Read dyu Cɛfariw ka kitabu 13 Bible Online

Cɛfariw ka kitabu 13 - dyu bible

Cɛfariw ka kitabu 13

¹Isirayɛlidenw ye kojugu kɛ Masaba ɲakɔrɔ tugu. Masaba y'u don filisiw bolo saan bi naani kɔnɔ.

²O y'a sɔrɔ Soreyaka dɔ tun be yen, Dan ka fadenyabolo mɔgɔ dɔ tun lo, a tɔgɔ tun ko Manowa. A muso tun ma deen wolo ka ye, deen wolobali tun lo.

³Loon dɔ, Masaba ka mɛlɛkɛ y'a yɛrɛ yira muso nin na, k'a fɔ a ye ko: «Deen t'i fɛ, i kɛra deen wolobali ye. Nga i bena kɔnɔ ta ka dencɛ wolo.

⁴K'a ta sisan ma, i k'i yɛrɛ kɔlɔsi, i kana duvɛn walima minnifɛn fariman wɛrɛ si min, i kana dumuni dumu min ye aw tana ye.

⁵Bari e bena kɔnɔ ta, ka dencɛ wolo. Deen nin kuun tena li abada. Bari k'a to kɔnɔbara la, a bena kɛ Ala ta ye, ale le ben'a daminɛ ka Isirayɛlidenw bɔsi filisiw bolo.»

⁶Muso nin tagar'a fɔ a cɛɛ ye ko: «Ala ka mɔgɔ dɔ nana ne fɛ, a tun be i n'a fɔ Ala ka mɛlɛkɛ, a be siranya bila mɔgɔ la kosɔbɛ. Ne m'a ɲininga a bɔyɔrɔ la, a fana m'a tɔgɔ fɔ ne ye.

⁷A y'a fɔ ne ye ko ne bena kɔnɔ ta, ka dencɛ wolo, ko k'a ta sisan ma, ko ne kana duvɛn min tugu, walima minnifɛn fariman wɛrɛ si, ani ko n kana dumuni dumu min ye an tana ye. Ko bari deen nin bena kɛ Ala ta ye kabini kɔnɔbara la, fɔɔ ka taga se a ka saya ma.»

⁸O tuma na, Manowa ye Masaba daali ko: «Masaba, i k'a kɛ Ala ka mɔgɔ nin ka kɔsegi ka na an fɛ tugu, e tun ye min ci, janko deen min bena wolo, a k'ale balocogo yira an na.»

⁹Ala y'a ka daalili minɛ, Ala ka mɛlɛkɛ nin kɔsegira ka na muso nin fɛ k'a siginin to foro kɔnɔ. O y'a sɔrɔ a cɛɛ Manowa tun te yen.

¹⁰O yɔrɔnin bɛɛ, muso nin bolila ka ta'a fɔ a cɛɛ ye ko: «Cɛɛ min tun nan'a yɛrɛ yira ne la o loon na, a nana bii fana!»

¹¹Manowa wilila ka tugu a muso kɔ, ka taga cɛɛ nin fɛ k'a ɲininga ko ale lo tun kumana muso nin fɛ wa. Cɛɛ nin y'a jaabi ko ale lo.

¹²A ye cɛɛ nin ɲininga tugu ko: «I tun ye min fɔ, n'o kɛra tuma min na, an ka kan ka mun le kɛ deen nin ye? An k'a minɛ cogo di?»

¹³Masaba ka mɛlɛkɛ y'a fɔ a ye ko: «Ne ye fɛɛn minw koo fɔ i ka muso ye, a k'a yɛrɛ tanga olu ma.

¹⁴Fɛɛn o fɛɛn dilanna ni *ɛrɛzɛn ye, a man kan k'o don a daa la, a man kan ka duvɛn, walima minnifɛn fariman wɛrɛ si min, a man kan fana k'aw tana si dumu.»

¹⁵A y'a fɔ Masaba ka mɛlɛkɛ nin ye ko: «Anw b'a ɲini i fɛ n'i be se ka kɔnɔni kɛ dɔɔni, an bena baden dɔ labɛn i ye.»

¹⁶Masaba ka mɛlɛkɛ y'a fɔ Manowa ye ko: «Hali n'i y'a ɲini ne fɛ ko n kana taga, ne tena i ka dumuni dumu, nga n'i b'a fɛ, i ka saraka jɛnita bɔ Masaba ye.» Manowa tun m'a lɔn ko Masaba ka mɛlɛkɛ lo.

¹⁷A ye Masaba ka mɛlɛkɛ nin ɲininga ko: «I tɔgɔ be di? Janko i ye min fɔ, n'o nana kɛ tuma min na, an ka se k'i tanu.»

¹⁸ A y'a jaabi ko: «Mun na e be ne tɔgɔ ɲininga? N tɔgɔ ye kabakotɔgɔ ye.» [1]

¹⁹O kɔ, Manowa ye baden, ni suman saraka bila kabakuru kan k'o kɛ saraka ye Masaba ye. Ka Manowa n'a muso to filɛli la, Masaba ye kabako kɛ.

²⁰Ka tasuma to mana na sarakabɔyɔrɔ la ka wili sanfɛ, Masaba ka mɛlɛkɛ korila ka yɛlɛ n'a ye. Manowa n'a muso y'o ye dɔrɔn, u lara duguma k'u ɲaa biri.

²¹O kɛnin kɔ, Masaba ka mɛlɛkɛ ma segi k'a yɛrɛ yira Manowa n'a muso la tugu. O tuma na, Manowa sɔrɔla k'a faamu ko Masaba ka mɛlɛkɛ lo.

²²O la, a y'a fɔ a muso ye ko: «An bena sa, bari an ye Ala ye!»

²³A muso y'a fɔ a ye ko: «Ni Masaba tun b'a fɛ k'an faga, a tun tena sɔn k'an ka saraka jɛnita n'an ka suman saraka minɛ do. A fana tun ten'a kɛ an ɲaa be la nin koo nin bɛɛ kan. A fana tun tena sɔn ka koo nin ɲɔgɔn fɔ an ye.»

²⁴Muso nin ye kɔnɔ ta ka dencɛ wolo, k'a tɔgɔ la ko Samusɔn. Masaba ye barika don deen na, a boɲana.

²⁵K'a to Dan kɛlɛdenw sigiyɔrɔ la min be Soreya ni Ɛsitawɔli cɛ, Masaba ka Nii y'a daminɛ ka baara kɛ n'a ye.