Read dyu Cɛfariw ka kitabu 21 Bible Online

Cɛfariw ka kitabu 21 - dyu bible

Cɛfariw ka kitabu 21

¹Ka Isirayɛlidenw to Misipa, u tun kalila ko u si ten'a denmuso di Bɛnzamɛn kɔmɔgɔ ma a k'a furu fewu.

²Jama tagara Betɛli, u tora yen Ala ɲakɔrɔ tile kuturu bɛɛ kɔnɔ. U kasira yen kosɔbɛ kosɔbɛ,

³k'a fɔ Ala ye ko: «Ee Masaba, Isirayɛli ka Ala! Mun na o koo kɛra fɔɔ Isirayɛli deen kelen kɔmɔgɔw tununa ka bɔ Isirayɛlidenw cɛma bii?»

⁴O dugusagwɛ, jama wilila sɔgɔma joona ka sarakabɔyɔrɔ dilan, ka saraka jɛnitaw ni jɛnɲɔgɔnya sarakaw bɔ.

⁵Isirayɛlidenw y'a fɔ ko: «Anw cɛma, jɔnw le tun ma taga ɲɔgɔnye la Masaba ɲakɔrɔ Misipa?» Bari u tun kalila ko ni mɔgɔ min ma taga n'u ye Masaba ɲakɔrɔ Misipa, o tigi ka kan ka faga.

⁶Isirayɛlidenw nimisara kosɔbɛ u balima Bɛnzamɛn kɔmɔgɔw kosɔn, n'u b'a fɔ ko: «An bɛma Isirayɛli deen kelen kɔmɔgɔw bɔra an na bii.

⁷Minw sera ka kisi, an bena mun le kɛ ka musow sɔrɔ k'o di olu ma? Bari an kalila ka ban ni Masaba tɔgɔ ye ko an tena an denmusow di u ma.»

⁸U y'a fɔ tugu ko: «Isirayɛlidenw kɔmɔgɔ dɔw be yen min ma na Masaba ɲakɔrɔ Misipa wa?» O y'a sɔrɔ Yabɛsika minw be Galaadi mara la, olu tun ma na ɲɔgɔn lajɛnyɔrɔ nin na.

⁹U ye jama tɔgɔw sɛbɛn, u y'a ye ko mɔgɔ si te yen ka bɔ Yabɛsi, Galaadi mara la.

¹⁰O la, jama ye kɛlɛden mɔgɔ waa tan ni fila (12 000) ci ko u ka taga Yabɛsikaw halaki ni murujan ye, ko u kana musow ni denmisɛnw to yen.

¹¹Aw bena fɛɛn min kɛ, o ye nin ye: «Aw bena cɛɛw bɛɛ faga, ani muso minw bɛɛ ye cɛko lɔn.»

¹²U tagara sungurudafanin mɔgɔ kɛmɛ naani sɔrɔ Yabɛsikaw fɛ min be Galaadi mara la, minw tun ma cɛko lɔn fɔlɔ. U y'o minɛ ka taga n'u ye jama yɔrɔ la Silo, Kanaan jamana na.

¹³Jama bɛɛ ye mɔgɔ dɔw ci Bɛnzamɛn kɔmɔgɔw fɛ minw tun bolila ka taga to Irimɔn fara yɔrɔ la yen, ko kɛlɛ banna.

¹⁴O waati la, Bɛnzamɛn kɔmɔgɔw kɔsegira ka na. U tun ma sunguru minw faga Yabɛsikaw ka musow cɛma, u ye olu di Bɛnzamɛn kɔmɔgɔ nunu ma, nga o m'u labɔ.

¹⁵Jama nimisara kosɔbɛ Bɛnzamɛn kɔmɔgɔw koo la, bari Masaba tun ye dɔ bɔ Isirayɛlidenw kɔmɔgɔw la.

¹⁶Cɛkɔrɔba minw tun be jama cɛma, olu y'a fɔ ko: «An bena mun le kɛ janko ka se ka musow sɔrɔ k'o di u tɔw ma? Bari an ye u ka musow bɛɛ faga.

¹⁷Bɛnzamɛn kɔmɔgɔ minw kisira, olu ka kan ka deenw sɔrɔ, janko Isirayɛlidenw dɔ kɔmɔgɔw bɛɛ kana tunu.

¹⁸Nga an do te se k'an denmusow di u ma ka kɛ u ka musow ye, bari an Isirayɛlidenw tun kalila k'a fɔ ko mɔgɔ min man'a denmuso di Bɛnzamɛn kɔmɔgɔw ma, k'o tigi danganin be.»

¹⁹O la, u y'a fɔ ko: «Saan o saan ɲanagwɛ be to ka kɛ Masaba ye Silo, Betɛli kɔgɔdugu ɲafan na, sira min be bɔ Betɛli ka taga Sisɛmu, o kɔrɔn ɲafan na, Lebona worodugu ɲafan na.»

²⁰U y'a fɔ Bɛnzamɛn kɔmɔgɔw ye ko: «Aw ye taga dogo *ɛrɛzɛnforow kɔnɔ

²¹ka to ka filɛli kɛ. Ni Silo sunguruw bɔra k'u be dɔɔn kɛ tuma min na, aw ka bɔ ɛrɛzɛnforow kɔnɔ ka kelen kelen minɛ ka taga o furu aw ka mara la.

²²Ni u faaw, walima u badenw y'a fɔ an ye k'olu te sɔn, an ben'a fɔ u ye ko u ka sabali k'o to aw ma, ko bari an ma se ka musow sɔrɔ k'o di aw kelen kelen bɛɛ ma kɛlɛ tuma na. An ben'a fɔ u ye k'olu ma u di aw ma do, o tuma na, olu kunko t'a la.»

²³Bɛnzamɛn kɔmɔgɔw y'a kɛ ten. U ye musow minɛ dɔnkɛ sunguruw cɛma, ka kɛɲɛ n'u daa ye. O kɔ, u tagara u ka mara la, u y'u ka duguw lalaga ka sigi o kɔnɔ.

²⁴O waati kelen na fana, Isirayɛlidenw kelen kelen bɛɛ wilila ka taga u ka sigiyɔrɔw la u ka soow kɔnɔ. U bɛɛ tagara u faso la.

²⁵ O waati la, masacɛ tun te Isirayɛlidenw fɛ. Mɔgɔ kelen kelen bɛɛ tun b'a yɛrɛ sago kɛ.