¹⁵Isirayɛlidenw y'a fɔ Masaba ye ko: «An ye hakɛ kɛ. Fɛɛn min ka di i ye, i k'o kɛ an na. A daan ye i ka makari an na k'an bɔsi bii dɔrɔn.»

¹⁶U ye siya wɛrɛw ka joo nunu ta k'u fili, ani ka Masaba bato. Isirayɛlidenw ka tɔɔrɔ digira Masaba la fɔɔ a ma se k'o muɲu tugu.

¹⁷Amoniw ye ɲɔgɔn lajɛn ka na sigi Galaadi mara la, Isirayɛlidenw fana ye ɲɔgɔn lajɛn ka na sigi Misipa.

¹⁸Galaadikaw n'u ɲamɔgɔw tora ka ɲɔgɔn ɲininga ko: «Jɔn le bena kɔn ka kɛlɛ daminɛ ni amoni nunu ye? Ni min y'o kɛ, o tigi bena kɛ kuntigi ye Galaadi mara la.»