Read dyu Cɛfariw ka kitabu 15 Bible Online

Cɛfariw ka kitabu 15 - dyu bible

Cɛfariw ka kitabu 15

¹Waati dɔ tɛmɛnin kɔ, *biletigɛwaati la, Samusɔn wilila ka ta'a ka muso filɛ. A tun ye baden minɛ ka taga o d'a ma. A ko ale be don a ka muso fɛ. Muso nin facɛ ma sɔn.

²A y'a fɔ Samusɔn ye ko: «Ne tun b'a miiri ko muso nin koo tun man d'i ye tugu fewu fewu, o la, ne y'a minɛ k'a d'i teri ma. O tuma na, muso nin dɔgɔmuso ma ɲi ka tɛmɛ kɔrɔmuso nin kan wa? I k'ale minɛ k'a furu a nɔɔ na.»

³Samusɔn y'a fɔ u ye ko: «Sisan kɔni, ni ne ye kojugu kɛ aw filisiw la, n ma baga aw ma.»

⁴O kɔ, a tagara kongowulu kɛmɛ saba minɛ, ka kala sirininw ta, ka kongowulu nunu minɛ fila fila k'u kuuw yɛlɛma ɲɔgɔn ma, ka sɔrɔ ka kala sirinin ta k'o siri kuu fila nunu cɛma.

⁵O kɔ, a ye tasuma mana kala nunu na ka sɔrɔ ka kongowulu nunu bila ka don filisiw ka sumanforow la. A kɛra ten, suman minw tun tontonnin be ɲɔgɔn kan, ani minw ma tigɛ fɔlɔ, o bɛɛ jɛnina, ani *ɛrɛzɛnforow ni olivuyiriforow.

⁶Filisiw ye ɲiningali kɛ ko jɔn le y'o kɛ. U y'a fɔ u ye ko Samusɔn lo, Timunakaw birancɛ, a y'o kɛ, bari a birancɛ tun y'a ka muso minɛ k'a di a tɔɲɔgɔn ma. O la, filisiw tagara muso nin n'a facɛ jɛni.

⁷Samusɔn y'a fɔ u ye ko: «Aw ka baara le ye o ye wa? Ni ne ma n yɛrɛ mɔnɛ bɔ, n ten'aw to.»

⁸A y'u kɛlɛ k'u caaman halaki. O kɔ, a tɛmɛna ka taga sigi farawo dɔ kɔnɔ Etamu mara la.

⁹O la, filisiw wilila ka na sigi Zuda mara la k'u yɛrɛ labɛn k'a daminɛ ka Lɛyi kɛlɛ.

¹⁰Zuda mara mɔgɔw y'u ɲininga ko mun na u nana olu kama. U ye Zuda mara mɔgɔ nunu jaabi k'olu nana janko ka se ka Samusɔn siri, ka ta'a ka kɛta ɲɔgɔn kɛ a la.

¹¹Zuda mara mɔgɔw, mɔgɔ waa saba (3 000) wilila ka taga farawo nin yɔrɔ la Etamu mara la, k'a fɔ Samusɔn ye ko: «I m'a lɔn ko filisiw be se an kɔrɔ wa? E ye mun le kɛ an na ten?» A y'u jaabi ko filisiw ye fɛɛn min kɛ ale la, ko ale fana y'o ɲɔgɔn le kɛ u la.

¹²O kɔ, u y'a fɔ a ye ko: «An nana janko k'i siri ka taga i di filisiw ma.» A y'a fɔ u ye ko: «Aw ka kali ko aw yɛrɛ tena ne faga.»

¹³U y'a jaabi ko ayi, k'olu ten'a faga, k'olu b'a siri ka ta'a di filisiw ma dama. U y'a siri ni jurukura fila ye, k'a minɛ ka bɔ n'a ye farawo nin kɔnɔ.

¹⁴A setɔ Lɛyi mara la, filisiw bɔra k'a kunbɛn n'u be pɛrɛnna. Masaba ka Nii donn'a la. A bolow tun sirinin be ni juru minw ye, olu kɛra i n'a fɔ biin jɛninin ka bɔ ka ben.

¹⁵A ye fali ɲinkala kɛnɛman dɔ ye o yɔrɔ la, k'a ta ka mɔgɔ waa kelen faga n'o ye.

¹⁶O kɔ, a y'a fɔ ko: «N ye fali ɲinkala kelen kɛ k'u la ɲɔgɔn kan, n ye fali ɲinkala kelen kɛ ka mɔgɔ waa kelen faga.»

¹⁷A y'o kuma nunu fɔ ka ban tuma min na, a ye fali ɲinkala nin fili. U y'o yɔrɔ nin tɔgɔ la ko Ɲinkala kulu.

¹⁸Minnɔgɔ y'a minɛ kosɔbɛ, o la, a ye Masaba daali k'a fɔ ko: «E le y'a kɛ i ka baarakɛla ye see sɔrɔ. Sisan ne bena sa minnɔgɔ bolo ka don kɛnɛkɛnɛbali nunu bolo wa?»

¹⁹O la, farayɔrɔ min be Lɛyi mara la, Ala y'a kɛ o dingɛ pɛrɛnna, jii bɔr'a kɔnɔ. Samusɔn ye minni kɛ ka tila ka barika sɔrɔ. U y'o jii bɔyɔrɔ nin wele ko Daalilikɛbaga ka jii bɔyɔrɔ. A be yen halibi Lɛyi mara la.

²⁰Samusɔn kɛra ɲamɔgɔ ye Isirayɛlidenw kunna filisiw ka tile la saan mugan kɔnɔ.