Read dyu Cɛfariw ka kitabu 16 Bible Online

Cɛfariw ka kitabu 16 - dyu bible

Cɛfariw ka kitabu 16

¹Loon dɔ, Samusɔn wilila ka taga Gaza. A ye kakalamuso dɔ ye o yɔrɔ la. A donn'a fɛ ka jɛn n'a ye.

²U y'a fɔ Gazakaw ye ko Samusɔn nana u fɛ. U tagara soo lamini ka dugu nin bɔda kɔlɔsi suu bɛɛ kɔnɔ. U tora yen kudayi suu bɛɛ kɔnɔ, u ma foyi kɛ, ka to k'a fɔ ko: «Ni dugu gwɛra dɔrɔn, an b'a faga.»

³Nga Samusɔn lara fɔɔ ka se dugutilama. Dugutilama, a wilila ka dugu donda koonw n'u lɔgɔ fila bɔn, n'u sɔgɔlan, k'o la a gaman kan, ka yɛlɛ n'u ye kulu kan min be Eburɔn gɛrɛfɛ.

⁴Waati dɔ tɛmɛnin kɔ, muso dɔ koo diyara Samusɔn ye Sorɛki kɔkɛnɛ na, a tɔgɔ ko Dalila.

⁵Filisiw ka ɲamɔgɔw tagara muso nin fɛ k'a fɔ a ye ko: «I ka Samusɔn nigɛ janko ka se k'a ka fangaba nin bɔyɔrɔ lɔn, ani an bena se a kɔrɔ cogo min na fana, k'a siri. An kelen kelen bɛɛ bena warigwɛ kuru waa kelen ni kɛmɛ d'i ma.»

⁶O la, Dalila y'a fɔ Samusɔn ye ko: «I ye fangaba nin be sɔrɔ cogo min na, o fɔ ne ye, an'i be se ka siri ni juru sifa min ye ka se i kɔrɔ.»

⁷Samusɔn y'a fɔ a ye ko: «N'u ye ne siri ni jurukɛnɛ wolonwula ye, minw ma ja fɔlɔ, ne barika be ban, ne be kɛ i n'a fɔ mɔgɔ tɔw.»

⁸Filisiw ka ɲamɔgɔw nana ni juru kɛnɛman wolonwula ye minw ma ja fɔlɔ ka na o di Dalila ma. A ye Samusɔn siri n'o ye.

⁹O y'a sɔrɔ mɔgɔw tun dogonin be soo kɔnɔ. A y'a fɔ Samusɔn ye ko: «Samusɔn, filisiw nana i kama!» O yɔrɔnin kelen, Samusɔn ye juru nunu tigɛ i n'a fɔ jese min donna tasuma kɔnɔ. A kɛra ten, u ma se k'a ka fanga nin bɔyɔrɔ lɔn tugu.

¹⁰O la, Dalila y'a fɔ Samusɔn ye tugu ko: «A filɛ, i ye tulon kɛ ni ne ye, i ye galon tigɛ ne ye. Sisan ne b'i daali, i be se ka siri cogo min na, i k'o fɔ ne ye.»

¹¹A y'a fɔ Dalila ye ko: «Ni u ye ne siri ka ɲa ni juru ye fɛɛn wɛrɛ ma siri ka ye ni min ye fɔlɔ, ne barika be ban, ne be kɛ i n'a fɔ mɔgɔ tɔw.»

¹²Dalila ye jurukuraw ta k'a siri n'o ye. O kɔ, a y'a fɔ ko: «Samusɔn, filisiw nana i kama!» O y'a sɔrɔ mɔgɔw tun dogonin be soo kɔnɔ. O yɔrɔnin kelen, a ye juru nunu tigɛ ka bɔ a bolo i n'a fɔ jese.

¹³Dalila y'a fɔ a ye tugu ko: «Halibi i be tulon kɛra ne la, ka galon tigɛ ne ye. Ayiwa, o be se ka min kɛ k'i siri, o fɔ ne ye.» Samusɔn y'a fɔ a ye ko: «N'i ye ne kunsigi dannin wolonwula nunu minɛ k'o dan ni fanimugu dalajese ye, k'o don kwɛrɛ la, n'o kɛra, ne barika be ban, ne be kɛ i n'a fɔ mɔgɔ tɔw.»

¹⁴Dalila y'a kɛ a sinɔgɔra, a y'a kunsigi dan deen wolonwula ni fanimugu dalajesew ye k'o don kwɛrɛ la, o kɔ, k'a fɔ a ye ko: «Samusɔn, filisiw nana i kama!» Samusɔn kununna ka fanimugu n'a jese tigɛ ka bɔ, ani kwɛrɛ fana.

¹⁵A y'a fɔ Samusɔn ye ko: «I be se k'a fɔ ko ne koo ka d'i ye cogo di? K'a sɔrɔ e kɔnɔ gwɛnin tɛ ne ye, a siɲɛ sabanan le ye nin ye e be tulon kɛra ne la, i ma sɔn k'i ka fangaba bɔyɔrɔ fɔ ne ye.»

¹⁶Loon o loon, muso nin tun b'a la k'a sigɛn, a y'a sigɛn fɔɔ k'a dama tɛmɛ.

¹⁷Samusɔn y'a kɔnɔ gwɛ a ye k'a fɔ a ye ko: «Ne kuun ma li ka ye, bari ne ye Ala ta ye kabini ne be n bamuso kɔnɔ. Ni n kuun lira, n barika be ban, n be kɛ i n'a fɔ mɔgɔ tɔw.»

¹⁸Dalila y'a ye ko a y'a kɔnɔ gwɛ ale ye, a ye mɔgɔ bila ka ta'a fɔ filisiw ka ɲamɔgɔw ye ko u ka na, ko a y'a kɔnɔ gwɛ a ye. O la, filisiw ka ɲamɔgɔw nana n'u ka warigwɛ ye u bolo.

¹⁹A y'a kɛ Samusɔn sinɔgɔr'a seen kan. O kɔ, a ye mɔgɔ dɔ wele, ale nana, a ye Samusɔn kunsigi dannin wolonwula nunu li. A kɛra ten, a fanga daminɛna ka dɛsɛ, a barika banna.

²⁰O kɔ, Dalila y'a fɔ a ye ko: «Samusɔn, filisiw nana i kama!» Samusɔn kununna, a ko a b'a kɛ i n'a fɔ fɔlɔta k'a yɛrɛ bɔsi. A tun m'a lɔn ko Masaba bɔra ale kɔ ka ban.

²¹Filisiw y'a minɛ k'a ɲadenw ci ka taga n'a ye Gaza. U y'a siri ni zirajɔrɔkɔw ye. A tun be to ka suman sin kaso la.

²²O y'a sɔrɔ fana, a kunsigi nin tun be falenna tugu, u tun ye min li.

²³Filisiw ka ɲamɔgɔw ye ɲɔgɔn lajɛn, janko ka sɔnniba kɛ u ka joo ye, min tɔgɔ ko Dagɔn, ani ka nisɔndiya. U tun b'a fɔra ko u ka joo le ye u jugu Samusɔn don u bolo.

²⁴Jama ye Samusɔn ye tuma min na, u y'u ka joo tanu k'a fɔ k'u ka joo ye u jugu don u bolo, ko min tun be to k'u ka jamana cɛn, k'u ka mɔgɔw faga.

²⁵U nisɔndiyaninba tun y'a fɔ ko u ka taga Samusɔn bɔ kaso la ka na n'a ye janko a ka olu ɲanagwɛ. U ye Samusɔn bɔ kaso kɔnɔ, a tora ka yɛlɛkokow kɛ u ɲana. U tun y'a to boon kɔnɔ samasenw cɛma.

²⁶Kanbelen min tun ye Samusɔn bolo minɛ, a y'a fɔ ale ye ko: «Taga ni ne ye ne be maga soo kɔnɔ samasen nunu na ka n yɛrɛ dɛn u la.»

²⁷Joso nin tun fara, cɛɛ ni musow la. Filisiw ka ɲamɔgɔw bɛɛ tun be yen, mɔgɔ waa saba (3 000) ɲɔgɔn tun be boon nin sanfɛ, cɛɛ ni musow, u tun be Samusɔn filɛla n'a be yɛlɛkokow kɛra.

²⁸Samusɔn ye Masaba daali ko: «Matigi, Masaba, i hakili to ne la, ka fanga di ne ma siɲɛ kelen tugu, ne ka n mɔnɛ bɔ siɲɛ kelen tugu filisiw la ne ɲaden nunu cɛnko kama.»

²⁹Samusɔn ye samasen fila minɛ minw tun be boon cɛmancɛ la, kelen tun b'a kinibolo la, kelen b'a numanbolo la.

³⁰A y'a fɔ ko ale ni filisiw ka sa ɲɔgɔn fɛ. A ye samasen nunu ɲɔti ni fanga ye, boon nin benn'a kɔnɔ jama n'u ka ɲamɔgɔw bɛɛ kan. A kɛra ten, Samusɔn salon na, mɔgɔ minw sara n'a ye, olu cayara n'a tun ye minw faga k'a to nii na.

³¹A badenw n'a faa ka somɔgɔw bɛɛ tagar'a suu ta ka na n'a ye. U kɔsegira tuma min na, u y'a suu don a facɛ Manowa ka kaburu kɔnɔ Soreya ni Ɛsitawɔli furancɛ la. A tun kɛra ɲamɔgɔ ye Isirayɛlidenw kunna saan mugan kɔnɔ.