Read dyu Cɛfariw ka kitabu 20 Bible Online

Cɛfariw ka kitabu 20 - dyu bible

Cɛfariw ka kitabu 20

¹Isirayɛlidenw bɛɛ wilila ka na ɲɔgɔn kunbɛn Misipa, k'a ta Dan kɔmɔgɔw ka mara la, fɔɔ ka taga Bɛriseba mara la, ani Galaadi mara la, k'u ka miiriya kɛ kelen ye Masaba ɲakɔrɔ.

²Jama ɲamɔgɔw ka bɔ Isirayɛlidenw kɔmɔgɔw bɛɛ la, olu nana Ala ka jama cɛma. Kɛlɛden mɔgɔ waa kɛmɛ naani (400 000) le tun be yen minw be se kɛlɛ la.

³Bɛnzamɛn kɔmɔgɔw y'a mɛn ko Isirayɛlidenw nana Misipa. Isirayɛlidenw y'a fɔ ko: «Kojugu min kɛra, aw k'o ɲafɔ.»

⁴O tuma na, u ye muso min faga, ale cɛɛ, Levi kɔmɔgɔ ye kuma ta k'a fɔ ko: «Ne ni n ka gɛrɛfɛmuso tun nana se Gibeya dugu kɔnɔ, Bɛnzamɛn kɔmɔgɔw ka mara la. An tun b'a fɛ ka la o yɔrɔ la sufɛ.

⁵Gibeyakaw wilila ne kama. Ne tun be soo min kɔnɔ, u nana o lamini sufɛ k'u bena ne faga. U ye n ka gɛrɛfɛmuso karaba k'a ɲini fɔɔ a sara.

⁶O la, ne y'a ta ka n'a suu tigɛtigɛ k'a ci Isirayɛlidenw ka mara bɛɛ kɔnɔ. Bari u ye maloyako ni kodagabali kɛ Isirayɛlidenw cɛma.

⁷Aw Isirayɛlidenw bɛɛ le be yan, aw k'a filɛ ka fɛɛn kelen latigɛ.»

⁸Jama bɛɛ wilila ka lɔ kelen kan k'a fɔ ko: «Mɔgɔ si man kan ka ta'a ka soo tugu ani a sigiyɔrɔ la.

⁹An bena fɛɛn min kɛ Gibeyakaw la, o filɛ: An bena kala la ka sɔrɔ ka taga u kama.

¹⁰An bena mɔgɔw woloma Isirayɛlidenw kɔmɔgɔw ka mara bɛɛ la, mɔgɔ kɛmɛ o kɛmɛ, tan ka woloma, mɔgɔ waa kelen kelen, kɛmɛ ka woloma, mɔgɔ waa tan na, waa kelen, k'u ci ka taga dumunifɛn ta ka n'a di mɔgɔw ma minw bena taga Gibeyakaw halaki Bɛnzamɛn mara la ka kɛɲɛ n'u ka kojugu ye u ye min kɛ Isirayɛlidenw cɛma.»

¹¹A kɛra ten, Isirayɛlidenw bɛɛ ye ɲɔgɔn lajɛn o dugu kama, k'u kɔnɔ kɛ kelen ye.

¹²Isirayɛlidenw kɔmɔgɔw bɛɛ ye mɔgɔ dɔw ci Bɛnzamɛn kɔmɔgɔw bɛɛ fɛ k'a fɔ u ye ko: «Kojugu min kɛra aw fɛ, o kɔrɔ ye mun ye?

¹³Mɔgɔkolon minw be Gibeya, aw ka olu di, an bena u faga, janko o kojugu ka bɔ Isirayɛlidenw cɛma.» Nga Bɛnzamɛn kɔmɔgɔw ma sɔn ka mɛnni kɛ u balima Isirayɛlidenw fɛ.

¹⁴Bɛnzamɛn kɔmɔgɔw fana bɔra u ka duguw kɔnɔ ka na ɲɔgɔn lajɛn Gibeya janko u ka Isirayɛliden tɔw kɛlɛ.

¹⁵Bɛnzamɛn kɔmɔgɔ minw tun bɔra, u ye olu jati, u tun be se mɔgɔ waa mugan ni wɔɔrɔ (26 000) minw be se kɛlɛ la, Gibeyakaw niin t'u la, olu tun be se cɛfari mɔgɔ kɛmɛ wolonwula ma.

¹⁶O jama nin cɛma, cɛfari numanbolotigiw mɔgɔ kɛmɛ wolonwula tun be yen, hali fɛɛn min ka dɔgɔ i n'a fɔ kunsigi, olu tun be se k'o bon ni bɛrɛbonnan ye k'a sɔrɔ.

¹⁷U fana ye Isirayɛlidenw ka kɛlɛdenw jati, olu sera mɔgɔ waa kɛmɛ naani, Bɛnzamɛn kɔmɔgɔw niin t'u la. U bɛɛ tun be se kɛlɛ la.

¹⁸Isirayɛlidenw tagara Betɛli ka Ala ɲininga ko jɔn le ka ɲi ka taga kɛlɛ daminɛ ni Bɛnzamɛn kɔmɔgɔw ye. Masaba ko Zuda kɔmɔgɔw lo.

¹⁹Dugu gwɛra dɔrɔn, Isirayɛlidenw wilila ka taga sigi Gibeya gɛrɛfɛ.

²⁰U tagara janko ka Bɛnzamɛn kɔmɔgɔw kɛlɛ. U y'u yɛrɛ labɛn o kɛlɛ kama Gibeya gɛrɛfɛ.

²¹Bɛnzamɛn kɔmɔgɔw bɔra Gibeya dugu kɔnɔ ka Isirayɛlidenw kɛlɛ ka mɔgɔ waa mugan ni fila (22 000) faga o loon na.

²²Isirayɛli jama y'u jaa gwɛlɛya, k'u yɛrɛ labɛn kɛlɛ kama tugu u ka yɔrɔkɔrɔ nin na yen.

²³Isirayɛlidenw tagara kasi Masaba ɲakɔrɔ tile kuturu bɛɛ kɔnɔ. U ye Masaba ɲininga k'olu ka kan ka taga u balima Bɛnzamɛn kɔmɔgɔw kɛlɛ tugu wa? Masaba y'a fɔ ko u ka taga u kɛlɛ.

²⁴Tile filanan loon, Isirayɛlidenw wilila ka gwɛrɛ Bɛnzamɛn kɔmɔgɔw la.

²⁵O loon na, Bɛnzamɛn kɔmɔgɔw bɔra Gibeya dugu kɔnɔ k'u kunbɛn. U ye kɛlɛdenŋana mɔgɔ waa tan ni seegi (18 000) faga Isirayɛlidenw cɛma.

²⁶Isirayɛli jama bɛɛ wilila ka taga Betɛli, ka sigi ka kasi Masaba ɲakɔrɔ, ka suun don o loon na tile kuturu bɛɛ kɔnɔ. U ye saraka jɛnitaw ni jɛnɲɔgɔnya sarakaw bɔ Masaba ye.

²⁷Isirayɛlidenw ye Masaba ɲininga. O y'a sɔrɔ Ala ka layidu taamasiɲɛ kɛsu tun be o yɔrɔ la.

²⁸O waati la, Arɔn deen Eleyazari dencɛ Pinasi tun be sarakalasebaara kɛ Alabatoso kɔnɔ. U ye Masaba ɲininga k'olu ka kan ka taga u balimaw, Bɛnzamɛn kɔmɔgɔw kɛlɛ tugu wa. Ko walima u k'a dabila. Masaba y'a fɔ u ye ko u ka taga, ko bari sini ale bena u don u bolo.

²⁹Isirayɛlidenw ye mɔgɔ dɔw dogo Gibeya lamini na.

³⁰A tile sabanan loon, u wilila ka taga Bɛnzamɛn kɔmɔgɔw kama, u y'u yɛrɛ labɛn Gibeya kɛlɛ kama, i n'a fɔ u delila k'a kɛ cogo min na.

³¹Bɛnzamɛn kɔmɔgɔw bɔra ka Isirayɛli jama kunbɛn. Isirayɛlidenw y'u nigɛnigɛ fɔɔ u janfara dugu la. U tun y'a daminɛ ka to k'u faga i n'a fɔ loon tɔw la. U sera ka mɔgɔ bi saba ɲɔgɔn faga Isirayɛlidenw cɛma Betɛli sira, ni Gibeya kongo taasira kan.

³²Bɛnzamɛn kɔmɔgɔw tun y'a fɔ ko u sera u kɔrɔ ka ban i n'a fɔ fɔlɔ la. Nga Isirayɛlidenw tun b'a la k'a fɔ ko: «An ka boli u ɲa k'u nigɛnigɛ ka taga n'u ye yɔrɔjan ka bɔ dugu kɔnɔ.»

³³Isirayɛlidenw bɛɛ wilila ka bɔ u lɔyɔrɔ la, ka taga lɔ Baali Tamari k'u yɛrɛ labɛn. Mɔgɔ minw tun dogonin be u fɛ, olu wilila ka bɔ u dogoyɔrɔ la Gibeya tileben fɛ.

³⁴Kɛlɛdenŋana waa tan (10 000) minw tun wolomana ka bɔ Isirayɛlidenw cɛma, olu nana se Gibeya dugu gɛrɛfɛ. Kɛlɛ gwanna, nga Bɛnzamɛn kɔmɔgɔw tun m'a lɔn ko kɛlɛ nin bena cɛn olu bolo.

³⁵O loon na, Masaba farala Isirayɛlidenw kan, Bɛnzamɛn kɔmɔgɔw bolila u ɲa. Isirayɛlidenw ye kɛlɛdenŋana mɔgɔ waa mugan ni duuru ani mɔgɔ kɛmɛ (25 100) faga u cɛma.

³⁶O tuma na, Bɛnzamɛn kɔmɔgɔw y'a ye ko Isirayɛlidenw sera olu kɔrɔ. Isirayɛlidenw tun be bolila Bɛnzamɛn kɔmɔgɔw ɲa, bari u jigi tun lanin be u ka mɔgɔ dogoninw kan Gibeya dugu gɛrɛfɛ.

³⁷Mɔgɔ minw tun dogonin be, olu wilila ka ben dugu kan. U yɛrɛkɛra ka dugu kɔnɔ mɔgɔw bɛɛ halaki ni murujan ye.

³⁸U tun ye taamasiɲɛ dɔ di ɲɔgɔn ma. Mɔgɔ minw tun dogora, olu tun ka kan k'a kɛ sisi dɔ be wili dugu kɔnɔ.

³⁹Isirayɛlidenw tagara lɔ kelen kan u ɲafɛ. O y'a sɔrɔ Bɛnzamɛn kɔmɔgɔw tun ye mɔgɔ bi saba ɲɔgɔn faga ka ban Isirayɛlidenw cɛma. O la, u tun b'a fɔra u yɛrɛ kɔnɔ ko tiɲɛ na, olu sera u kɔrɔ ka ban i n'a fɔ waati tɛmɛnin na.

⁴⁰Nga sisi tun daminɛna ka wili dugu nin kɔnɔ. Bɛnzamɛn kɔmɔgɔw ye filɛli kɛ u kɔfɛ, u ye sisi wilitɔ ye dugu kɔnɔ ka taga sanfɛ.

⁴¹Isirayɛlidenw tun lɔra kelen kan ka yɛlɛma u kama o tuma na. Bɛnzamɛn kɔmɔgɔw jaa tigɛra bari u y'a ye ko kɛlɛ nin tun bena cɛn olu la.

⁴²O la, u y'u kɔɔ di ka boli ta Isirayɛlidenw ɲa, u ye kongokolon sira minɛ, nga u ma se ka kisi. Mɔgɔ minw tun donna dugu kɔnɔ, olu tugura u kɔ k'u faga sira kan.

⁴³U ye Bɛnzamɛn kɔmɔgɔw koori ten, ka tugu u kɔ. Ni u ko u be lafiɲɛ yɔrɔ min na, u b'u halaki o yɔrɔ la, fɔɔ ka taga tɛmɛ Gibeya ka taga se kɔrɔn faan fɛ.

⁴⁴Mɔgɔ waa tan ni seegi (18 000) le sara Bɛnzamɛn kɔmɔgɔw la, u bɛɛ cɛfariw.

⁴⁵Fara min be Irimɔn kongokolon kɔnɔ, mɔgɔ minw tun be bolila ka taga o yɔrɔ la, Isirayɛlidenw ye mɔgɔ waa duuru (5 000) faga olu cɛma sira kan. U tugura u kɔ fɔɔ ka taga se Gibeya, u ye mɔgɔ waa fila (2 000) faga o yɔrɔ la.

⁴⁶Bɛnzamɛn kɔmɔgɔ minw sara o loon nin na, olu bɛɛ lajɛnnin kɛra kɛlɛdenŋana mɔgɔ waa mugan ni duuru (25 000) ye, u bɛɛ cɛfariw.

⁴⁷Mɔgɔ kɛmɛ wɔɔrɔ sera ka boli ka taga kongokolon kɔnɔ, Irimɔn fara kan, ka to yen fɔɔ kalo naani.

⁴⁸Isirayɛlidenw kɔsegira ka na Bɛnzamɛn kɔmɔgɔw kama. U y'u halaki ni murujan ye duguw kɔnɔ, mɔgɔw fara begɛnw kan, ani u ye fɛɛn o fɛɛn sɔrɔ yen. U donna dugu o dugu la, u y'o bɛɛ jɛni.