Read dyu Cɛfariw ka kitabu 11 Bible Online

Cɛfariw ka kitabu 11 - dyu bible

Cɛfariw ka kitabu 11

¹Zɛfite tun ye kɛlɛdenŋana ye. Galaadika tun lo. A bamuso tun ye kakalamuso dɔ ye, a facɛ tɔgɔ tun ko Galaadi.

²Galaadi ka muso yɛrɛ ye dencɛw sɔrɔ. Olu boɲana tuma min na, u ye Zɛfite gwɛn ka bɔ u cɛma k'a fɔ a ye ko a te se ka olu faa ka cɛɛn ta ni olu ye, ko bari muso wɛrɛ deen lo.

³O la, Zɛfite bolil'a fadenw ɲa ka taga sigi yɔrɔjan. A tun siginin be Tɔbu jamana na. Mɔgɔkolonw tagara ɲɔgɔn lajɛn a fɛ. U tun be to ka taga cɛnni kɛ ɲɔgɔn fɛ.

⁴Waati dɔɔni tɛmɛnin kɔ, amoniw wilila ka Isirayɛlidenw kɛlɛ.

⁵Amoniw tun b'u kɛlɛ minkɛ, o la Galaadi cɛkɔrɔbaw tagara Zɛfite fɛ Tɔbu jamana na

⁶k'a fɔ a ye ko a ka na kɛ olu ɲamɔgɔ ye u ka se ka amoniw kɛlɛ.

⁷Zɛfite y'a fɔ u ye ko: «Aw tun ma ne kɔniya ka ne gwɛn ka bɔ ne facɛ ka soo wa? Mun na gwɛlɛya sera aw ma, aw be na ne fɛ?»

⁸Galaadi cɛkɔrɔbaw y'a fɔ a ye ko: «N'i y'a ye ko anw kɔsegira ka na i fɛ sisan, an y'o kɛ janko i ka taga n'anw ye ka amoniw kɛlɛ, ani ka kɛ an kuntigi ye, ani Galaadikaw bɛɛ ta.»

⁹A y'a fɔ cɛkɔrɔba nunu ye ko: «Ni aw ye ne minɛ ka taga ni ne ye ka amoniw kɛlɛ, ni Masaba y'u don ne bolo, ne le bena kɛ aw kuntigi ye.»

¹⁰Cɛkɔrɔba nunu y'a fɔ Zɛfite ye ko: «I ye min fɔ an ye, ni an m'o kɛ, Masaba ɲaa b'an na.»

¹¹O kɔ, Zɛfite wilila ka taga ni Galaadi cɛkɔrɔbaw ye. Jama y'a kɛ u kuntigi n'u ɲamɔgɔ ye. A tun ye kuma minw fɔ ka tɛmɛ, a segira olu bɛɛ kan Masaba ɲakɔrɔ Misipa.

¹²Zɛfite ye mɔgɔw bila ka ta'a fɔ amoniw ka masacɛ ye ko mun le b'u ni ɲɔgɔn cɛ, n'a be n'ale kɛlɛyɔrɔ la, ale n'a ka jamana.

¹³A y'a fɔ Zɛfite ka ciden nunu ye ko Isirayɛlidenw le ye ale ka jamana minɛ o bɔtuma na Ezipiti jamana na, k'a ta Arinɔn kɔɔ daa la fɔɔ Yabɔki kɔɔ daa la ka taga fɔɔ Zurudɛn baji daa la. Ko a ka segi k'o di ni ɲasuma ye.

¹⁴Zɛfite ye mɔgɔ dɔw ci a fɛ tugu

¹⁵k'a fɔ a ye ko: «Isirayɛlidenw ma mowabuw ni amoniw ka jamana minɛ.

¹⁶Bari Isirayɛlidenw bɔra Ezipiti jamana na tuma min na, u taamana kongokolon kɔnɔ fɔɔ ka na se Buruku kɔgɔji ma ka tɛmɛ ka se Kadɛsi.

¹⁷ U tun ye mɔgɔ bila ka taga Edɔmu masacɛ fɛ ko a ka olu to u be tɛmɛ a ka jamana kɔnɔ, nga ale ma sɔn. U ye dɔ ci Mowabu masacɛ fana fɛ, ale fana ma sɔn. O la, u tora Kadɛsi.

¹⁸ O kɔ, u tɛmɛna ni kongokolon ye ka taga munumunu Edɔmu jamana ani Mowabu jamana kɔfɛ. U sera Mowabu jamana kɔrɔn ɲafan fɛ, u tagara sigi Arinɔn kɔɔ kɔfɛ. U ma don Mowabu jamana kɔnɔ, bari Arinɔn kɔɔ be Mowabu daan na.

¹⁹ O kɔ, u ye mɔgɔ dɔw ci amoriw ka masacɛ Siŋɔn fɛ, min ye masa ye Ɛsibɔn, k'a fɔ ale ye ko a ka olu to u be tɛmɛ a ka jamana kɔnɔ ka taga u taayɔrɔ la.

²⁰Nga Siŋɔn tun ma la Isirayɛlidenw na kosɔbɛ k'u to u be tɛmɛ a ka jamana kɔnɔ. O la, a y'a ka jama bɛɛ lajɛn ka taga sigi Yaasa k'u kɛlɛ.

²¹Masaba, Isirayɛli ka Ala ye Siŋɔn n'a ka jama bɛɛ don u bolo, Isirayɛlidenw sera u kɔrɔ. U ye amoriw ka jamana bɛɛ minɛ, u siginin tun be min kɔnɔ.

²²A ye amoriw ka jamana bɛɛ minɛ k'a ta Arinɔn kɔɔ daa la fɔɔ ka na se Yabɔki kɔɔ daa la, ani k'a ta kongokolon ma, fɔɔ ka na se Zurudɛn baji ma.

²³«Masaba, Isirayɛli ka Ala ye amoriw gwɛn ka bɔ a ka jama Isirayɛli ɲa, o tuma na, e b'a fɛ ka kɛ o jamana tigi ye wa?

²⁴E ka joo *Kemɔsi ye fɛɛn min d'i ma, e t'o minɛ k'a kɛ i ta ye wa? Masaba an ka Ala fana n'a ye fɛɛn min d'an ma, an fana b'o kɛ an ta ye.

²⁵ E ka fisa ni Sipɔri dencɛ Balaki ye wa? Min tun ye Mowabu masacɛ ye. Ale ma sɔn ka Isirayɛlidenw darabɔ ka kɛlɛ kɛ n'u ye do!

²⁶Isirayɛlidenw siginin be Ɛsibɔn, n'a gɛrɛfɛ duguw kɔnɔ, ni Arowɛri n'a gɛrɛfɛ duguw, ani dugu minw bɛɛ be Arinɔn kɔɔ daa la, o be se saan kɛmɛ saba ma. Mun na aw ma u gwɛn o saan nunu kɔnɔ?

²⁷Ne ma i hakɛ ta, e do be kojugu kɛra ne la ka kɛlɛ ɲini ne fɛ. Masaba tiɲɛfɔla ka Isirayɛlidenw ni amoniw faran ka bɔ ɲɔgɔn na bii.»

²⁸Amoniw ka masacɛ ma sɔn ka mɛnni kɛ Zɛfite fɛ.

²⁹Masaba ka Nii tora Zɛfite fɛ. A ye Galaadi ni Manase mara cɛtigɛ ka taga Misipe, Galaadi mara la, ka bɔ o yɔrɔ la, ka don amoniw fɛ.

³⁰O yɔrɔ la, a ye dajuru ta Masaba ye ko: «N'i sɔnna ka amoniw don ne bolo,

³¹ne kɔsegitɔ ka bɔ o yɔrɔ la ni hɛrɛ ye, mɔgɔ min bena kɔn ka bɔ ne ka soo kɔnɔ ka ne kunbɛn, o tigi bena kɛ e Masaba ta ye. Ne ben'o kɛ saraka jɛnita ye.»

³²O kɔ, a tagara amoniw kɛlɛ, Masaba y'u don a bolo.

³³Zɛfite ye dugu mugan halaki u fɛ k'a ta Arowɛri, Miniti faan fɛ, fɔɔ ka taga se Abɛlikeramimu. A kɛra ten, Isirayɛlidenw sera amoniw kɔrɔ.

³⁴O kɔ, Zɛfite kɔsegira ka na a ka soo Misipa. A denmuso bɔra k'a kunbɛn ni dundunw ye n'a be dɔɔn kɛ. O le tun ye a ka deen dama ye, dencɛ ni denmuso wɛrɛ si tun t'a fɛ.

³⁵ Zɛfite ye sunguru nin ye dɔrɔn, a y'a kuun minɛ k'a fɔ ko: «N denmuso, i ye ne bila dusukasi la, ka ne nii tɔɔrɔ! Ne ye n daa di Masaba ma, ne te se k'a yɛlɛma tugu.»

³⁶Sunguru nin y'a fɔ ko: «Ne faa, n'i y'i daa di Masaba ma, i k'o koo kɛ ne la ka kɛɲɛ n'i ka fɔta ye. Bari, Masaba y'i mɔnɛ bɔ ka ban i juguw la, minw ye amoniw ye.»

³⁷A y'a fɔ tugu ko: «I ka kalo fila di ne ma. Ne bena taga yaala kuluw yɔrɔ la ka kasi n ka furubaliya bɔnɛ la ni n tɔɲɔgɔnw ye.»

³⁸Zɛfite ye sira d'a ma, a ka taga kalo fila kɛ. A tagara n'a tɔɲɔgɔnw ye, k'a ka bɔnɛ kasi kɛ kuluw kan.

³⁹Kalo fila nunu tɛmɛnin kɔ, a segira ka na a facɛ fɛ, ale y'a ka dajuru sara n'a ye. O y'a sɔrɔ a tun ma cɛɛ si lɔn fɔlɔ. K'a ta o tuma na, o kɛra landa ye Isirayɛlidenw fɛ,

⁴⁰saan o saan u ka sunguruw be to ka taga Galaadi ka Zɛfite denmuso sanga kɛ tile naani kɔnɔ.