Read dyu Cɛfariw ka kitabu 19 Bible Online

Cɛfariw ka kitabu 19 - dyu bible

Cɛfariw ka kitabu 19

¹O waati kelen na, masacɛ tun te Isirayɛlidenw fɛ. Levi kɔmɔgɔ dɔ tun siginin be Efarayimu mara kuluyɔrɔ daan na, ale tun ye muso dɔ kɛ a ka gɛrɛfɛmuso ye, ka bɔ Bɛtilehɛmu, Zuda mara la.

²Loon dɔ, a ka gɛrɛfɛmuso nin ye kodagabali dɔ kɛ a la, ka boli ka ta'a faso la Bɛtilehɛmu, Zuda mara la, ka kalo naani kɛ yen.

³Cɛɛ nin wilila ka tugu a kɔ janko ka ta'a nigɛnigɛ k'a minɛ ka na n'a ye. Cɛɛ nin tun y'a ka baaraden ni fali fila minɛ. U sera, muso nin y'a cɛɛ ladon a facɛ ka soo. A facɛ ye cɛɛ nin ye tuma min na, a y'a kunbɛn ni nisɔndiya ye.

⁴Cɛɛ nin birancɛ y'a minɛ k'a to a fɛ, tile saba. Cɛɛ nin tun be dumuni, ni minni kɛ ani ka la u fɛ yen.

⁵Tile naaninan loon, u wilila sɔgɔmada joona, Levi kɔmɔgɔ y'a yɛrɛ labɛn janko ka taga. Nga muso nin facɛ y'a fɔ a ye ko a ka dumuni kɔnɔ fɔlɔ, janko a ka fanga sɔrɔ ka sɔrɔ ka sira minɛ.

⁶U sigira ka dumuni kɛ ka minni kɛ ɲɔgɔn fɛ. O kɔ, muso nin facɛ y'a fɔ a ye ko a ka si o loon na tugu, ka se k'a yɛrɛ nisɔndiya.

⁷Cɛɛ nin wilila ko ale be taga, nga a birancɛ y'a karaba, a sira yen tugu.

⁸Tile duurunan loon, cɛɛ nin wilila sɔgɔmada joona ko ale be taga. Muso nin facɛ y'a fɔ a ye tugu ko ale b'a daali a ka fanga ɲini fɔlɔ, ko a k'a to tile ka suma fɔlɔ. U fila korila ka dumuni kɛ ɲɔgɔn fɛ.

⁹O kɔ, cɛɛ nin wilila ko a be taga n'a ka gɛrɛfɛmuso nin ye ani a ka baaraden, nga a birancɛ y'a fɔ ko a k'a filɛ, ko tile banna ka ban, suu kora, ko a ka la k'a yɛrɛ nisɔndiya, ko ni dugu gwɛra, u be wili sɔgɔmada joona ka sira minɛ, ka ta'a soo.

¹⁰Cɛɛ nin tun t'a fɛ ka la yen tugu, a wilila ka taga. A tagara se Zebuzi mara la, min ye Zeruzalɛmu ye. A sera n'a ka faliw ye, ni doni b'u kan, ani a ka gɛrɛfɛmuso.

¹¹Yanni u be se Zebuzi gɛrɛfɛ, o y'a sɔrɔ tile tun banna kosɔbɛ. A ka baaraden y'a fɔ a ye ko a k'a to u be taga si Zebuzi nunu fɛ.

¹²A kuntigi y'a fɔ a ye ko u tena don lonan dugu si la, Isirayɛlidenw te min kɔnɔ, ko u be taga fɔɔ Gibeya.

¹³O kɔ, a y'a fɔ tugu ko a k'a to u be taga dugu fila nunu dɔ la, Gibeya walima Arama, ko u be la o yɔrɔ la.

¹⁴U tɛmɛna ka taga, u k'u be se Gibeya gɛrɛfɛ, Bɛnzamɛn kɔmɔgɔw ka mara la, o y'a sɔrɔ tilekun be donna.

¹⁵U faranna ka taga Gibeya janko u ka se ka la o yɔrɔ la. Levi kɔmɔgɔ nin donna dugu kɔnɔ ka taga sigi dugu forobayɔrɔ la. Mɔgɔ si ma sɔrɔ min b'u ladon a ka soo janko u ka la yen.

¹⁶O y'a sɔrɔ cɛkɔrɔba dɔ bɔr'a ka foro la baara kɛyɔrɔ wulafɛ n'a be nana soo. Ale tun ye Efarayimu mara kuluyɔrɔ mɔgɔ dɔ ye, min tun nana sigi Gibeya dugu kɔnɔ. O dugu nin kɔnɔ mɔgɔw tun ye Bɛnzamɛn kɔmɔgɔw ye.

¹⁷Cɛkɔrɔba nin ko a be filɛli kɛ, a ye lonancɛ nin ye, a y'a fɔ a ye ko: «E be tagara min? E bɔra min?»

¹⁸Cɛɛ nin y'a jaabi ko: «An bɔra Bɛtilehɛmu, Zuda mara la, an be tagara Efarayimu mara kuluyɔrɔ daan na, o le ye ne ka yɔrɔ ye. Ne tun tagara Bɛtilehɛmu, Zuda mara la, sisan ne be segira Masaba ka soo. Ne ma jatigila sɔrɔ ka jigi yen.

¹⁹An ka faliw ka dumuni be yen. Ne, i ka baaraden cɛman, n'i ka baaraden musoman, ani kanbelen nin ka dumuni ni duvɛn b'an fɛ. Foyi dɛsɛnin te an na.»

²⁰Cɛkɔrɔba nin y'a fɔ ko: «Ala ka hɛrɛ kɛ i ye. Ne bena lɔ n'aw ka doni bɛɛ ye. Aw kana la dugu forobayɔrɔ nin na.»

²¹U donn'a ka soo kɔnɔ, cɛkɔrɔba nin ye faliw ka dumuni di u ma, lonan nunu ye jii sɔrɔ k'u seen ko. O kɔ, u ye dumuni kɛ ka minni kɛ.

²² K'u to dumuni na, dugumɔgɔkolonw nana soo lamini, ka daa gosi kosɔbɛ, k'a fɔ cɛkɔrɔba ye, min tun ye sotigi ye ko: «Cɛɛ min donna i fɛ, a to a ka bɔ an be la n'a ye i n'a fɔ muso.»

²³Sotigi nin bɔra k'a fɔ u ye ko: «Ayi, ne balimaw, aw kana kojugu kɛ. Ne b'aw daali bari cɛɛ nin jigira ne le fɛ, aw kana kodagabali nin kɛ.

²⁴Denmuso be ne fɛ, min ma cɛɛ lɔn fɔlɔ, cɛɛ nin ka gɛrɛfɛmuso fana be yen. Ne ben'a to olu be bɔ aw fɛ, aw ka olu minɛ k'aw sago kɛ u la. Nga aw kana kodagabali nin ɲɔgɔn kɛ cɛɛ nin na.»

²⁵Mɔgɔ nunu tun te sɔnna ka mɛnni kɛ minkɛ, cɛɛ nin y'a ka gɛrɛfɛmuso nin minɛ k'a di u ma kɛnɛma. U y'a minɛ ka la n'a ye k'a tɔɔrɔ fɔɔ ka taga dugu gwɛ. Sɔgɔmada joona, u y'a to yen ka taga.

²⁶Dugu gwɛra, muso nin tagara ben a cɛɛ ka jatigi soo daa la, ka to yen fɔɔ dugu gwɛra.

²⁷Cɛɛ nin wilila sɔgɔma ka daa yɛlɛ, a tun b'a fɛ ka taga. A y'a ka gɛrɛfɛmuso nin lanin sɔrɔ duguma soo daa la, a bolo be koon jukɔrɔ.

²⁸Cɛɛ nin y'a fɔ muso ye ko a ka wili u be taga, nga muso m'a jaabi. Cɛɛ y'a ta k'a la a ka fali kan, ka taga n'a ye a ka soo.

²⁹ A ser'a ka yɔrɔ la tuma min na, a y'a ka gɛrɛfɛmuso nin tigɛtigɛ k'a kɛ yɔrɔ tan ni fila ye, k'o ci Isirayɛlidenw ka maraw bɛɛ la.

³⁰Ni mɔgɔ o mɔgɔ y'o ye, olu b'a fɔ ko nin koo nin ɲɔgɔn ma kɛ ka ye kabini Isirayɛlidenw bɔra Ezipiti jamana na fɔɔ ka na se bii ma. Levi kɔmɔgɔ nin tun be mɔgɔ nunu cira tuma min na, a tun y'a fɔ olu ye ko u ka to k'a fɔ Isirayɛlidenw bɛɛ ye ko: «Nin koo nin ɲɔgɔn kɛra ka ye kabini loon min na Isirayɛlidenw bɔra Ezipiti jamana na wa?» Ko u ka miiri o la, ka ɲɔgɔn ɲininga ani ka dɔ fɔ. [1]