Read dyu Cɛfariw ka kitabu 8 Bible Online

Cɛfariw ka kitabu 8 - dyu bible

Cɛfariw ka kitabu 8

¹Efarayimu kɔmɔgɔw y'a fɔ Zedeyɔn ye ko: «I ye mun le kɛ anw na ten? Mun na i ma anw wele ka taga madiyanw kɛlɛyɔrɔ la?» U y'a jalaki kosɔbɛ.

²O la, Zedeyɔn y'a fɔ u ye ko: «Ne ye mun le kɛ min be se ka suma ni aw ka kɛta ye? Efarayimu kɔmɔgɔw ye baara min kɛ, yala o man fisa ni Abiyezɛri ka mɔgɔw ta ye wa?

³ Ala ye madiyanw ka kuntigiw don aw le bolo, minw ye Orɛbu ni Zɛbu ye. Ne ye mun le kɛ min be se ka suma ni aw ta ye?» Zedeyɔn y'o kuma fɔ ka ban yɔrɔ min na dɔrɔn, u dusu sumana.

⁴Zedeyɔn ni mɔgɔ kɛmɛ saba nunu sera Zurudɛn baji daa la tuma min na, u y'a tigɛ. U tun sigɛnna kosɔbɛ, nga u tora ka tugu Madiyanw kɔ.

⁵Zedeyɔn y'a fɔ Sukɔtikaw ye ko: «Aw ka ɲa ne ma ka dumuni di ne ka kɔmɔgɔw ma, bari u sigɛnnin lo kosɔbɛ, ne be Madiyanw ka masacɛ Zɛba ni Salimuna gwɛnna.»

⁶Nga Sukɔtikaw ka kuntigiw y'a jaabi ko yala a sera Zɛba ni Salimuna kɔrɔ ka ban wa, ni olu bena dumuni di a ka kɛlɛdenw ma.

⁷Zedeyɔn y'a fɔ u ye ko: «N'a kɛra ten, ni Masaba ye Zɛba ni Salimuna don ne bolo tuma min na, ne bena aw bugɔ ni kongokolon ŋɔnibolow ye.»

⁸A tɛmɛna ka taga Penuyɛli, k'o yɔrɔ mɔgɔw daali fana. Olu ye Sukɔtikaw ka kuma ɲɔgɔn fɔ a ye.

⁹A fana y'a fɔ olu ye ko: «Ni ne ɲuman segira, ne bena aw ka dugu sangaso nin ci.»

¹⁰O y'a sɔrɔ Zɛba ni Salimuna tun be Karikɔri mara la n'u ka kɛlɛdenw ye. U tun be se mɔgɔ waa tan ni duuru (15 000) ɲɔgɔn ma. Olu le tun tora kɔrɔn fɛ mɔgɔw ka kɛlɛdenw na. U tun ye mɔgɔ waa kɛmɛ ni mugan (120 000) faga. Minw tun ye cɛfariw ye.

¹¹Kɔrɔn faan fɛ mɔgɔ minw tun be sigi ka yaala, n'u tun be Nobasi ni Yogibeya, kɛlɛden minw tun lanin b'a la kosɔbɛ ko foyi tena u sɔrɔ, Zedeyɔn ye olu ka sira le ta ka taga olu kɛlɛ.

¹²Madiyanw ka masacɛ Zɛba ni Salimuna ye boli ta, Zedeyɔn tugura u kɔ k'u minɛ. A kɛra ten, a y'u ka kɛlɛdenw bɛɛ ɲagami.

¹³O kɔ, Zowasi dencɛ Zedeyɔn kɔsegira ka bɔ kɛlɛkɛyɔrɔ nin na ka tɛmɛ Ɛrɛsi tintin faan fɛ.

¹⁴A ye Sukɔti kanbelen dɔ minɛ k'a ɲininga dugu nin kuntigiw n'a cɛkɔrɔbaw tɔgɔw la. Ale y'u tɔgɔ sɛbɛn k'o d'a ma, o bɛɛ kɛra mɔgɔ bi wolonwula ni wolonwula ye.

¹⁵O kɔ, a tagar'a fɔ Sukɔtikaw ye ko: «Aw ye ne dɔgɔya Zɛba ni Salimuna minw kama, olu filɛ sa, aw tun y'a fɔ k'o tuma na, ne sera Zɛba ni Salimuna kɔrɔ ka ban, ni aw bena dumuni di ne ka mɔgɔ sɛgɛnninw ma wa?»

¹⁶A ye dugu cɛkɔrɔbaw minɛ, ka tila ka Sukɔtikaw tɔɔrɔ ni kongokolon kɔnɔ ŋɔniw ye.

¹⁷A fana ye Penuyɛli dugu sangaso ci ka dugumɔgɔ cɛmanw faga.

¹⁸O kɔ, a y'a fɔ Zɛba ni Salimuna ye ko: «Aw tun ye Tabɔrika minw faga, olu tun be cogo di?» U y'a jaabi ko: «U tun be i n'a fɔ ele, u kelen kelen bɛɛ tun kɛra i n'a fɔ masadenw.»

¹⁹A y'a fɔ u ye ko: «Ne badenw tun lo, an ye baa kelen ye. Masaba kosɔn, ni aw tun ma u faga, ne tun tena aw faga fana.»

²⁰O kɔ, a y'a fɔ a deen fɔlɔ Yetɛri ye ko ale ka wili k'u faga, nga deen nin ma sɔn k'a ka murujan bɔ, bari a tun be siran, a tun ka dɔgɔ.

²¹Zɛba ni Salimuna y'a fɔ Zedeyɔn ye ko ale yɛrɛ ka wili ka olu faga. Ko bari cɛɛ bɛɛ be n'u ka cɛfariya ye. Zedeyɔn wilila k'u faga. O kɔ, masirifɛn minw tun be u ka ɲɔgɔmɛw kaan na, a ye olu ta.

²²O kɔ, Isirayɛlidenw y'a fɔ Zedeyɔn ye ko: «Sigi an kunna, e n'i deen an'i mamaden, bari e le kɛra sababu ye k'an bɔsi madiyanw bolo.»

²³Nga Zedeyɔn y'a fɔ u ye ko: «Ne tena sigi aw kunna, ne deen fana tena sigi aw kunna. Masaba le ye aw kuntigi ye.»

²⁴A y'a fɔ u ye ko: «Ne bena fɛɛn kelen le ɲini aw fɛ. Aw ye tulolanigɛ minw sɔrɔ an juguw fɛ, aw kelen kelen bɛɛ k'aw taw dɔ di ne ma.» O y'a sɔrɔ tulolanigɛ sanulaman tun be u juguw fɛ, bari Isimayɛli kɔmɔgɔw tun lo.

²⁵U y'a fɔ a ye ko: «An bena o di ni diyanako ye.» U ye fani dɔ la duguma, u ye fɛɛn minw sɔrɔ u juguw fɛ, u kelen kelen bɛɛ ye bololanigɛ kelen bɔ o la k'o fili o fani kɔnɔ.

²⁶Zedeyɔn tun ye bololanigɛ sanulaman minw ɲini u fɛ, u gwiliya tun sera kilo mugan ni duuru ma. Kaan masirifɛnw, ni tulolanigɛw ani madiyanw ka masacɛw ka faniwulen sɔngɔgwɛlɛnw, olu tun ma jati, ani ɲɔgɔmɛw kaan masirifɛnw, olu fana niin tun t'o la.

²⁷Zedeyɔn y'u ta ka jaa lalaga n'o ye k'a bila a ka dugu la min ye Ofira ye. A laban, Isirayɛlidenw bɛɛ ye Ala to yen, ka nɔrɔ o la. A kɛra ten, o kɛra i n'a fɔ jaan, Zedeyɔn n'a ka soo fɛ.

²⁸Madiyanw tun te se k'u kuun kɔrɔta fewu Isirayɛlidenw ɲana. U kuun majiginin tora. Jamana nin tora hɛrɛ la saan bi naani kɔnɔ Zedeyɔn ka tile la.

²⁹Zowasi dencɛ Zedeyɔn u be min wele Yerubaali, ale kɔsegira ka taga sigi a ka soo.

³⁰A deenw tun ye mɔgɔ bi wolonwula ye, bari muso caaman le tun b'a fɛ.

³¹A ka gɛrɛfɛmuso min tun be Sisɛmu, ale fana tun ye dencɛ sɔrɔ a ye. U y'a tɔgɔ la ko Abimelɛki.

³²Zowasi dencɛ Zedeyɔn kɔrɔla kosɔbɛ ka sɔrɔ ka sa. U y'a suu don a facɛ ka kaburu la Ofira dugu kɔnɔ, min tun ye Abiyezɛri ka dugu ye.

³³Zedeyɔn sanin kɔ, Isirayɛlidenw y'a daminɛ ka *Baali sɔn yɔrɔ caaman na, ka joo dɔ minɛ min tɔgɔ ko Baali Beriti k'o kɛ batofɛn ye.

³⁴U jugu minw tun y'u lamini, Masaba, Isirayɛli ka Ala ale min tun y'u bɔsi o bolo, u m'u hakili to ale la tugu.

³⁵O kɔ, u faranna ka bɔ Yerubaali ka somɔgɔw la, min ye Zedeyɔn ye, k'a sɔrɔ a tun ye koɲuman caaman kɛ u ye.