Read dyu Yirali 10 Bible Online

Yirali 10 - dyu bible

Yirali 10

¹O kɔ, ne ye mɛlɛkɛ fangatigi wɛrɛ jigitɔ ye ka bɔ sankolo la. Sankaba tun kɛnin be k'a lamini, sanmuru tun b'a kuun na. A ɲada tun be manamana i n'a fɔ tile, a seenw ɲaa be i n'a fɔ tasuma.

²Kitabufitini dɔ dayɛlɛnin tun b'a bolo. A y'a kinibolosen la kɔgɔji kan, k'a numanbolota la dugukolo kan.

³A ŋunana kosɔbɛ, i n'a fɔ jara. A ŋunana ten minkɛ, saan pɛrɛnna siɲɛ wolonwula k'a jaabi.

⁴Saan pɛrɛnna siɲɛ wolonwula minkɛ, u ye min fɔ, n ko n b'o sɛbɛn nga kumakan dɔ bɔra sankolo la ko: «Kana saan pɛrɛnkan wolonwula nunu darakan sɛbɛn, o to i kɔnɔ.»

⁵O tuma na, n tun ye mɛlɛkɛ min lɔnin ye n'a seen kelen be kɔgɔji kan ni kelen be dugukolo kan, ale y'a kinibolo kɔrɔta sanfɛ.

⁶Ala min be yen tuma bɛɛ, ale min ye sankolo, ni dugukolo ani kɔgɔji n'u kɔnɔnafɛnw bɛɛ dan, mɛlɛkɛ nin kalila n'o tɔgɔ ye ko: «Kɔnɔni t'a la tugu!

⁷ Nga ni mɛlɛkɛ wolonwulanan y'a ka buru fiyɛ loon min na, Ala ben'a ka koo dogonin dafa o loon na, i n'a fɔ a tun ya fɔ a ka kiraw ye cogo min na.»

⁸N tun ye kumakan min mɛn ka bɔ sankolo la, o tigi kumana n fɛ tugu ko: «Mɛlɛkɛ min lɔnin be kɔgɔji ni dugukolo kan, taga bolola kitabufitini nin minɛ.»

⁹N tagara mɛlɛkɛ nin daali ko a ka kitabu nin di yan. A ko n ma: «Hɔn, a minɛ k'a ɲimi, a bena diya i daa la i n'a fɔ lii, nga a bena kunanya i kɔnɔ.»

¹⁰ Ayiwa, n ye kitabu nin minɛ mɛlɛkɛ nin bolo k'a ɲimi. A tun ka di n daa la i n'a fɔ lii, nga a ye n kɔnɔ bɛɛ kunanya.

¹¹O la, u y'a fɔ n ye ko: «I ka kan ka kiraya kɛ tugu, ka Ala ka kuma fɔ siya caaman ye, ni jamanaw, ani masa caaman ye.»