Read dyu Cɛfariw ka kitabu 12 Bible Online

Cɛfariw ka kitabu 12 - dyu bible

Cɛfariw ka kitabu 12

¹O kɔ, Efarayimu kɔmɔgɔw ye ɲɔgɔn lajɛn ka taga Zurudɛn baji tigɛ ka se Safɔn. U y'a fɔ Zɛfite ye ko: «Mun na e tagara amoniw kɛlɛ n'i ma an wele, an be taga ɲɔgɔn fɛ? An bena i n'i ka soo jɛni ɲɔgɔn fɛ.»

²Zɛfite y'a fɔ u ye ko: «Kɛlɛba tun wilila ne ni n ka jama, ani amoniw cɛ. Ne y'aw wele, aw ma sɔn ka na ne bɔsi.

³Ne y'a ye tuma min na aw tun te nana ka ne dɛmɛ, ne ye n yɛrɛ nii di, ka taga amoniw kɛlɛ. Masaba farala ne kan, ne sera u kɔrɔ. Mun na aw nana ne kɛlɛyɔrɔ la bii?»

⁴Zɛfite ye Galaadikaw lajɛn ka Efarayimu kɔmɔgɔw kɛlɛ. Galaadikaw sera Efarayimu kɔmɔgɔw kɔrɔ, Efarayimu kɔmɔgɔw tun y'a fɔ ko: «Galaadikaw, aw bolila ka bɔ anw fɛ ka na sigi Manase kɔmɔgɔw cɛma.»

⁵Galaadikaw tagara Zurudɛn baji tigɛyɔrɔ datugu. Ni Efarayimu kɔmɔgɔ dɔ bolila ka na se k'a fɔ ko u k'ale to a be tɛmɛ, u b'a ɲininga ko a ye Efarayimu kɔmɔgɔw dɔ ye wa. N'o tigi y'a fɔ ko ayi,

⁶o tuma na u b'a fɔ a ye ko a k'a fɔ ko Sibolɛti, o tigi t'a fɔ ka ɲa, bari a tun te se k'o fɔ, Galaadikaw tun b'a minɛ k'a kaan tigɛ Zurudɛn baji tigɛyɔrɔ la. Efarayimu kɔmɔgɔw mɔgɔ waa bi naani ni fila (42 000) le sara o waati la.

⁷Zɛfite kɛra Isirayɛlidenw ka ɲamɔgɔ ye saan wɔɔrɔ kɔnɔ. O kɔ, Galaadika Zɛfite sara, u y'a suu don Galaadi mara dugu dɔ kɔnɔ.

⁸Zɛfite tɛmɛnin kɔ, Bɛtilehɛmuka Ibisan kɛra ɲamɔgɔ ye Isirayɛlidenw kunna.

⁹A ye dencɛ bi saba sɔrɔ, ni denmuso bi saba. A ye olu minɛ k'o di mɔgɔw ma furu la minw te a ka fadenyabolo mɔgɔw ye, ka sunguru bi saba minɛ minw te a ka fadenyabolo la, ka n'o di a dencɛw ma. A kɛra ɲamɔgɔ ye Isirayɛlidenw kunna saan wolonwula kɔnɔ.

¹⁰O kɔ, a sara, u y'a suu don Bɛtilehɛmu.

¹¹Ale fana tɛmɛnin kɔ, Zabulɔn kɔmɔgɔ Elɔn kɛra ɲamɔgɔ ye Isirayɛlidenw kunna saan tan kɔnɔ.

¹²O kɔ, a sara, u y'a suu don Zabulɔn kɔmɔgɔw ka mara kɔnɔ dugu dɔ la min tɔgɔ ko Elɔn.

¹³Ale tɛmɛnin kɔ, Ilɛli dencɛ Abidɔn ka bɔ Pireyatɔn kɛra ɲamɔgɔ ye Isirayɛlidenw kunna.

¹⁴Ale dencɛw tun ye mɔgɔ bi naani ye, a mamadencɛmanw tun ye mɔgɔ bi saba. Olu tun be to ka yɛlɛ faliden bi wolonwula kan. A kɛra ɲamɔgɔ ye Isirayɛlidenw kunna saan seegi kɔnɔ.

¹⁵O kɔ, Ilɛli dencɛ Abidɔn ka bɔ Pireyatɔn sara. U y'a suu don Pireyatɔn, Efarayimu kɔmɔgɔw ka mara la, amalɛkiw ka kuluyɔrɔ la.