Read dyu Zan filanan 1 Bible Online

Zan filanan 1 - dyu bible

Zan filanan 1

¹Muso, [1] Ala ye e min woloma, ne min ye a ka jama ɲamɔgɔ ye, ne be bataki nin ci ele n'i deenw ma. Aw koo ka di ne ye tiɲɛ na. A ma kɛ i n'a fɔ aw koo ka di ne dama ye dɛ, mɔgɔ o mɔgɔ be tiɲɛ lɔn, aw koo ka di olu bɛɛ ye.

²Tiɲɛ kama, aw koo ka d'an ye, tiɲɛ do b'an kɔnɔ, a bena to an kɔnɔ tuma bɛɛ.

³Faa Ala n'a Dencɛ Yezu Krista ka makari an na, ka nɛɛma ni hɛrɛ kɛ anw ye tiɲɛ ni kanuya kosɔn.

⁴Faa Ala ye cii min d'an ma, ne y'i ka deen dɔw ye, minw be taamana tiɲɛ sira kan ka kɛɲɛ n'o ye. O ye ne nisɔn diya kosɔbɛ.

⁵ Ayiwa Muso, sisan ne b'a ɲini e fɛ ko an ka ɲɔgɔn kanu. O te cikura ye ni ne b'o fɔra i ye. Nga kɔrɔman lo, an ye min sɔrɔ kabini a daminɛtuma na.

⁶N'an be Ala ka ciiw bato, an be kanuya sira taama. Aw y'o cii le mɛn kabini a daminɛtuma na, ko aw ka ɲɔgɔn kanu.

⁷Bari galontigɛla caaman be diɲɛ na sisan. U b'a fɔ ko Yezu Krista tun te mɔgɔ yɛrɛ yɛrɛ ye. Min be ban ten, o le ye galontigɛla ni Krista jugu ye.

⁸Aw k'aw yɛrɛ kɔlɔsi waasa aw ka baara kana kɛ fuu ye. Nga aw ka se k'a nafa sɔrɔ.

⁹Mɔgɔ o mɔgɔ te Krista ka kalan bato, fɔɔ ka to ka koo wɛrɛ kɛ, Ala te o tigi fɛ. Mɔgɔ min b'a ka kalan bato, Faa Ala n'a Dencɛ b'o tigi fɛ.

¹⁰Ni mɔgɔ dɔ nana aw fɛ n'a ka kalan ni Krista ta te kelen ye, aw kana sɔn o tigi ka don aw ka soo kɔnɔ. Aw kan'a fo yɛrɛ.

¹¹Ni mɔgɔ min y'a fo, o tigi niin be don a ka kɛwali juguw la.

¹²Kuma caaman be n fɛ k'a fɔ aw ye. Nga n t'a fɛ k'o kɛ bataki ye. Bari ne yɛrɛ b'a fɛ ka na bɔ aw fɛ k'o fɔ aw ye ni n daa ye, waasa an ka nisɔndiya kosɔbɛ.

¹³Ala y'i Balimamuso min woloma fana, ale deenw b'i fo.