Read dyu Cɛfariw ka kitabu 9 Bible Online

Cɛfariw ka kitabu 9 - dyu bible

Cɛfariw ka kitabu 9

¹Yerubaali dencɛ Abimelɛki wilila ka taga Sisɛmu a bamuso badenw fɛ, k'a fɔ olu, n'a bamuso ka fadenw bɛɛ ye ko:

²«Ne b'a ɲini aw fɛ aw k'a fɔ Sisɛmu dugu mɔgɔw bɛɛ ye ko Yerubaali dencɛ mɔgɔ bi wolonwula ka kɛ aw kuntigiw ye, o le ka fisa wa, walima mɔgɔ kelen? Aw k'a faamu fana ko ne ye aw deen ye.»

³A bamuso badenw y'o kuma nunu bɛɛ fɔ a tɔgɔ la Sisɛmukaw ye. Sisɛmukaw ka miiriya yɛlɛmana ka ta'a faan fɛ, bari u tun y'a fɔ ko a ye olu baden ye.

⁴U ye warigwɛ kuru bi wolonwula bɔ Baali Beriti sɔnso kɔnɔ k'o d'a ma. A y'o ta ka taga mɔgɔkuntanw ni mɔgɔkolonw sara n'o ye, olu sɔrɔla ka tugu a kɔ.

⁵A tagar'a facɛ ka soo Ofira dugu kɔnɔ, k'a faden mɔgɔ bi wolonwula minɛ k'u faga kabakuru kelen kan. Yotamu dama le sera ka kisi, bari ale tun dogora, ale tun ye Yerubaali deenw bɛɛ la dɔgɔmanin ye.

⁶Sisɛmukaw bɛɛ ni Bɛtimilokaw bɛɛ wilila ka ɲɔgɔn lajɛn, ka na Abimelɛki sigi masaya la, joyiri jukɔrɔ, kabakuru tutunin gɛrɛfɛ.

⁷U tagara o fɔ Yotamu ye. Ale yɛlɛla Garizimu kulu kan ka lɔ a sanfɛ ka pɛrɛn k'a fɔ u ye ko: «Sisɛmukaw, aw ye mɛnni kɛ ne fɛ, janko Ala k'aw fana lamɛn.

⁸Loon dɔ, yiriw wilila ko u bena masacɛ sigi u yɛrɛ kunna. U y'a fɔ olivuyiri ye ko ale ka kɛ u ka masacɛ ye.

⁹Nga olivuyiri y'a fɔ u ye ko: ‹Ne tulu min be kɛ ka batofɛnw ni adamadenw boɲa, ne k'o diko dabila ka taga sigi yiriw kunna wa?›

¹⁰O kɔ, u y'a ɲini torosun fɛ ko ale ka sigi u kunna fana.

¹¹Nga torosun y'a fɔ u ye ko: ‹Ne be se ka n ka ɲumanya ni n deen diman diko dabila ka taga sigi yiriw kunna wa?›

¹²U tagar'a fɔ *ɛrɛzɛnsun ye fana ko ale ka sigi u kunna.

¹³Nga ɛrɛzɛnsun y'a fɔ u ye ko: ‹Ne duvɛn min be batofɛnw ni adamadenw nisɔndiya, ne k'o diko dabila, ka taga sigi yiriw kunna wa?›

¹⁴O bɛɛ kɔ, u bɛɛ tagar'a fɔ ŋɔnitu ye ko ale ka sigi olu kunna.

¹⁵Ŋɔnitu y'a fɔ u ye ko: ‹N'aw b'a fɛ ne ka kɛ aw ka masacɛ ye tiɲɛ na, aw ye na don ne suma kɔrɔ, n'o tɛ, tasuma bena bɔ ne la ka Liban yiribabaw jɛni!›

¹⁶«Sisan aw ye Abimelɛki sigi masaya la, aw y'o kɛ ni kɔnɔgwɛ ye wa? Yala aw fana ye koo ɲanaman le kɛ Yerubaali n'a ka somɔgɔw la wa? A ye baara minw kɛ aw ye, aw y'o ɲɔgɔn le segi a ma wa?

¹⁷Ne faa y'a yɛrɛ nii saraka ka kɛlɛ kɛ, ka sɔrɔ k'aw bɔsi madiyanw bolo.

¹⁸Aw do wilila ne facɛ ka soo kama, k'a deen mɔgɔ bi wolonwula faga kabakuru kelen kan, k'a ka jɔnmuso deen Abimelɛki minɛ k'ale sigi masaya la, bari aw balima lo.

¹⁹N'a kɛra ko aw ye baaraɲuman le kɛ Yerubaali n'a ka somɔgɔw ye bii, Abimelɛki ka aw diyanako kɛ, aw fana k'ale ta kɛ.

²⁰N'o tɛ, Abimelɛki ka kɛ tasuma ye k'aw Sisɛmukaw ni Bɛtimilokaw jɛni, aw Sisɛmukaw ni Bɛtimilokaw ka kɛ tasuma ye ka Abimelɛki jɛni!»

²¹O kɔ, Yotamu bolila ka taga Beeri ka to o yɔrɔ la. A ni Abimelɛki yɔrɔ tun ka jan ɲɔgɔn na.

²²Abimelɛki sigira masaya la Isirayɛlidenw kunna saan saba kɔnɔ.

²³Ala y'a kɛ sutana donna Abimelɛki ni Sisɛmukaw cɛ, Sisɛmukaw murutira Abimelɛki ma.

²⁴O kɛra janko kojugu min tun kɛra Yerubaali deen mɔgɔ bi wolonwula la, o juru ka sara u faden Abimelɛki ni Sisɛmukaw la, minw ye ɲɔgɔn dɛmɛ k'u faga u kunko ka la u yɛrɛ kun.

²⁵Sisɛmukaw ye mɔgɔ dɔw bila kuluw kan Abimelɛki kama. Olu tun be to ka tɛmɛbagaw ka fɛɛnw minɛ u fɛ. O koo sera Abimelɛki ma.

²⁶Ebɛdi dencɛ Gaali nana n'a badenw ye ka se Sisɛmu. Sisɛmukaw y'u jigi la ale kan.

²⁷U wilila ka taga *ɛrɛzɛnforow la, k'o tigɛ k'a jii bɔ, ka sɔrɔ ka ɲanagwɛ labɛn. U tagara don u ka joso kɔnɔ ka dumuni kɛ ka minni kɛ, o kɔ u ye Abimelɛki danga.

²⁸Ebɛdi dencɛ Gaali y'a fɔ ko: «Abimelɛki ye jɔn ye, Sisɛmukaw fɛ, n'an be to ka baara kɛ a ye? Yerubaali dencɛ tɛ wa? Zebuli le t'a ka ɲamɔgɔ dɔ ye wa? U bɛɛ tun te Sisɛmu sigibaga Amori ka baarakɛlaw ye wa? Mun na an bena baara kɛ Abimelɛki ye?

²⁹Ni ne tun kɛra jama nin ɲamɔgɔ ye, ne tun bena Abimelɛki bɔ yen! Ne tun bena ta'a fɔ a ye ko a ka banba k'a ka kɛlɛdenw labɛn kosɔbɛ ka na an be kɛlɛ kɛ!»

³⁰Zebuli, min tun ye lasigiden ye dugu nin kɔnɔ, ale ye Ebɛdi deen Gaali ka kuma mɛn minkɛ, a dimina.

³¹A ye mɔgɔ dɔw ci dogo la ka ta'a fɔ Abimelɛki ye ko: «Ebɛdi dencɛ Gaali n'a badenw nana Sisɛmu, u b'a la ka dugumɔgɔw kɔnɔnasu i kama.

³²Sisan i ka wili sufɛ ka taga kongo, e n'i ka jama, ka taga dogo yen.

³³Sɔgɔma, tilekun be bɔ tuma min na, i ka wili ka na n'i ka jama ye dugu nin kama. Ni Gaali n'a ka jama bɔra k'i kunbɛn, i seko ye min ye, i k'o kɛ a la.»

³⁴Abimelɛki n'a ka jama bɛɛ wilila ka taga sufɛ, ka taga dogo Sisɛmu gɛrɛfɛ. A tun ye jama nin tilan sigiyɔrɔ naani.

³⁵Ebɛdi dencɛ Gaali wilila ka na lɔ dugu donda la. O y'a sɔrɔ Abimelɛki n'a ka jama tun be bɔra u ka dogoyɔrɔ la.

³⁶Gaali y'u ye tuma min na, a y'a fɔ Zebuli ye ko: «A filɛ, jama dɔ bɔtɔ ye kulu kan ka jigi!» Zebuli y'a fɔ a ye ko: «Ayi, kulu suma lo. E y'o le ye k'a fɔ ko mɔgɔw lo.»

³⁷Gaali y'a fɔ tugu ko: «Nin ye jama yɛrɛyɛrɛ lo ye min be bɔra jamana cɛmancɛ kulu kan ka jigi, jɛnkulu dɔ fana natɔ filɛ nin ye ka bɔ joyiri faan fɛ.»

³⁸Zebuli y'a jaabi ko: «I ka dabayakuma kuun kɛra jumɛn ye? E min tun b'a fɔra ko Abimelɛki ye jɔn ye n'an bena baara kɛ ale ye. E tun be jama min lɔgɔbɔra, o tɛ wa? Wili ka taga o kunbɛn ka kɛlɛ kɛ n'u ye sa!»

³⁹Gaali bilara Sisɛmukaw ɲafɛ ka taga Abimelɛki kɛlɛ.

⁴⁰A ye boli ta, Abimelɛki tugur'a kɔ. Mɔgɔ caaman fagara fɔɔ ka na se dugu donda la.

⁴¹Abimelɛki nana sigi Aruma. Zebuli ye Gaali n'a badenw gwɛn ka bɔ Sisɛmu.

⁴²O dugusagwɛ, Sisɛmukaw bɔra ka taga kongo la tugu. U y'o fɔ Abimelɛki ye.

⁴³Ale wilila k'a ka jama tilan saba, ka taga u dogo kongo kɔnɔ. A y'a ye dugu mɔgɔw be bɔra dugu kɔnɔ tuma min na, a wilila k'u kɛlɛ.

⁴⁴Abimelɛki tun be ni jɛnkulu min ye, ale girinna ka taga lɔ dugu donda la. Jama min tun bɔra dugu kɔnɔ, jɛnkulu fila nunu girinna ka taga o halaki.

⁴⁵Abimelɛki ye dugu nin kɛlɛ tile kuturu bɛɛ kɔnɔ ka se a kɔrɔ. Dugumɔgɔ minw tun tora dugu kɔnɔ, a ye olu bɛɛ faga, ani ka dugu nin ci ka tila ka kɔgɔ dan yen. [1]

⁴⁶Migidalisisɛmukaw y'o kibaru mɛn tuma min na, u bolila ka taga don u ka joo Ɛliberiti ka soo logologo kɔnɔ.

⁴⁷U y'o fɔ Abimelɛki ye ko Migidalisisɛmukaw ye ɲɔgɔn lajɛn.

⁴⁸O la, Abimelɛki tagara yɛlɛ Salimɔn kulu kan, ale n'a ka jama bɛɛ, ka taga yiribolo dɔ tigɛ ni jende ye k'o la a gaman kan. O kɔ, a y'a fɔ a ka jama ye ko ale ye fɛɛn min kɛ, k'u ka banba k'o ɲɔgɔn kɛ fana.

⁴⁹U kelen kelen bɛɛ ye yiribolow tigɛ ka tugu a kɔ. A tagara u bila soo nin logologo kogo kɔrɔ k'a jɛni n'a kɔnɔ mɔgɔw ye. A kɛra ten, Migidalisisɛmukaw bɛɛ fana sara. U bɛɛ lajɛnnin tun be se mɔgɔ waa kelen ɲɔgɔn ma, cɛɛ ni musow.

⁵⁰O kɔ, Abimelɛki wilila ka taga Tebesi, k'a kɛlɛ ka se a kɔrɔ.

⁵¹Sangaso dɔ tun be dugu nin kɔnɔ, barika be min na kosɔbɛ. Dugumɔgɔw bɛɛ bolila ka taga don ale kɔnɔ k'u yɛrɛ datugu, cɛɛ fara muso kan. U yɛlɛla fɔɔ sangaso nin sanbon kan.

⁵²Abimelɛki tagara se sangaso nin daa la, k'a daminɛ k'a halaki. A gwɛrɛla ko a be tasuma don daa nin na.

⁵³ Muso dɔ ye wugu ta k'o fili a kuun na, a kuun cira.

⁵⁴O yɔrɔnin kelen, kanbelen min tun be to k'a ka kɛlɛkɛminanw ta, a y'a fɔ a ye ko a k'a ka murujan bɔ k'ale faga janko u kan'a fɔ ko muso le y'ale faga. Kanbelen nin ye murujan kɛ k'a sɔgɔ, a sara ten.

⁵⁵Isirayɛlidenw y'a ye ko Abimelɛki sara tuma min na, u kelen kelen bɛɛ tagara u ka soo.

⁵⁶Ala ye Abimelɛki ka kojugu juru sara a ye ten, a tun ye min kɛ a facɛ la k'a baden mɔgɔ bi wolonwula faga.

⁵⁷O cogo kelen fana na, Ala ye Sisɛmukaw ka kojugu bɛɛ juru sara u ye. A kɛra ten Yerubaali dencɛ Yotamu ka danga minɛna.