Read dyu Cɛfariw ka kitabu 18 Bible Online

Cɛfariw ka kitabu 18 - dyu bible

Cɛfariw ka kitabu 18

¹O waati la, masacɛ tun te Isirayɛlidenw fɛ. O tuma na, Dan kɔmɔgɔw tun be mara dɔ ɲinina ka sigi o yɔrɔ la, bari fɔɔ ka na se o waati ma, u tun ma sigiyɔrɔ sɔrɔ u yɛrɛ tɔgɔ la fɔlɔ Isirayɛlidenw cɛma.

²Dan kɔmɔgɔw ye mɔgɔ fariman duuru woloma u ka fadenyabolow bɛɛ la k'u ci. U bɔra Soreya ani Ɛsitawɔli ka taga, janko u ka taga jamana yaala k'a filɛ. U tun y'a fɔ u ye ko u ka taga jamana nin filɛ. U tagara se Mika ka yɔrɔ la, Efarayimu mara kuluyɔrɔ la, ka si o yɔrɔ la.

³O tun ka surun Mika ka soo la minkɛ, u sera ka Levi kɔmɔgɔ nin kumakan lɔn. U gwɛrɛla k'a fɔ Levi kɔmɔgɔ nin ye ko: «Jɔn le nana n'i ye yan? I be mun le kɛra yan yɔrɔ la? Mun na i tora yan?»

⁴A y'a fɔ u ye ko Mika ye nin ni nin le kɛ ale ye, ko a b'ale sara, ale fana kɛr'a ka sarakalasebaga ye.

⁵U y'a fɔ a ye ko a ka Ala ɲininga k'a filɛ n'u ka taama bena diya.

⁶Sarakalasebaga nin y'a fɔ u ye ko u ka taga hɛrɛ la, ko Masaba be u marala u ka taama nin na.

⁷Mɔgɔ duuru nunu bɔra ka taga se Layisi. U y'a ye k'o yɔrɔ mɔgɔw siginin be ɲasuma na i n'a fɔ Sidɔnkaw. U hakili siginin be, hamiko si te u la, masa si tun te sɔrɔ o mara nin kɔnɔ min b'u tɔɔrɔla, mɔgɔ si fana tun t'u mara. U yɔrɔ tun ka jan Sidɔnkaw la, bɛɛn tun te u ni mɔgɔ wɛrɛ cɛ.

⁸Ciden nunu kɔsegira ka na u balimaw fɛ Soreya ni Ɛsitawɔli, olu y'u ɲininga ko: «Aw segira ka na ni mun kibaruya ye?»

⁹U y'u jaabi ko: «Aw ye wili, an be taga o yɔrɔ mɔgɔw kama! Bari an ye jamana nin ye, a ka ɲi kosɔbɛ. Mun na aw b'aw daje n'aw te foyi fɔra? Aw kana salabagatɔya kɛ ka ban ka bɔ ka taga jamana nin minɛ!

¹⁰N'aw tagara se yen, aw bena jama ye yen minw te hami. Jamana nin ka bon, Ala fana y'a di aw ma, jamana lo, dugukolokanfɛn bɛɛ be sɔrɔ min kɔnɔ.»

¹¹O la, Dan kɔmɔgɔ mɔgɔ kɛmɛ wɔɔrɔ bɔra Soreya ni Ɛsitawɔli ka taga n'u ka kɛlɛkɛminanw ye u bolo.

¹²U tagara sigi Kiriyatayimu, Zuda mara la. O le y'a to yɔrɔ min be Kiriyatayimu tileben fɛ, o be wele halibi Dan kɔmɔgɔw ka kɛlɛdenw sigiyɔrɔ.

¹³U wilila ka bɔ o yɔrɔ la ka taga se Efarayimu mara kuluyɔrɔ la. U sera Mika ka soo.

¹⁴Mɔgɔ duuru minw tun nana Layisi jamana nin filɛ, olu y'a fɔ u balima nunu ye ko: «Aw b'a lɔn wa, ko sɔnnikɛfani, ni mɔgɔjaw, ani joo min dilanna ni nigɛ ye, k'o be sɔrɔ soo nunu dɔ kɔnɔ wa? Aw ka kan ka fɛɛn min kɛ sisan, o b'aw bolo.»

¹⁵O kɔ, u gwɛrɛla ka don Levi kɔmɔgɔ nin fɛ Mika ka soo kɔnɔ, k'a fo.

¹⁶Dan kɔmɔgɔ mɔgɔ kɛmɛ wɔɔrɔ nunu lɔra soo daa la n'u ka kɛlɛkɛminanw ye u bolo.

¹⁷Mɔgɔ duuru minw tun nana jamana nin filɛ, olu donna soo kɔnɔ ka joo nin ta, ani sɔnnikɛfani nin, ni mɔgɔja dilannin nunu ani jaa nigɛlaman nin. O y'a sɔrɔ sarakalasebaga nin tun lɔnin be daa la ni mɔgɔ kɛmɛ wɔɔrɔ nunu ye, u ka kɛlɛkɛminanw b'u bolo la.

¹⁸U tun donna tuma min na Mika ka soo ka joo nin ta ani sɔnnikɛfani nin, ani mɔgɔja dilannin nunu ni jaa nigɛlaman nin, sarakalasebaga nin y'u ɲininga ko: «Aw be mun le kɛra ten?»

¹⁹U y'a fɔ a ye ko a k'a daje, k'a bolo la a daa la dɔrɔn, ka tugu olu kɔ ka kɛ olu faa ye ani olu ka sarakalasebaga, ko a ka kɛ Dan kɔmɔgɔw ka fadenyabolo kelen ka sarakalasebaga ye Isirayɛlidenw cɛma, k'o man fisa ka kɛ mɔgɔ kelen ka somɔgɔw ta ye wa.

²⁰Sarakalasebaga nin nisɔndiyara o la. A ye sɔnnikɛfani nin ta, ni mɔgɔja dilannin nunu, ani joo nin, ka tugu u kɔ.

²¹O kɔ, u y'u ka sira minɛ ka denmisɛnw ni begɛnw ani donitigiw bila ɲafɛ ka taga.

²²Mɔgɔ minw ka soow tun be Mika ka soo gɛrɛfɛ, u janfara olu la ka ban, olu ye ɲɔgɔn lajɛn ka tugu u kɔ.

²³U ye Dan kɔmɔgɔ nunu wele, olu yɛlɛmana k'a fɔ Mika ye ko: «Mun le kɛra? Jama nin lajɛnkun ye mun ye?»

²⁴Mika y'a fɔ u ye ko: «N tun ye joo minw dilan, aw nana u ta ani ka n ka sarakalasebaga minɛ ka taga n'a ye. Mun le tora n fɛ tugu? Aw be tila ka n ɲininga ko mun kɛra.»

²⁵Dan kɔmɔgɔ nunu y'a fɔ a ye ko: «I daje! I kaan kana mɛn tugu! N'o tɛ, mɔgɔdimininw mana yɛlɛma k'i sɔrɔ, e yɛrɛ le ben'a kɛ e n'i ka soo be halaki.»

²⁶O kɔ, Dan kɔmɔgɔ nunu y'u ka sira ta ka taga. Mika y'a ye ko u fanga ka bon n'ale ta ye. A y'a ka soo sira minɛ ka na soo.

²⁷Mika tun ye fɛɛn min dilan, Dan kɔmɔgɔw y'o ta k'a ka sarakalasebaga minɛ ka taga n'u ye. U tagara ben Layisi dugu kan, jama min tun siginin be ɲasuma na ni hakilisigi la, ka olu faga ni murujan ye, ka dugu nin jɛni.

²⁸Mɔgɔ si ma na k'u bɔsi u bolo, bari o yɔrɔ tun ka jan Sidɔn la, ani bɛɛn fana tun te u ni mɔgɔ wɛrɛ cɛ. U tun siginin be kɔkɛnɛ na Bɛtirewɔbu gɛrɛfɛ. O kɔ, Dan kɔmɔgɔw ye dugu nin lalaga k'a lɔ ka sigi a kɔnɔ.

²⁹U y'u bɛma tɔgɔ la dugu nin kan ko Dan. U bɛma nin tun ye Yakuba deen ye. N'o tɛ, dugu nin tɔgɔ tun ko Layisi.

³⁰U ye joo nin lɔ. Musa deen Gɛrisɔmu dencɛ Yonatan n'ale deenw le kɛra Dan kɔmɔgɔw ka sarakalasebagaw ye, fɔɔ ka se u minɛtuma ma ka taga jɔnya la.

³¹Ka Ala ka soo to Silo, Mika ka joo tora Dan kɔmɔgɔw fɛ o waati bɛɛ la.