Read dyu Cɛfariw ka kitabu 7 Bible Online

Cɛfariw ka kitabu 7 - dyu bible

Cɛfariw ka kitabu 7

¹Sɔgɔmada joona, Yerubaali n'o ye Zedeyɔn ye a wilila n'a ka jama bɛɛ ye ka taga sigi Ɛnarɔdi jii bɔyɔrɔ la. Madiyanw ka kɛlɛbolo tun siginin be Zedeyɔn ta kɔgɔdugu ɲafan na More kulu faan fɛ kɔkɛnɛ na.

²Masaba y'a fɔ Zedeyɔn ye ko: «Jama min be n'i ye, olu ka ca kojugu, ne te se ka madiyanw don u bolo. N'o kɛra, u be se k'a fɔ k'u yɛrɛ ka seko lo, o la, u bena u yɛrɛ boɲa ne ye.

³ O la, i k'a fɔ jama ye ko mɔgɔ min be siran ka yɛrɛyɛrɛ, o tigi ka kɔsegi ka bɔ Galaadi kulu kɔrɔ.» Mɔgɔ waa mugan ni fila (22 000) bɔra jama cɛma ka kɔsegi, mɔgɔ waa tan (10 000) tora.

⁴Masaba y'a fɔ Zedeyɔn ye tugu ko: «Halibi jama nin ka ca kojugu. Taga n'u ye kɔda la, ne bena u woloma i ye o yɔrɔ la. Ni ne y'a fɔ ko min ka taga n'i ye, o bena taga n'i ye, ni ne ko min te taga n'i ye, o tigi tena taga.»

⁵O la, Zedeyɔn tagara ni jama ye kɔda la. Masaba y'a fɔ a ye ko: «Ni mɔgɔ o mɔgɔ ye jii min i n'a fɔ wulu, i be olu woloma ka bɔ mɔgɔw la minw b'u kunbiri gwan ka minni kɛ.»

⁶Mɔgɔ minw ye jii ta n'u tigɛ ye ka sɔrɔ k'a min, olu tun ye mɔgɔ kɛmɛ saba ye, mɔgɔ tɔw bɛɛ y'u kunbiri gwan ka minni kɛ.

⁷O kɔ, Masaba y'a fɔ Zedeyɔn ye ko: «Ne bena aw kisi ka madiyanw don i bolo, mɔgɔ kɛmɛ saba nunu le barika la, minw ye jii min n'u tigɛ ye. A to mɔgɔ tɔw bɛɛ ka taga u ka yɔrɔw la.»

⁸Zedeyɔn y'a fɔ ko mɔgɔ tɔ nunu kelen kelen bɛɛ ka taga u ka soo. A tora ni mɔgɔ kɛmɛ saba nunu ye. Dumuni ni buru fiyɛta minw tun be mɔgɔ tɔ nunu bolo, mɔgɔ kɛmɛ saba ye olu minɛ. O y'a sɔrɔ madiyanw ka kɛlɛdenw tun siginin be jukɔrɔ kɔkɛnɛ na.

⁹Sufɛ, Masaba y'a fɔ Zedeyɔn ye ko: «Wili ka taga madiyanw ka sigiyɔrɔ la. Ne y'u don i bolo.

¹⁰N'o y'a sɔrɔ i be siran ka taga, i ka taga n'i ka baaraden Pura ye fɔlɔ.

¹¹U bena fɛɛn min fɔ, i bena o mɛn, o mɛnnin kɔ, i bena jagwɛlɛya sɔrɔ ka taga u kɛlɛ.» A wilila ni Pura ye ka jigi fɔɔ ka se u sigiyɔrɔ gɛrɛfɛ.

¹²Madiyanw, ni amalɛkiw ani mɔgɔ minw bɛɛ be kɔrɔn ɲafan na, u tun nana sigi caaman kɔkɛnɛ na i n'a fɔ tɔɔn, u ka ɲɔgɔmɛw tun ka ca i n'a fɔ kɔgɔjida la cɛncɛn.

¹³Zedeyɔn sera k'a sɔrɔ mɔgɔ dɔ tun b'a ka siko ɲafɔra a tɔɲɔgɔn ye. Ko ale sikora, ka buru dɔ ye a be kolonkolonna madiyanw ka kɛlɛdenw sigiyɔrɔ la, ko a kolonkolonna ka taga gosi fanibugu la, fanibugu nin yɛlɛmana ka ben fɔɔ ka jan.

¹⁴A tɔɲɔgɔn nin y'a fɔ a ye ko: «O te fɛɛn wɛrɛ ye ni Isirayɛliden Zedeyɔn, Yoyasi dencɛ ka kɛlɛkɛmuru tɛ. Ala ye madiyanw n'u ka kɛlɛdenw bɛɛ don a bolo.»

¹⁵Zedeyɔn y'o siko nin n'a kɔrɔ mɛn ka ban tuma min na, a y'a kunbiri gwan ka Ala bato, o kɔ, ka kɔsegi ka na Isirayɛlidenw ka kɛlɛdenw sigiyɔrɔ la k'a fɔ u ye ko: «Aw ye wili, Masaba ye madiyanw ka kɛlɛdenw don aw bolo.»

¹⁶Zedeyɔn ye mɔgɔ kɛmɛ saba tilan sigiyɔrɔ saba, ka buru fiyɛta, ni daganinlakolon di u kelen kelen bɛɛ ma. Kala mananinw tun be o daga nunu kɔnɔ.

¹⁷A y'a fɔ u ye ko: «Aw ka to ka ne filɛ, ni n ye fɛɛn min kɛ, aw k'o ɲɔgɔn kɛ fana. Ni n tagara se u ka kɛlɛdenw ka sigiyɔrɔ gɛrɛfɛ tuma min na, ni n ye fɛɛn min kɛ, aw k'o ɲɔgɔn kɛ.

¹⁸Ne ni minw be ɲɔgɔn fɛ, n'anw ye buru fiyɛ tuma min na, aw fana ka buru fiyɛ u faan bɛɛ la, k'aw kaan kɔrɔta k'a fɔ ko: ‹Masaba ta, ani Zedeyɔn ta.› »

¹⁹Zedeyɔn ni mɔgɔ kɛmɛ minw tun be n'a ye, olu sera madiyanw ka kɛlɛdenw ka sigiyɔrɔ gɛrɛfɛ dugutilama, kɔlɔsilikɛbaga wɛrɛw tun nana sigi a ma mɛn. U ye buruw fiyɛ, daganin minw tun be u bolo, u y'o cici.

²⁰Jɛnkulu saba nunu ye buruw fiyɛ, k'u ka daganinw cici, ka kala mananinw minɛ u numanbolow la, buru fiyɛtaw b'u kinibolow la. U pɛrɛnna ko: «Masaba ka murujan, ni Zedeyɔn ta!»

²¹U kelen kelen bɛɛ tora u lɔyɔrɔw la ka madiyanw ka kɛlɛdenw ka sigiyɔrɔ lamini. Madiyanw bɛɛ wilila ka boli, u be kulela ka to ka boli.

²²Mɔgɔ kɛmɛ saba nunu ye buruw fiyɛ tuma min na, Masaba y'a kɛ madiyanw ka kɛlɛdenw yɛlɛmana ɲɔgɔn kama ni murujanjanw ye. U bolila ka taga se fɔɔ Bɛtisita, Serera faan fɛ, fɔɔ Abɛlimeyola, min be Tabati gɛrɛfɛ.

²³Isirayɛliden minw be Nɛfutali mara la, ni Asɛri ani minw bɛɛ be Manase, olu ye ɲɔgɔn lajɛn ka tugu madiyanw kɔ.

²⁴Zedeyɔn ye mɔgɔw bila ka ta'a fɔ Efarayimu mara kuluyɔrɔ mɔgɔw ye ko u ka wili ka jigi ka madiyanw kunbɛn, ka taga Zurudɛn baji tigɛyɔrɔw tugu fɔɔ Bɛtibara. Efarayimu kɔmɔgɔw bɛɛ wilila ka ɲɔgɔn lajɛn, ka taga Zurudɛn baji tigɛyɔrɔw tugu fɔɔ Bɛtibara.

²⁵U ye madiyanw ka kuntigiw fila minɛ, Orɛbu ni Zɛbu. U ye Orɛbu faga kabakuru dɔ kan min be wele ko Orɛbu ta, ani ka Zɛbu fana faga *ɛrɛzɛnji bɔyɔrɔ dɔ la min be wele ko Zɛbu ta. U tugura madiyanw kɔ k'u gwɛn, ka taga ni Orɛbu ni Zɛbu kungolow ye Zedeyɔn fɛ Zurudɛn baji kɔfɛ.